బంగాళాఖాతంలో అల్పపీడనం.. ఆ జిల్లాలలో పిడుగులు పడే ఛాన్స్

బంగాళాఖాతంలో అల్పపీడనం ఏర్పడింది. దీని ప్రభావంతో ఏపీలో వర్షాలు కురవనున్నట్లు ఏపీ విపత్తుల నిర్వహణ సంస్థ అంచనా వేసింది. అల్పపీడనం ప్రభావంతో వచ్చే మూడు గంటల్లో ఏలూరు, ఎన్టీఆర్, కృష్ణా జిల్లాలలో పలుచోట్ల పిడుగులతో కూడిన మోస్తారు వర్షం పడే అవకాశం ఉందని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ సోమవారం సాయంత్రం తెలిపారు. పిడుగులు పడే అవకాశం ఉన్న నేపథ్యంలో.. ప్రజలంతా అప్రమత్తంగా ఉండాలని సూచించారు. చెట్ల కింద నిలబడరాదని ముందు జాగ్రత్తలు చెప్పారు.

మరోవైపు ఆగ్నేయ బంగాళాఖాతం, దాని పరిసర ప్రాంతాలలో ఉపరితల ఆవర్తన ప్రభావంతో దక్షిణ బంగాళాఖాతం మధ్య ప్రాంతాల్లో అల్పపీడనం ఏర్పడింది. ఇది మంగళవారం నాటికి వాయువ్య దిశగా నైరుతి బంగాళాఖాతం వైపు, ఆ తరువాత 48 గంటల్లో ఉత్తరదిశగా పశ్చిమ మధ్య బంగాళాఖాతం వైపుగా కదిలే అవకాశం ఉందని ఏపీ విపత్తుల నిర్వహణ సంస్థ తెలిపింది.

మరోవైపు అల్పపీడనం ప్రభావంతో ఏపీలో వచ్చే 3 రోజులు వానలు పడనున్నాయి. రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని విశాఖపట్నం వాతావరణ కేంద్రం అధికారులు వెల్లడించారు. అలాగే ఉత్తర కోస్తా, యానాంలో గరిష్ఠ ఉష్ణోగ్రతలు పెరుగుతాయని వాతావరణ శాఖ తెలిపింది. వచ్చే నాలుగు రోజులు గరిష్ట ఉష్ణోగ్రతలు 2 నుంచి 3 డిగ్రీలు పెరుగుతాయని.. ఆ తర్వాత స్వల్పంగా తగ్గే అవకాశం ఉందని వాతావరణ శాఖ అధికారులు తెలిపారు. ఇక దక్షిణ కోస్తా, రాయలసీమ జిల్లాలలోనూ గరిష్ఠంగా 2 నుంచి 4 డిగ్రీలు పెరిగి, ఆ తర్వాత స్వల్పంగా తగ్గే అవకాశముంది.

మరోవైపు రాష్ట్రంలో మరో నాలుగు రోజులు ఇలాంటి భిన్నమైన వాతావరణ పరిస్థితులు కొనసాగుతాయని ఏపీ విపత్తుల నిర్వహణ సంస్థ తెలిపింది. కొన్నిచోట్ల వర్షాలు, కొన్నిచోట్ల ఎండలతో విభిన్నమైన వాతావరణం ఉంటుందని వెల్లడించింది. వాతావరణ పరిస్థితులకు అనుగుణంగా ప్రజలు జాగ్రత్తలు తీసుకోవాలని సూచించింది. కొన్ని ప్రాంతాల్లో ఉష్ణోగ్రతలు పెరగనున్న నేపథ్యంలో.. చిన్నారులు, వృద్ధులు, గర్భిణులు, బాలింతలు జాగ్రత్తలు తీసుకోవాలని సూచించింది. మధ్యాహ్న సమయంలో అవసరమైతేనే బయటకు వెళ్లాలని అధికారులు సూచిస్తున్నారు.