సుమయా రెడ్డి బంధువుల అమ్మాయని.. నీచ రాజకీయాలు చేయొద్దు.... తోపుదుర్తి ప్రకాష్ రెడ్డి ట్వీట్

వైసీపీ అధినేత వైఎస్ జగన్ మోహన్ రెడ్డి రాప్తాడు పర్యటనకు ముందు రాజకీయం వేడెక్కింది. రాప్తాడు వైసీపీ ఇంఛార్జి తోపుదుర్తి ప్రకాష్ రెడ్డికి సంబంధించిన ఓ వీడియో నెట్టింట వైరల్ అవుతోంది. ఎయిర్‌పోర్ట్‌లో హీరోయిన్ సుమయరెడ్డి భుజంపై తోపుదుర్తి ప్రకాష్‌రెడ్డి చేయి వేసి ఉన్న వీడియో నెట్టింట వైరల్ అవుతోంది. అయితే ఈ వైరల్ వీడియోపై అటు తోపుదుర్తి ప్రకాష్ రెడ్డి, ఇటు సుమయరెడ్డి క్లారిటీ ఇచ్చారు. సుమయ రెడ్డి తమ బంధువుల అమ్మాయిగా చెప్పిన తోపుదుర్తి ప్రకాష్ రెడ్డి.. తప్పుడు ఆరోపణలు చేస్తూ నీచ రాజకీయాలు చేస్తున్నారని మండిపడ్డారు. ఈ మేరకు సోషల్ మీడియా మాధ్యమం ఎక్స్ వేదికగా ట్వీట్ చేశారు.

వైఎస్ జగన్ రాప్తాడు నియోజకవర్గంలోని రామగిరి మండలానికి వస్తున్నారన్న తోపుదుర్తి.. టీడీపీ దురాగతాలపై గొంతెత్తేందుకు వేలాది మంది ప్రజలు స్వచ్ఛందంగా వచ్చే అవకాశం ఉందన్నారు. ఇలాంటి పరిస్థితులలో వైఎస్ జగన్‌ను రామగిరి మండలానికి రానివ్వకుండా అడ్డుకునే పరిస్థితి లేకపోవటంతో.. తన సమీప బంధువులు, తన కుటుంబసభ్యులను కూడా నీచపు రాజకీయ క్రీడలోకి లాగుతున్నారని తోపుదుర్తి ఆరోపించారు. ఎయిర్‌పోర్టులో తమ బంధువుల అమ్మాయితో మాట్లాడుతుండగా వీడియో వైరల్ చేసి నీచానికి పాల్పడుతున్నారని తోపుదుర్తి ప్రకాష్ రెడ్డి మండిపడ్డారు.

ఎయిర్‌పోర్టు వీడియోను పోస్టు చేసిన వారిపైనా, వైరల్ చేస్తున్న వారిపైనా పోలీస్ కేసు పెట్టి, చట్టపరమైన చర్యలు తీసుకుంటామని తోపుదుర్తి ప్రకాష్ రెడ్డి స్పష్టం చేశారు. 25 సంవత్సరాల తన రాజకీయ జీవితంలో తాను సంపాదించుకున్న గౌరవ మర్యాదలకు ఇలాంటి విష ప్రచారంతో నష్టం కలిగించాలనే దుర్మార్గమైన ఆలోచనలను ప్రజలు నమ్మరని తోపుదుర్తి ప్రకాష్‌రెడ్డి ట్వీట్‌లో పేర్కొన్నారు. మీ వైఫల్యాలను కప్పిపుచ్చుకోవడానికి.. నిజాయితీతో రాప్తాడు నియోజకవర్గంలో పేదలకు సేవలు చేస్తున్న తనపై బురదజల్లే కార్యక్రమాలతో ఎలాంటి ఉపయోగం ఉండదని అన్నారు. ఇలాంటి పనులతో మీరు గొప్పవారు కాలేరంటూ తోపుదుర్తి ప్రకాష్ రెడ్డి ట్వీట్ చేశారు.

మరోవైపు ఈ వ్యవహారంపై హీరోయిన్ సుమయా రెడ్డి కూడా వీడియో విడుదల చేశారు. తోపుదుర్తి ప్రకాష్ రెడ్డి కుటుంబానికి, తమ కుటుంబానికి సన్నిహిత సంబంధాలు ఉన్నాయని.. ఇలాంటి తప్పుడు ప్రచారం ద్వారా తమ ప్రతిష్టకు భంగం కలిగించవద్దని ఆమె విజ్ఞప్తి చేశారు. మరోవైపు సుమయా రెడ్డి, తోపుదుర్తి ప్రకాష్ రెడ్డికి కూతురు వరుస అవుతారని తెలుస్తోంది.