ఒంటరి అబ్బాయిలే టార్గెట్‌గా యువతులతో వైల్డ్ హార్ట్ పబ్బులో అలాంటి పనులు

హైదరాబాద్‌లో పబ్ కల్చర్ రోజు రోజుకు పెరిగిపోతోంది. ఇదే ఆసరాగా తీసుకుని కొన్ని పబ్ యాజమాన్యాలు.. కస్టమర్లను ఆకర్షించేందుకు రకరకాల పద్ధతులను అనుసరిస్తున్నారు. ఇందులో భాగంగానే.. చైతన్యపురి ప్రాంతంలో ఉన్న ప్రముఖ వైల్డ్ హార్ట్ పబ్‌ సాగిస్తున్న గలీజు దందా బయటపడింది. శనివారం (ఏప్రిల్ 12న) రోజు అర్ధరాత్రి పోలీసులు పబ్ మీద దాడి చేశారు. పబ్‌లో అర్ధనగ్న నృత్యాలు, అసభ్యకర కార్యక్రమాలతో పాటు నిబంధనల ఉల్లంఘనలు జరుగుతున్నట్లు విశ్వసనీయ సమాచారం అందడంతో పోలీసులు తక్షణమే రంగంలోకి దిగారు.

చైతన్యపురి పోలీస్ స్టేషన్ పరిధిలోని ఈ పబ్‌లో అసాంఘిక కార్యకలాపాలు జరుగుతున్నట్లు నిర్ధారణ కావడంతో.. పోలీసులు పక్కా ప్రణాళికతో దాడి చేశారు. పబ్‌కు ఒంటరిగా వచ్చే కస్టమర్లను లక్ష్యంగా చేసుకుని, వారి వద్దకు యువతులను పంపించి, మద్యం మత్తులో బిల్లులు పెరిగేలా చేసి మోసపూరితంగా డబ్బు వసూలు చేస్తున్నట్లు పోలీసుల విచారణలో తేలింది.

పబ్ యాజమాన్యం రాత్రి వేళ అనుమతి ఉన్న సమయాన్ని దాటి కూడా పబ్‌ను నిర్వహిస్తున్నట్లు పోలీసులు గుర్తించారు. అంతేకాకుండా, ముంబై నుంచి ప్రత్యేకంగా యువతులను రప్పించి, వారిచే అభ్యంతరకరంగా, అర్ధనగ్నంగా నృత్యాలు చేయిస్తూ వినోద కార్యక్రమాలు నిర్వహిస్తున్నట్లు పోలీసుల దర్యాప్తులో వెల్లడైంది. ఈ దాడిలో పోలీసులు మొత్తం 17 మంది యువతులను అదుపులోకి తీసుకుని వారి వివరాలను నమోదు చేశారు. పబ్ యజమానితో పాటు అక్కడ ఉన్న పలువురు కస్టమర్లను కూడా పోలీసులు అరెస్టు చేశారు. పబ్ యాజమాన్యం నిబంధనలను పాటించకపోవడం, పబ్ నిబంధనలను ఉల్లంఘించడం వంటి అంశాలపై పోలీసులు కేసు నమోదు చేసి, యాజమాన్యానికి నోటీసులు జారీ చేశారు.

ఈ ఘటనపై చైతన్యపురి సీఐ మాట్లాడుతూ.. పబ్ నిబంధనలను ఉల్లంఘించడం, అక్కడ జరుగుతున్న అనుచిత కార్యకలాపాల గురించి తమ దృష్టికి వచ్చిన వెంటనే చర్యలు తీసుకున్నామని తెలిపారు. కేసు నమోదు చేసి పూర్తిస్థాయి దర్యాప్తు కొనసాగుతుందని వెల్లడించారు. నగరంలో ఇటువంటి అక్రమ నైట్‌ క్లబ్‌లు, పబ్‌లపై కఠిన చర్యలు తీసుకోవాలని స్థానిక ప్రజలు అధికారులను డిమాండ్ చేస్తున్నారు. ఈ ఘటనతో చైతన్యపురి ప్రాంతంలో కలకలం రేగింది.