కాషాయ జెండాలతో ఘాజీ మియాన్ దర్గాపైకి ఎక్కి... జైశ్రీరామ్ నినాదాలతో హంగామా

శ్రీరామ నవమి సందర్భంగా ఉత్తర్‌ ప్రదేశ్‌లోని ప్రయాగ్‌రాజ్‌లో హిందూ రైట్ వింగ్‌కు చెందిన కొందరు నానా హంగామా సృష్టించారు. సికంద్రా ప్రాంతంలోని సలార్ మసూద్ ఘాజీ మియాన్ దర్గాపైకి ఎక్కి హల్చల్ చేశారు. ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది. స్థానిక మీడియా కథనం ప్రకారం.. ఏప్రిల్ 6న మధ్యాహ్నం సమయంలో కాషాయ జెండాలు పట్టుకుని.. ప్రయాగ్‌రాజ్‌లోని గంగానగర్ జోన్‌లోని అకస్మాత్తుగా ఘాజీ మియాన్ దర్గా డోమ్‌పైకి ఎక్కారు. అనంతరం జెండాలు ఊపుతూ జైశ్రీరామ్ నినాదాలు చేశారు.

వైరల్ అవుతోన్న వీడియోలో ముగ్గురు వ్యక్తులు కాషాయ జెండాలతో దర్గా డోమ్‌కు చేరుకోగా.. కింద పది మందికి పైగా వ్యక్తులు నిలబడి నినాదాలు చేస్తున్నారు. బైకులతో దర్గాకు చేరుకున్న వీరు.. పోలీస్‌లు వచ్చేసరికి అక్కడి నుంచి తప్పించుకున్నారు. నిందితుల్లో ఒకర్ని మనేంద్ర ప్రతాప్ సింగ్ అనే వ్యక్తిగా గుర్తించారు. ఫేస్‌బుక్‌ ప్రొఫైల్‌లో కర్ణి సేన రాష్ట్ర మాజీ అధ్యక్షుడు, అలహాబాద్ యూనివర్సిటీ విద్యార్థి నేత, బీజేపీ నాయకుడిగా పేర్కొన్నాడు. ఈ ఘటనకు సంబంధించిన వీడియోను తన ఫేస్‌బుక్‌లో పోస్టు చేశాడు. ఆ పోస్టులో సలార్ మసూద్ ఘాజీ ఓ ఆక్రమణదారుడు అని, ప్రయాగ్‌రాజ్ వంటి పవిత్ర నగరంలో అతని దర్గా ఉండకూడదని, వెంటనే అది కూల్చేయాలని డిమాండ్ చేశాడు.

ఈ ఘటనపై పోలీసులు కేసు నమోదుచేసి దర్యాప్తు చేస్తున్నారు. గంగా నగర్ డిప్యూటీ పోలీస్ కమిషనర్ (DCP) కుల్దీప్ సింగ్ గుణావత్ మాట్లాడుతూ.. కొంతమంది శాంతి భద్రతలకు విఘాతం కలిగిస్తూ దర్గాపై కాషాయ జెండాలు ఊపుతూ నినాదాలు చేశారని తెలిపారు. ఆ ప్రాంతంలో భద్రత విధుల్లో ఉన్న పోలీసులపై శాఖాపరమైన చర్యలు తీసుకుంటున్నట్లు తెలిపారు. కాగా, ఘాజీ మియాన్ దర్గాలో ఐదు ప్రార్థనా స్థలాలు ఉన్నాయి. అక్కడకు హిందూ, ముస్లిం భక్తులు ఇద్దరూ చాదర్ సమర్పించేందుకు వస్తారు. ఈ ఘటనపై సమగ్ర విచారణ అనంతరం చట్టపరమైన చర్యలు తీసుకుంటామని అధికారులు పేర్కొన్నారు. మతవిద్వేషాలను రెచ్చగొట్టేలా వ్యవహరించారని అన్నారు.