ఫిబ్రవరి 19 నుంచి శ్రీశైలంలో ప్రారంభం కానున్న బ్రహ్మోత్సవాలు
Andhra Pradesh Telugu | Suryaa Desk | Published : Fri, Jan 17, 2025, 09:43 PM
మహాశివరాత్రి బ్రహ్మోత్సవాలు ఈసారి శ్రీశైలంలో ఘనంగా నిర్వహించేందుకు అన్ని ఏర్పాట్లు చేస్తున్నట్లు ఆలయ అధికారులు తెలిపారు. ఈ క్రమంలో ఫిబ్రవరి 19 నుంచి మార్చి 1 వరకు బ్రహ్మోత్సవాలు నిర్వహించనున్నట్లు వెల్లడించారు. మహాశివరాత్రి ఏర్పాట్లపై ఈవో శ్రీనివాసరావు అధ్యక్షతన సిబ్బంది, అర్చకులు, అధికారులు సమీక్ష సమావేశం నిర్వహించిన క్రమంలో పేర్కొన్నారు.ఈ సమావేశంలో బ్రహ్మోత్సవాల నేపథ్యంలో భక్తుల సౌకర్యాలపై జిల్లా యంత్రాంగం సహకారంతో అన్ని కార్యక్రమాలు సమర్థవంతంగా జరగాలని ఈవో శ్రీనివాసరావు పేర్కొన్నారు. శివరాత్రి పూజల సంస్కృతులు, భక్తుల అవధి, పారిశుధ్యం, ట్రాఫిక్ నిర్వహణ వంటి అంశాలు ప్రధానంగా చర్చించారు.ఈవో శ్రీనివాసరావు సమీక్షలో శివరాత్రి బ్రహ్మోత్సవాలు 19న ప్రారంభమయ్యే ముందు నుండే భక్తుల రాక మొదలవుతుందని చెప్పారు. అందువల్ల ఏర్పాట్లన్నింటినీ వేగవంతంగా పూర్తి చేయాలని సూచించారు. ఫిబ్రవరి 26న శివరాత్రి పర్వదినం సందర్భంగా జరిగే ప్రభోత్సవం, బ్రహ్మోత్సవ కళ్యాణం, రథోత్సవం, తెప్పోత్సవం వంటి కార్యక్రమాలకు పకడ్బందీగా ఏర్పాట్లు చేయాలని ఆదేశించారు.
|
|