ఉప్పాడ బీచ్‌లో బంగారం.. ఏరుకునేందుకు వెళ్లిన జనాలు

కాకినాడ జిల్లాలో స్థానికులు బంగారం కోసం సముద్ర తీరంలో గాలిస్తున్నారు. కొత్తపల్లి మండలం ఉప్పాడ తీరంలో స్థానికులు బంగారం దొరుకుతుందనే ఆశతో వెతుకుతున్నారు. తుఫాన్, అల్పపీడనాలు ఏర్పడిన సమయంలో సముద్ర గర్భం నుంచి బంగారు రజను ( చిన్న చిన్న రేణువులు) ఒడ్డుకు కొట్టుకుస్తుందని స్థానికంగా ఉండే మత్స్యకారులకు నమ్మకం. అందుకే మత్స్యకార కుటుంబాలు ఇలా సముద్ర తీరంలో బంగారం వేటలో ఉంటాయి. ఇప్పుడు అల్పపీడనం ఏర్పడటంతో.. బంగారు రజను కోసం గాలిస్తున్నారు. కొందరికి బంగారం దొరికిందని వారు చెబుతున్నారు.

ఉప్పాడ తీరంలో మహిళలు దువ్వెన పట్టుకుని.. సముద్ర అలలు ఒడ్డుకొచ్చి.. మళ్లీ లోపలకు వెళ్లే సమయంలో ఇసుకపై దువ్వెనతో గీస్తున్నారు. ఇలా చేస్తే బంగారు రజను బయటపడుతుందని చెబుతున్నారు.. ఇలా ఇసుక లోపల నుంచి మిణుకు మిణుకుమంటూ కనిపించే బంగారు రంగులో ఉండేవాటని సేకరిస్తున్నారు. సముద్ర గర్భంలో నుంచి బంగారు రజను కొట్టుకొస్తుందని స్థానికంగా ఉండే మత్స్యకారులు చెబుతున్నారు. పూర్వకాలంలో ఇక్కడో మహానగరం ఉండేదని.. అప్పట్లో సముద్రం పొంగి నగరం సముద్ర గర్భంలో కలిసిపోయిందని తమ పెద్దలు చెప్పేవారంటున్నారు. అలాగే రాజుల కోటలు, పలు ఆలయాలు సముద్ర గర్భంలో కలిసిపోయాయంటున్నారు.

మరోవైపు నైరుతి బంగాళాఖాతంలో ఏర్పడిన తీవ్రవాయుగుండం తమిళనాడువైపు వెళుతోందని విపత్తుల నిర్వహణ సంస్థ తెలిపింది. శనివారం ఉదయానికి ఉత్తర తమిళనాడు-పుదుచ్చేరి తీరాల సమీపంలో కారైకాల్, మహాబలిపురం మధ్య పుదుచ్చేరి దగ్గరలో వాయుగుండంగా తీరం దాటే అవకాశం ఉందని అంచనా వేస్తున్నారు. ఈ ప్రభావంతో శుక్రవారం, శనివారం దక్షిణకోస్తా, రాయలసీమలో అక్కడక్కడ భారీ వర్షాలకు అవకాశం ఉందన్నారు. మిగిలినచోట్ల విస్తారంగా తేలికపాటి నుంచి మోస్తరు వర్షాలు పడే అవకాశం ఉందంటున్నారు. తీరం వెంబడి గంటకు 45-65 కి.మీ వేగంతో ఈదురుగాలులు వీచే అవకాశం ఉందని.. ప్రజలు అప్రమత్తంగా ఉండాలని.. రైతులు తగిన జాగ్రత్తలు తీసుకోవాలని విపత్తుల నిర్వహణ సంస్థ మేనేజింగ్ డైరెక్టర్ రోణంకి కూర్మనాథ్ తెలిపారు. అంతేకాదు లోతట్టు ప్రాంతాలలో ఉండే ప్రజలు అప్రమత్తంగా ఉండాలని కూడా సూచించారు. వ్యవసాయ పనుల్లో రైతులు తగిన జాగ్రత్తలు తీసుకోవాలని.. ముందస్తు జాగ్రత్తగా మత్స్యకారులు వేటకు వెళ్లొద్దని హెచ్చరించారు.