ట్రంప్‌ హత్య‌కు డబ్బుల కోసం.. తల్లిదండ్రులను హత్యచేసిన యువకుడు

అమెరికా అధ్యక్షుడు డొనాల్డ్ ట్రంప్‌ హత్యకు ఆర్ధిక సహాయం పొందడానికి తన తల్లిదండ్రులను టీనేజర్ హత్యచేసిన ఘటన ఆలస్యంగా వెలుగులోకి వచ్చింది. తల్లిదండ్రుల హత్య కేసులో నిందితుడిగా ఉన్న విస్కాన్సిన్‌కు చెందిన 17 ఏళ్ల టీనేజర్ నికితా కాసాప్... వారిని కాల్చిచంపినట్టు ఆరోపణలు ఎదుర్కొంటున్నారు. ఫెడరల్ వారెంట్ ప్రకారం ఈ హత్యలను ఆర్థిక సహాయాన్ని పొందడానికి, అమెరికా అధ్యక్షుడు డొనాల్డ్ ట్రంప్‌ను హత్య చేయడమూ, ప్రభుత్వాన్ని కూలదోయాలనే ఉదేశంతో చేశాడని ఆరోపణలు ఉన్నాయి..

నిందితుడు నికితా కాసాప్.. గత నెలలో మిల్వాకీ శివార్లలో ఉన్న తన ఇంట్లో తల్లి తాతియానా కాసాప్ (35), తన సవతి తండ్రి డొనాల్డ్ మేయర్ (51)ను కాల్చిచంపినట్లు వౌకేషా కౌంటీ అధికారులు ఆరోపించారు. హత్యల అనంతరం కొద్ది రోజుల పాటు మృతదేహాలతోనే ఆ ఇంట్లోనే ఉన్నాడని,. అనంతరం 14,000 డాలర్లు నగదు, పాస్‌పోర్టులు, తన కుక్కను తీసుకొని పరారయ్యాడని చెప్పారు. ఈ ఘటనపై కేసు నమోదుచేసిన పోలీసులు.. కాసాప్‌ను కెన్సాస్‌లో అరెస్ట్ చేశారు.

ప్రస్తుతం వౌకేషా కౌంటీ జైలులో ఉన్న అతడ్ని.. వచ్చే నెల కోర్టు విచారణకు హాజరుపరచనున్నారు. ఇటీవల వెలుగులోకి వచ్చిన ఎఫ్‌బీఐ వారెంట్ ప్రకారం.. తన తల్లిదండ్రులను అతడు ఉద్దేశపూర్వకంగా హత్య చేసి.. డ్రోన్, పేలుడు పదార్థాలను కొనుగోలు చేశాడు. రష్యన్ మాట్లాడే వ్యక్తితో కూడా ఈ కుట్ర గురించి పంచుకున్నాడు.

ఫెడరల్ అధికారులు తెలిపిన వివరాల ప్రకారం.. యూదులను ద్వేషిస్తూ.. హిట్లర్‌ను ప్రశంసిస్తూ ట్రంప్‌ను హత్య చేయాలని అతడు మూడు పేజీల మ్యానిఫెస్టో రాశాడు. టిక్‌టాక్, టెలిగ్రామ్ యాప్‌లలో దీనిని ఇతరులతో పంచుకున్నట్లు తెలిపారు. ప్రభుత్వాన్ని కూలదోసే ఉద్దేశంతో తన తల్లిదండ్రులను హత్య చేసి ఆర్థిక స్వాతంత్ర్యం పొందాలనుకున్నాడని వెల్లడించారు. రష్యన్ మాట్లాడే వ్యక్తితో టచ్‌లో ఉన్న కాసౌప్. ఉక్రెయిన్‌కు పారిపోవాలనే పథకాన్ని అతడితో పంచుకున్నాడని అధికారులు వివరించారు. చివరకు కెన్సాస్‌లో కారు, డబ్బు, పాస్‌పోర్టులు, కుక్కతో సహా అతడ్ని పట్టుకున్నామని పేర్కొన్నారు.

ట్రంప్‌ను ఎందుకు హత్య చేయాలనుకుంటున్నాడో, ఉక్రెయిన్‌లో ఎలా జీవించాలనుకుంటున్నాడో కాసౌప్ తన ప్లాన్ నోట్‌లో స్పష్టంగా రాశాడు. ‘అధ్యక్షుడు లేదా ఉపాధ్యక్షుడిని హతమార్చి ప్రభుత్వాన్ని కూలదోసే ప్రయత్నం చేయాలనుకున్నాడు’ ఫెడరల్ వారెంట్‌లో వెల్లడించారు. కాసాప్‌ తరఫు లాయర్ మాత్రం అతడి వయస్సును దృష్టిలో ఉంచుకుని.. ఈ ఆరోపణలను రద్దు చేయాలని కోర్టుకు విజ్ఞప్తి చేశారు. కాగా, టీనేజర్‌పై మృతదేహాలను దాచడం, దొంగతనం, డబ్బు కోసం ఐడెంటిటీ వాడటం వంటి అభియోగాలు నమోదుచేశారు .

ఫిబ్రవరి 28న పోలీసులకు కుటుంబసభ్యులు ఫిర్యాదు చేయడంతో తాతియానా కాసాప్, డొనాల్డ్ మేయర్ మృతదేహాలు వెలుగుచూశాయి. అప్పటికే కొన్ని వారాల క్రితమే హత్యకు గురైనట్టు అధికారులు అనుమానిస్తున్నారు. మృతదేహాలు కుళ్లిపోవడంతో దంతాల ఆధారంగా గుర్తించారు.