బట్టలపై నూనె మరకలు పోగొట్టే సింపుల్ చిట్కా

కాస్ట్ లీ కుర్తా కొనుకున్నారు. ఏదో ఫుడ్ తింటుంటే సడెన్ గా ఆయిల్ మరక అంటింది. ఎంత బాధగా అనిపిస్తుందో కదా. ఖరీదైన పట్టు చీర కొన్నారు. దాని పైనా అనుకోకుండా నూనె పడింది. అయ్యో అనిపిస్తుంది. ఇలాంటి సందర్భాలు చాలానే వస్తాయి. ఎంతో ధర పెట్టి కొన్న షర్ట్స్, ప్యాంట్స్ పైన ఇలా మరకలు పడితే చాలా బాధగా ఉంటుంది. పైగా నూనె మరకలు అంత త్వరగా పోవు. జిడ్డు వదలాలంటే రెండు మూడు సార్లు ఉతకాల్సిందే. పోనీ అలా ఉతికినా కొన్ని సార్లు మరక అలాగే ఉండిపోతుంది. అలాంటప్పుడే ఇప్పుడు చెప్పే కొన్ని సింపుల్ చిట్కాలు పాటించాలి. పెద్దగా శ్రమ పడాల్సిన పని లేకుండా సులువుగా వీటిని వదలించుకోవచ్చు. మరి ఆ చిట్కాలేంటి. ఏం చేస్తే బట్టలపైన పడిన నూనె మరకలు వదులుతాయో చూద్దాం.

నూనె మరకలు

నూనె మరకలు పోగొట్టే చిట్కాలలో అత్యంత సులువైన చిట్కాల గురించి చెప్పుకుందాం. అందులో మొట్ట మొదటిది పౌడర్ చిట్కా. ఎలాంటి శ్రమ లేకుండా నిముషాల్లోనే మరక తొలగించుకోవచ్చు. అదెలాగో తెలుసుకోండి. డ్రెస్ పై ఎక్కడైతే మరక పడిందో ఆ చోటుని ఎక్కువగా తాకకుండా అలాగే ఉంచాలి. ఇంట్లో రోజూ వాడే ఫేస్ పౌడర్ తీసుకోవాలి. ఎక్కడైతే మరక ఉంటుందో అక్కడ ఎక్కువ మొత్తంలో పౌడర్ పోయాలి. అలా పోసిన వెంటనే చాలా సేపటి వరకూ పౌడర్ స్ప్రెడ్ చేయాలి. అంటే..మరకపై పూర్తిగా పౌడర్ ఇంకేంత వరకూ స్ప్రెడ్ చేయడం మంచిది. ఇలా కనీసం ఓ నిముషం లేదా రెండు నిముషాల పాటు చేయాలి. ఇలా చేసిన తరవాత పౌడర్ ని అలాగే ఉంచాలి. పౌడర్ తో స్క్రబ్ చేయడం వల్ల నూనె అంతా పౌడర్ కి అంటుకుంటుంది. ఓ 5 నిముషాల తరవాత పౌడర్ అంతా తీసేసి ఓ సారి క్లాథ్ ని మామూలుగా రబ్ చేస్తే సరిపోతుంది. అలా కాసేపట్లోనే నూన మరక తొలగిపోతుంది.

మరో చిట్కా

నూనె మరకలు పోగొట్టేందుకు మరో చిట్కా కూడా ఉంది. ఈ చిట్కాలోనూ పౌడర్ వాడవచ్చు. కాకపోతే ఈసారి మరో విధంగా ఈ చిట్కా పాటించాల్సి ఉంటుంది. అదెలాగో చూద్దాం. అయితే..ఈ చిట్కా కోసం పౌడర్ తో పాటు మరి కొన్ని పదార్థాలు కూడా వాడాలి. అవేంటంటే డిటర్జెంట్ లిక్విడ్, టూత్ బ్రష్, వాటర్, ఓ బుక్. ఈ నాలుగు పదార్థాలతో చాలా సులువుగా నూనె మరకలు తొలగించుకోవచ్చు. పౌడర్ మరక పోగొట్టేందుకు ఉపయోగపడుతుంది. ఇక బ్రష్ విషయానికొస్తే..దీని వల్ల మరకను డీప్ క్లీన్ చేసేందుకు వీలవుతుంది. ఇక డిటర్జెంట్ వల్ల జిడ్డుదనం అసలు కనిపించకుండా పోతుంది. బుక్ వాడడానికి కూడా ఓ కారణం ఉంది. మరి వీటిని ఎలా వాడితే మరక వదులుతుంది. ఈ ప్రాసెస్ ఏంటో సరిగ్గా తెలుసుకుందాం.

ఎలా వాడాలంటే

ముందుగా ఎక్కడైతే మరక ఉందో సరిగ్గా అక్కడే క్లాథ్ కింద బుక్ పెట్టాలి. క్లాథ్ అటూ ఇటూ కదలకుండా ఉండేందుకు చేసే ఏర్పాటు ఇది. ఆ తరవాత నూనె మరక ఉన్న చోట పౌడర్ ఎక్కువగా పోయాలి. ఈ పౌడర్ పూర్తిగా ఎక్స్ పాండ్ అయ్యేంత వరకూ చేతితో స్క్రబ్ చేయాలి. ఆ తరవాత ఆ క్లాత్ ని అలాగే రెండు గంటల పాటు ఉంచాలి. ఇలా చేయడం వల్ల మరక త్వరగా వదిలేందుకు వీలుంటుంది. ఆ తరవాత పౌడర్ అంతా తొలగించాలి. ఓ మూత లేదా అర మూత డిటర్జెంట్ లిక్విడ్ ఆ మరకపైన పోయాలి. ముందే తీసి పెట్టుకున్న టూత్ బ్రష్ తో మెల్లగా స్క్రబ్ చేయాలి. ఆ తరవాత నీటిలో ఈ క్లాథ్ ని ముంచాలి. సరైన విధంగా నలిచి బాగా పిండాలి. ఆరిపోయిన తరవాత చూస్తే మీకు మరక కనిపించనే కనిపించదు. ఇలా కాసేపట్లోనే నూనె మరక తొలగిపోతుంది.

మరో రకంగా కూడా

పౌడర్ తో ఈ మరకలు ఎలా పోగొట్టవచ్చో తెలుసుకున్నాం. ఇప్పుడు అదే విధంగా బేకింగ్ సోడాతో ఈ మరకలు ఎలా తొలగించుకోవచ్చో చూద్దాం. ఈ చిట్కా పాటించడం కోసం బేకింగ్ సోడాతో పాటుగా డిష్ వాష్ లిక్విడ్ కూడా అవసరం అవుతుంది. ముందుగా ఆయిల్ మరకపై ఓ టేబుల్ స్పూన్ బేకింగ్ సోడా వేయాలి. తరవాత దానిపై డిష్ వాష్ లిక్విడ్ రెండు మూడు చుక్కలు వేయాలి. తరవాత నిమ్మకాయ సగం చెక్క పిండాలి. ఇలా చేయడం వల్ల వెంటనే నురగ వస్తుంది. తరవాత ఓ సాఫ్ట్ బ్రష్ తీసుకుని బాగా రబ్ చేయాలి. ఇలా చేస్తే సులువుగా జిడ్డు వదులుతుంది. ఇప్పుడు క్లాథ్ ని నీటితో బాగా శుభ్రం చేయాలి. లేదా వాషింగ్ మెషీన్ లో వేసి ఉతకవచ్చు. ఎలా చేసినా సరే చాలా సులువుగా నూనె మరక వదిలిపోతుంది.

ఇలా కూడా చేయచ్చు

దుస్తులపై నూనె మరకలు పోగొట్టడానికి పౌడర్ తో పాటు ఐరన్ బాక్స్, టిష్యూ పేపర్స్ ఉంటే చాలు. ఈ చిట్కా కూడా బాగా పని చేస్తుంది. ముందుగా టాల్కమ్ పౌడర్ ని మరకలపై బాగా రబ్ చేయాలి. తరవాత డ్రెస్ పైన, కింద టిష్యూ పేపర్స్ పెట్టాలి. సరిగ్గా మరక ఎక్కడైతే ఉంటుందో అక్కడే పేపర్స్ వాడాలి. ఇలా పేపర్స్ పెట్టిన తరవాత వాటిపైనే ఐరన్ బాక్స్ తో ఇస్త్రీ చేయాలి. ఇలా చేస్తే మరక దాదాపు వదిలిపోతుంది. ఆ తరవాత రెగ్యులర్ గా వాడే డిటర్జెంట్ లిక్విడ్ వేసి నీటితో శుభ్రం చేయాలి. ఇలా కాసేపట్లోనే నూనె మరకలు తొలగిపోతాయి.