ఏపీ ప్రభుత్వం ఆగస్ట్ 15 కానుక.. ఆశా కార్యకర్తలకు 180 రోజులు వేతనంతో కూడిన ప్రసూతి సెలవులు

ఆశా వర్కర్లకు ఏపీ ప్రభుత్వం గుడ్ న్యూస్ వినిపించింది. ఆగస్ట్ 15 సందర్భంగా ఆశా కార్యకర్తలకు ఏకంగా మూడు శుభవార్తలు చెప్పింది. ఆశా కార్యకర్తల సంక్షేమం కోసం ఆంధ్రప్రదేశ్ ప్రభుత్వం మూడు ముఖ్యమైన నిర్ణయాలు తీసుకుంది. దీనికి సంబంధించిన ఉత్తర్వులను తాజాగా జారీ చేశారు. ఆశా కార్యకర్తల ప్రసూతి సెలవుల విషయంలో ఏపీ ప్రభుత్వం కీలక నిర్ణయం తీసుకుంది. ఆశా కార్యకర్తలు అందరికీ మొదటి రెండు ప్రసవాల కోసం 180 రోజులు పూర్తి జీతంతో ప్రసూతి సెలవులు (Paid Maternity Leaves) ఇవ్వాలని నిర్ణయించింది. అలాగే ఆశా వర్కర్ల పదవీ విరమణ వయసును 62 ఏళ్లుగా నిర్ణయించారు. వీటితో పాటుగా ఆశా కార్యకర్తల గ్రాట్యూటీ విషయంలోనూ ఏపీ ప్రభుత్వం కీలక నిర్ణయం తీసుకుంది. సర్వీస్ పూర్తైన ఆశా కార్యకర్తలకు గ్రాట్యుటీ సంవత్సరానికి నెలవారీ గౌరవ వేతనంలో 50 శాతం అంటే 5,000 చెల్లిస్తారు..గరిష్టంగా మొత్తం రూ.1,50,000 వరకు ఇస్తారు. ఈ మేరకు ఆంధ్రప్రదేశ్ ప్రభుత్వ ప్రత్యేక కార్యదర్శి ఎం.టీ. కృష్ణబాబు ఉత్తర్వులు జారీ చేశారు.

మరోవైపు 2024 ఏపీ ఎన్నికల సందర్భంగా ఆశా కార్యకర్తలకు మిగతా ప్రభుత్వ ఉద్యోగుల తరహాలోనే వేతనంతో కూడిన ప్రసూతి సెలవులు ఇస్తామని చంద్రబాబు హామీ ఇచ్చారు. అలాగే గ్రాట్యుటీ, ఉద్యోగ విరమణ వయసు పెంపుపైనా వారికి హామీలు ఇచ్చారు. ఈ నేపథ్యంలో ఈ ఏడాది మార్చి నెలలో ఆరోగ్య శాఖపై జరిగిన సమీక్షా సమావేశంలో సీఎం నారా చంద్రబాబు నాయుడు వీటిపై నిర్ణయం తీసుకున్నా్రు. ఆంధ్రప్రదేశ్ వ్యాప్తంగా సుమారుగా 42,752 మంది ఆశా వర్కర్లు పనిచేస్తున్నారు. గ్రామీణ ప్రాంతాల్లో 37 వేల మంది ఆశా కార్యకర్తలు పనిచేస్తూ ఉంటే.. పట్టణ ప్రాంతాల్లో 5,735 మంది ప్రజలకు సేవలందిస్తున్నారు. గర్భిణులు, చిన్నారుల ఆరోగ్య సంరక్షణలో ఆశా కార్యకర్తలదే కీలక పాత్ర.

అయితే ప్రజారోగ్య సంరక్షణలో కీలకంగా ఉండే ఆశా వర్కర్లకు ప్రభుత్వం ప్రతి నెలా రూ.10000 చొప్పున వేతనం అందిస్తున్న సంగతి తెలిసిందే. అయితే ప్రభుత్వం అందించే గౌరవ వేతనాలు తప్ప వారికి అదనపు ఆర్థిక ప్రయోజనాలు లేవు. ఈ నేపథ్యంలోనే ఆశా కార్యకర్తగా 30 ఏళ్లపాటు సేవలు అందించిన వారికి గ్రాట్యుటీ కింద రూ.1.50 లక్షలు వరకూ చెల్లించేందుకు మార్చి నెలలోనే సీఎం చంద్రబాబు ఆమోదం తెలిపారు.

అలాగే ఆశా కార్యకర్తలకు వేతనంతో కూడిన ప్రసూతి సెలవులు ఇచ్చేందుకు ఆమోదం తెలిపారు. తొలి కాన్పు సమయంలో మూడు నెలలు, రెండో కాన్పు సమయంలో మరో మూడు నెలలు వేతనంతో కూడిన ప్రసూతి సెలువులు ఇచ్చేందుకు అంగీకారం తెలిపారు. ఇక ఆశా వర్కర్ల ఉద్యోగ విరమణ వయసును కూడా 60 సంవత్సరాల నుంచి 62 ఏళ్లకు పెంచుతూ అప్పట్లో నిర్ణయించారు. ఈ మూడు నిర్ణయాలకు సంబంధించి ఏపీ ప్రభుత్వం నుంచి తాజాగా ఉత్తర్వులు విడుదల అయ్యాయి.