ఇజ్రాయెల్ భీకర దాడులతో భయంలో సుప్రీం లీడర్ ఖమేనీ

ఇరాన్ సైనిక స్థావరాలు, చమురు క్షేత్రాలు, అణుశుద్ధి కేంద్రాలను లక్ష్యంగా చేసుకుని ఇజ్రాయెల్ తీవ్ర స్థాయిలో దాడులు చేస్తోంది. ఈ దాడులతో టెహ్రాన్‌లోని పలు కీలక ప్రాంతాలు తీవ్రంగా ధ్వంసం అయ్యాయి. ఈక్రమంలోనే ఇరాన్ సుప్రీం లీడర్ అయతొల్లా అలీ ఖమేనీని అధికారులు సురక్షిత ప్రాంతాలకు తరలించినట్లు తెలుస్తోంది. ఈశాన్య టెహ్రాన్‌లోని అండర్ గ్రౌండ్ బంకర్‌లో ఖమేనీ కుటుంబంతో కలిసి తలదాచుకున్నట్లు పెద్ద ఎత్తున వార్తలు వస్తున్నాయి.

ఇరాన్-ఇజ్రాయెల్ మధ్య తీవ్ర ఉద్రిక్తతలు పెరుగుతున్న సమయంలో ఖమేనీ తన కుటుంబంతో సహా టెహ్రాన్‌లోని ఒక రహస్య ప్రదేశానికి తరలి వెళ్లారని తెలుస్తోంది. ముఖ్యంగా ఆయన ప్రస్తుతం ఓ బంకర్‌లో తలదాచుకుంటున్నట్లు వార్తలు వస్తున్నాయి. ముఖ్యంగా ఖమేనీ కుమారుడు మొజ్తబా కూడా లావిజాన్ అనే సురక్షితమైన ప్రదేశంలోనే ఉన్నారని సమాచారం. ఇజ్రాయెల్ గతంలో దాడులు చేసినప్పుడు కూడా ఖమేనీ ఇలాంటి బంకర్‌కు వెళ్లారు. గత నాలుగు రోజులుగా ఇజ్రాయెల్ జరిపిన దాడుల్లో 200 మందికి పైగా ఇరానియన్లు మరణించారని, వారిలో ఎక్కువ మంది సాధారణ పౌరులే ఉన్నారని ఇరాన్ ఆరోగ్య మంత్రిత్వ శాఖ తెలిపింది.

 మరోవైపు ఇరాన్ అణు, బాలిస్టిక్ క్షిపణి కార్యక్రమాలను నాశనం చేయడానికే ఈ దాడులు చేస్తున్నామని ఇజ్రాయెల్ పేర్కొంది. ఇటీవలే మష్హద్ నగరంపై దాడి చేయగా.. ఇది ఖమేనీకి ఒక హెచ్చరికగా ఇరాన్ అధికారులు భావిస్తున్నారు. ముఖ్యంగా ఇరాన్‌లో ఎక్కడా సురక్షితం లేదని నిరూపించడానికే ఇజ్రాయెల్ ఈ దాడి చేసిందని అంటున్నారు. ఒక దౌత్యవేత్త ఇరాన్ ఇంటర్నేషనల్‌తో మాట్లాడుతూ.. మొదటి రోజు చేసిన దాడిలోనే ఖమేనీని చంపే అవకాశం ఇజ్రాయెల్‌కు వచ్చిందని, కానీ ఇరాన్ యురేనియం శుద్ధి కార్యక్రమాన్ని ఆపడానికి చివరగా అవకాశం ఇవ్వాలని నిర్ణయించుకుందని తెలిపారు.

అయితే ఇరాన్ తన వ్యూహాన్ని మార్చుకుని మొదటి సారిగా పగటి పూట ఇజ్రాయెల్‌పై క్షిపణులతో దాడి చేసింది. ఆదివారం నాడు టెల్ అవీవ్‌లో పేలుళ్లు సంభవించాయి. ఇరాన్ క్షిపణులు హైఫా, దక్షిణ ఇజ్రాయెల్‌లోని నివాస ప్రాంతాలపై కూడా పడ్డాయి. దీంతో టెల్ అవీవ్ సమీపంలోని బాట్ యామ్ నగరంలోని ప్రజలు తీవ్ర భయాందోళనకు గురవుతున్నారు. ముందు రోజు రాత్రి ఒక అపార్ట్‌మెంట్ భవనంపై దాడి చేయడంతో.. రాత్రుళ్లు నిద్ర పోవడానికే వణికిపోతున్నారు. ప్రాణాలు అరచేత పట్టుకుని జీవిస్తున్నారు. వాషింగ్టన్‌లో ఇద్దరు US అధికారులు రాయిటర్స్‌తో మాట్లాడుతూ.. ఖమేనీని హత్య చేయడానికి ఇజ్రాయెల్ వేసిన ప్రణాళికను డొనాల్డ్ ట్రంప్ ఇటీవల అడ్డుకున్నారని చెప్పారు.