మరణంలోనూ వీడని స్నేహం.. ఒక్క స్వెటర్ కోసం ఇద్దరు అమ్మాయిల ఆత్మహత్య!

15 ఏళ్లుగా స్నేహం చేస్తున్న ఆ అమ్మాయిలు ఏం చేసినా కలిసే చేసేవాళ్లు. బాల్యం నుంచి ఒకేచోట చదువుకుంటూ, ఒకే చోట ఆడుకుంటూ ఒకరికొకరుగా బతికారు. ఒకరు బడికి వెళ్లకపోతే మరొకరు కూడా వెళ్లకపోయేవారు. ప్రాణ స్నేహితులుగా ఉన్న వారిద్దరూ ఒకరి పేరును మరొకరి చేతులపై పచ్చబొట్టుగా కూడా వేయించుకున్నారు. కలకాలం ఇలాగే కలిసి ఉండాలని కూడా అనుకున్నారు. కానీ ఇందులో ఓ అమ్మాయి ఆ కలలను చిదిమేసింది. ఆమె తీసుకున్న ఓ చిన్న నిర్ణయంతో ఇద్దరి ప్రాణాలు పోయాయి. అసలీ స్నేహితుల కథేంటంటే..!

ఉత్తర ప్రదేశ్ బండాలోని జారి గ్రామానికి చెందిన 18 ఏళ్ల పుష్పాదేవి ప్రజాపతికి.. అదే గ్రామానికి చెందిన 19 ఏళ్ల గాయత్రితో చిన్నప్పటి నుంచి స్నేహం ఉంది. వీరిద్దరూ చనిప్పటి నుంచే మంచి స్నేహితులు. ఏం చేసినా కలిసే చేసేవాళ్లు. తినడం, ఆడుకోవడం, బడికి వెళ్లడం.. ఇలా అన్నీ కలిసే చేసేవాళ్లు. ఒకరు లేకుండా ఒకరు ఉండలేని పరిస్థితి. దాదాపు 15 ఏళ్లుగా కలిసే ఉంటున్న వీరికి.. ఒకరికి సంబంధించిన విషయాలు మరొకరికి చాలా బాగా తెలుసు.

అయితే ఈ శీతాకాలం వచ్చినప్పటి నుంచి గాయత్రి స్వెటర్ కొనుక్కోవాలని అనుకుంటోంది. కానీ స్వెటర్ కొనుక్కునేందుకు ఆమె వద్ద డబ్బు లేదు. అలాగే కుటుంబ ఆర్థిక పరిస్థితి కూడా అంతంత మాత్రమే కావడంతో వాళ్లు కూడా కొనివ్వలేపోకపోయారు. ఇదే విషయమై స్నేహితురాలితో చాలా సార్లు చర్చించింది. తన పేదరికం గురించి మాట్లాడింది. కనీసం తాను స్వెటర్ కూడా కొనుక్కోలేకపోతున్నానంటూ ఏడ్చేది. గాయత్రీ చెప్పే విషయాలు విన్న పుష్పాదేవి కూడా చాలా బాధ పడేది.

పుష్పాదేవి కుటుంబ ఆర్థిక పరిస్థితి కూడా ఇంచుమించుగా గాయత్రీ కుటుంబానితో సమానం. స్నేహితురాలు పడుతున్న బాధ చూసిన పుష్పాదేవి చాలా సార్లు ధైర్యం చెప్పింది. ముందుముందు కొనుక్కోవచ్చులే అంటూ నచ్చజెప్పింది. కానీ అది వినని గాయత్రి నా జీవితం ఇంతే అంటూ తీవ్ర మనస్తాపానికి గురైంది. డిసెంబర్ 20వ తేదీన ఇంట్లో ఎవరూ లేని సమయం చూసి ఉరివేసుకుని ఆత్మహత్య చేసుకుంది. కుటుంబ సభ్యుల సమాచారంతో రంగంలోకి దిగిన పోలీసులు కేసు నమోదు చేసుకుని దర్యాప్తు ప్రారంభించారు. పోస్టుమార్టం నిమిత్తం గాయత్రీ మృతదేహాన్ని స్థానిక ప్రభుత్వాసుపత్రికి పంపించారు.

స్నేహితురాలి ఆత్మహత్య విషయం తెలుసుకున్న పుష్పాదేవి విపరీతంగా ఏడ్చింది. స్నేహితురాలు తిరిగి రాదన్న వార్తను జీర్ణించుకోలేకపోయింది. ఇక తాను ఒంటరిదాన్ని అయిపోయినట్లుగా భావించిన ఆమె చనిపోవాలని నిర్ణయించుకుంది. అనుకున్నదే తడవుగా స్నేహితురాలు తరహాలోనే ఫ్యాన్‌కు ఉరివేసుకుని బలవన్మరణానికి పాల్పడింది. విషయం తెలుసుకున్న తల్లిదండ్రులు కన్నీరుమున్నీరుగా విలపిస్తున్నారు. ఇద్దరు ప్రాణ స్నేహితులు ఒకేరోజు చనిపోవడంతో గ్రామస్థులు అంతా కంటతడి పెడుతున్నారు. ఒక్క స్వెటర్ కోసం ఇద్దరి ప్రాణాలు బలయ్యాయంటూ ఆవేదన చెందుతున్నారు.