శరీరంలోని చెడు కొలెస్ట్రాల్‌ని కరిగించి గుండెకి బలాన్ని ఇచ్చే ఆహారాలు, తింటే ఏ సమస్యలూ రావు

ఈ రోజుల్లో చాలా మంది లైఫ్ స్టైల్ మీద ఎక్కువగా ఫోకస్ పెట్టడం లేదు. ఉరుకుల పరుగుల జీవితంలో ఓ పక్కా ప్రణాళిక లేకుండా బతికేస్తున్నారు. సరైన టైంలో తినకపోవడం, జంక్ ఫుడ్ తినడం, స్మోకింగ్, డ్రింకింగ్ ఇలా ఓ పద్ధతి లేకుండా జీవిస్తున్నారు. దీంతో.. చాలా ఆరోగ్య సమస్యలు కొని తెచ్చుకుంటున్నారు. అందులో ముఖ్యంగా ప్రపంచం మొత్తాన్ని భయపెడుతున్న ఓ అంశం ఒకటి ఉంది. అదే గుండెపోటు . ఈ రోజుల్లో చాలా మంది గుండె పోటుతో ఆకస్మాత్తుగా చనిపోతున్నారు. యువత కూడా గుండె పోటు బారిన పడుతున్నారు.

గుండె జబ్బులకు చెక్ పెట్టాలంటే మన జీవన శైలిలో కొన్ని మార్పులు చేసుకోవాలి. తినే ఆహారం నుంచి చేసే పనుల వరకు కొన్ని మార్పులు చేసుకుంటేనే గుండె బలంగా ఉంటుంది. లేదంటే మహమ్మారి బారిన పడక తప్పదు. ముఖ్యంగా తినే ఆహారంపై దృష్టి పెట్టాలి. కొన్ని ఆహారాలకు దూరంగా ఉండాలి. కొన్ని ఫుడ్స్‌ను డైట్‌లో భాగం చేసుకోవాలి. మొక్కల ఆధారిత ఆహారాలు, నట్స్, కూరగాయలు, పండ్లు వంటి వాటిని తింటే గుండె బలంగా మారుతుంది. ఎలాంటి ఆహారాలు గుండెకు మేలు చేస్తాయో ఇక్కడ తెలుసుకుందాం.

గింజలు, విత్తనాలు

వీటిలో అసంతృప్త కొవ్వులు, యాంటీ ఆక్సిడెంట్లు, కొవ్వులు ఎక్కువగా ఉన్నాయి. వీటిని తింటే గుండెకు ఎంతో మేలు జరుగుతుంది. వీటిని తినడం వల్ల శరీరంలో చెడు కొలెస్ట్రాల్ స్థాయిల్ని కరిగించి.. గుండెకు మేలు చేస్తాయి. చెడు కొలెస్ట్రాల్ స్థాయిలు తగ్గితే గుండె సమస్యల ముప్పు తగ్గుతుంది. అందుకే మీ ఆహారంలో బాదం, పిస్తా, వాల్ నట్స్, గుమ్మడి గింజలు, పొద్దు తిరుగుడు విత్తనాలు వంటి వాటిని భాగం చేసుకోవాలి.

బీన్స్

అనేక ఆరోగ్య సమస్యలకి కారణమయ్యే చెడు కొలెస్ట్రాల్‌ని తగ్గించే శక్తి బీన్స్‌లో పుష్కలంగా ఉంది. ఇందులో ఎక్కువగా పోషకాలు ఉంటాయి. ఇవి ఆరోగ్యాన్ని రక్షించడంలో కీలక పాత్ర పోషిస్తాయి. బీన్స్‌, కాయధాన్యాలు, శనగల్లో ప్రొటీన్‌, ఫైబర్‌, ఖనిజాలు సమృద్ధిగా ఉంటాయి. ఇవి రక్తంలో చెడు కొలెస్ట్రాల్‌ స్థాయిలను తగ్గిస్తాయి. చిక్కుళ్లను తరచూ మన ఆహారంలో చేర్చుకుంటే.. గుండె జబ్బుల ప్రమాదాన్ని తగ్గిస్తుంది.

పండ్లు

​పండ్లలో ఆరోగ్యానికి మేలు చేసే ఎన్నో పోషకాలు ఉంటాయి. అందుకే పండ్లను సలాడ్, జ్యూస్ రూపంలో తీసుకుంటారు. తాజా పండ్లు ఖనిజాలు, ఫైబర్‌, విటమిన్లు, యాంటీ ఆక్సిడెంట్లతో నిండి ఉంటాయి. ఈ పోషకాలు శరీరంలో ఇన్ఫ్లమేషన్ లెవల్స్ తగ్గించడంలో సాయపడతాయి. అంతేకాకుండా హైపర్ టెన్షన్‌ను దరిచేరినివ్వవు. పండ్లను ఆహారంలో ఎక్కువగా తీసుకుంటే.. గుండె సమస్యల ముప్పు తగ్గుతుంది.

కూరగాయలు, ఆకుకూరలు

​కూరగాయలు, ఆకుకూరల్లో ఎన్నో పోషకాలు సమృద్ధిగా ఉంటాయి. ​పాలకూర, బ్రకోలి, మెంతి కూర, పచ్చి మిరపకాయలు, బ్రస్సెల్స్ మొలకలు, కాలే వంటి ఆకుకూరలు, కాయగూరల్లో ఐరన్, విటమిన్ ఎ, విటమిన్ సి, విటమిన్ కె‌తో పాటు మరెన్నో పోషకాలు ఉన్నాయి. ఇవి శరీరంలోని చెడు కొలెస్ట్రాల్‌ని తగ్గించడమే కాకుండా ఇన్ఫ్లమేషన్ లెవల్స్‌ని కంట్రోల్ చేస్తాయి. వీటిని తినడం వల్ల గుండె ఆరోగ్యం మెరగవుతుంది. తాజా కూరగాయలు, ఆకుకూరలు గుండెకు ఎంతో మేలు చేస్తాయి.

బెర్రీలు

బ్లూబెర్రీస్, రాస్ప్బెర్రీస్‌, బ్లాక్బెర్రీస్, బ్లూ బెర్రీస్ అన్నీ బెర్రీ జాతికి చెందిన పండ్లు. వీటిలో పోషకాలు పుష్కలంగా లభిస్తాయి. వీటిలో ఫైబర్, విటమిన్ సి, విటమిన్ కె, మాంగనీస్, యాంటీ ఆక్సిడెంట్లు లభిస్తాయి. అంతేకాకుండా వాటర్ కంటెంట్ అధికంగా ఉంటుంది. కేలరీస్ కూడా తక్కువే. దీంతో వీటిని తీసుకోవడం వల్ల గుండె సమస్యలు వచ్చే ప్రమాదం తగ్గుతుంది. బెర్రీల్ని తాజాగా తింటే ఎక్కువ ప్రయోజనాలు అందుతాయని నిపుణులు చెబుతున్నారు.

తృణధాన్యాలు

తృణధాన్యాలు గురించి ప్రత్యేకంగా చెప్పాల్సిన పనిలేదు. వీటిలో ఎన్నో మంచి ఔషధ గుణాలు ఉంటాయి. పౌష్టిక విలువలు అధికం. ఓట్స్, బ్రౌన్ రైస్, క్వినోవా, అవిసెలు, ఉల్వలు, సజ్జలు వంటి తృణధాన్యాల్లో ఫైబర్ కంటెంట్ ఎక్కువగా ఉంటుంది. ఇవి రక్తంలో చెడు కొలెస్ట్రాల్ పెరగకుండా నిరోధిస్తాయి. వీటిని తినడం వల్ల గుండెకు ఎంతో మేలు జరుగుతుంది. వీటిలో ఉండే ఫైబర్ గుండె ఆరోగ్యాన్ని మెరుగుపరుస్తుంది.