ముగ్గురు భార్యలు, ఐదుగురు పిల్లలు, 10 మంది మనవళ్లు, మనవరాళ్లు

అమెరికా 47 వ అధ్యక్షుడిగా డొనాల్డ్ ట్రంప్ ప్రమాణ స్వీకారం అట్టహాసంగా జరిగింది. వాషింగ్టన్ డీసీలోని క్యాపిటల్‌ హిల్‌లో రోటుండా ఇండోర్‌లో జరిగిన ఈ కార్యక్రమంలో రెండోసారి అధ్యక్ష బాధ్యతలను చేపట్టారు. అమెరికా మాజీ అధ్యక్షులు, ప్రపంచ దేశాల నేతలు, ఇతర అతిథుల సమక్షంలో అమెరికా సుప్రీంకోర్టు జడ్జి ప్రమాణం చేయించారు. ట్రంప్ కంటే ముందు అమెరికా ఉపాధ్యక్షుడిగా జేడీ వాన్స్ ప్రమాణ స్వీకారం చేశారు. అమెరికాకు రెండోసారి అధ్యక్షుడిగా ఎన్నికైన డొనాల్డ్ ట్రంప్ కుటుంబం, భార్యలు, పిల్లలు, మనవళ్లు, మనవరాళ్లు ఉన్నారు. మొత్తం ఐదుగురు పిల్లల్లో ముగ్గురికి ఇప్పటివరకు పెళ్లిళ్లు అయ్యాయి.

డొనాల్డ్ ట్రంప్ మొదటి భార్య ఇవానా ట్రంప్. వీరిద్దరూ 1977లో పెళ్లి చేసుకున్నారు. వారికి ముగ్గురు సంతానం. డొనాల్డ్ ట్రంప్ జూనియర్, ఇవాంకా ట్రంప్, ఎరిక్. ఆ తర్వాత డొనాల్డ్ ట్రంప్-ఇవానా ట్రంప్ జంట 1990లో విడాకులు తీసుకుంది. 47 ఏళ్ల డొనాల్డ్ ట్రంప్ జూనియర్.. అమెరికా ఉపాధ్యక్షుడిగా జేడీ వాన్స్ ఎంపికలో కీలక పాత్ర పోషించారు. డొనాల్డ్ ట్రంప్ తొలిసారి అమెరికా అధ్యక్షుడిగా ఉన్న సమయంలో ఇవాంకా ట్రంప్ ఆయనకు సలహాదారుగా ఉన్నారు. ఆ తర్వాత రాజకీయాల్లో నుంచి తప్పుకున్నారు. ఇక 41 ఏళ్ల ఎరిక్ ట్రంప్.. ప్రస్తుతం ట్రంప్ 2.0 హయాంలో ప్రభుత్వ సలహాదారుగా బాధ్యతలు స్వీకరించనున్నారు.

ఆ తర్వాత డొనాల్డ్ ట్రంప్ 1993లో మార్లా మాపుల్స్‌ను రెండో పెళ్లి చేసుకున్నారు. మార్లా మాపుల్స్ ఒక హీరోయిన్. డొనాల్డ్ ట్రంప్-మార్లా మాపుల్స్‌ జంటకు టిఫానీ అనే 31 ఏళ్ల ఒక కుమార్తె ఉంది. ప్రస్తుతం ఆమె గర్భిణీగా ఉన్నారు. డొనాల్డ్ ట్రంప్-మార్లా మాపుల్స్‌ జంట 1999లో విడాకులు తీసుకుంది.

ఇవానా ట్రంప్, మార్లా మాపుల్స్‌లకు విడాకులు ఇచ్చిన తర్వాత 2005లో డొనాల్డ్ ట్రంప్.. మెలానియాను పెళ్లి చేసుకున్నారు. స్లోవేకియాలో పుట్టిన మెలానియా గతంలో ఓ ఫ్యాషన్ మోడల్‌గా పని చేశారు. డొనాల్డ్ ట్రంప్-మెలానియా జంటకు బేరన్ ట్రంప్ ఒక కుమారుడు ఉన్నాడు. 2006 జనవరి 20వ తేదీన బేరన్ ట్రంప్ జన్మించారు. ఇక డొనాల్డ్ ట్రంప్ తొలిసారి అధికారంలోకి వచ్చినపుడు బేరన్ ట్రంప్ వయసు 11 ఏళ్లు కాగా.. ఇప్పుడు 18 ఏళ్ల వయసులో రాజకీయాల్లోకి అడుగుపెట్టారు.

కొన్ని నెలల క్రితం అమెరికా అధ్యక్ష ఎన్నికల ప్రచారంలో పాల్గొన్న డొనాల్డ్ ట్రంప్ మనవరాలు కై ట్రంప్.. ప్రస్తుతం సోషల్‌ మీడియా ఇన్‌ఫ్లుయోన్సర్‌గా మారిపోయింది. అంతేకాకుండా కై ట్రంప్ మంచి గోల్ఫ్‌ క్రీడాకారిణిగా రాణిస్తోంది. ఇక గతంలో వైట్‌హౌస్‌లో తాత ట్రంప్ ఒడిలో కూర్చుని ఫొటోలకు పోజులిచ్చిన మరో మనవడు జోసెఫ్‌కు ఇప్పుడు 11 ఏళ్లు వచ్చాయి.