'డ్రాప్‌బాక్స్' రద్దుతో అమెరికా వెళ్లాలనుకునేవారికి మరిన్ని కష్టాలు

అమెరికా వెళ్లాలనుకునే భారతీయ ఐటీ నిపుణులకు అమెరికా సర్కారు మరో చేదు వార్త తెలిపింది. ముఖ్యంగా హెచ్-1బీ వీసా నిబంధనల్లో ముఖ్యమైన మార్పును తీసుకు వచ్చింది. ఇకపై వీసా దరఖాస్తుదారులు వ్యక్తిగతంగా ఇంటర్వ్యూలకు హాజరుకావడం తప్పనిసరి చేసింది. గతంలో ఉన్న ఇంటర్వ్యూ వేవర్ ప్రోగ్రామ్ లేదా డ్రాప్‌బాక్స్ సదుపాయాన్ని సెప్టెంబర్ 2వ తేదీ నుంచి అమెరికా పూర్తిగా రద్దు చేయబోతుంది. ఈ నిర్ణయం ప్రధానంగా హెచ్-1బీ వీసాల కోసం దరఖాస్తు చేసుకునే భారతీయ టెకీ ఉద్యోగులపై తీవ్ర ప్రభావం చూపుతుందని నిపుణులు అంచనా వేస్తున్నారు.

డ్రాప్‍బాక్స్ అంటే ఏమిటి..?

ఇప్పటి వరకు కొంతమంది వీసా దరఖాస్తుదారులు తమ వీసాను పునరుద్ధరించుకోవడానికి, కొత్త వీసా పొందడానికి వ్యక్తిగత ఇంటర్వ్యూకు హాజరుకావాల్సిన అవసరం ఉండేది కాదు. బదులుగా వారు తమ పత్రాలను నేరుగా అమెరికా రాయబార కార్యాలయాల్లోని డ్రాప్‌బాక్స్ ద్వారా సమర్పించేవారు. ఈ ప్రక్రియ చాలా వేగవంతంగా, సులభంగా ఉండేది. అయితే కొత్త నిబంధనల ప్రకారం.. మెజారిటీ దరఖాస్తుదారులు తప్పనిసరిగా ఇంటర్వ్యూకు హాజరుకావాల్సి ఉంటుంది. ఈ మార్పు వల్ల వీసా అపాయింట్‌మెంట్‌ల కోసం నిరీక్షణ సమయం పెరుగుతుందని, ఇది దరఖాస్తుదారులకు అనేక ఇబ్బందులను కలిగిస్తుందని నిపుణులు హెచ్చరిస్తున్నారు.

అమెరికా హెచ్-1బీ వీసా దరఖాస్తుదారులలో అత్యధిక శాతం భారతీయులే. 2022లో జారీ అయిన మొత్తం హెచ్-1బీ వీసాలలో 77 శాతం భారతీయ నిపుణులకే లభించగా.. 2023 ఆర్థిక సంవత్సరంలో ఇది 72.3 శాతంగా ఉంది. ఈ గణాంకాలు చూస్తుంటేనే.. కొత్త నిబంధనలు ఎంతమంది భారతీయ టెకీలపై ప్రభావం చూపనుందో అర్థం అవుతోంది. సిలికాన్ వ్యాలీలోని గూగుల్, మెటా వంటి పెద్ద టెక్ కంపెనీలు కూడా భారతీయ నిపుణులపై ఎక్కువగా ఆధారపడి ఉంటాయి. కాబట్టి ఈ నిర్ణయం వారి వ్యాపార కార్యకలాపాలపైనా ప్రభావం చూపే అవకాశం ఉంది.

కొత్త నిబంధనల వల్ల ఎదురయ్యే సవాళ్లు..

నిరీక్షణ సమయం: వ్యక్తిగత ఇంటర్వ్యూలు తప్పనిసరి కావడంతో అపాయింట్‍మెంట్ స్లాట్‍ల కోసం నెలల తరబడి వేచి ఉండాల్సి వస్తుంది.

ప్రయాణ ఖర్చులు: వీసా ప్రక్రియ కోసం దరఖాస్తుదారులు భారత్‍‌కు వెళ్లడం, తిరిగి రావడం వంటి ప్రయాణాల వల్ల ఆర్థిక భారం పెరుగుతుంది.

ఉద్యోగ భద్రత: వీసా పునరుద్ధరణ కోసం భారత్‌కు వచ్చి ఇంటర్వ్యూల కోసం ఎక్కువ కాలం వేచి ఉండాల్సి వస్తే.. అమెరికాలోని తమ ఉద్యోగాలకు సరైన సమయంలో తిరిగి వెళ్లలేకపోవచ్చని, ఇది వారి ఉద్యోగ భద్రతకు ప్రమాదమని నిపుణులు చెబుతున్నారు.

అయితే కొన్ని ప్రత్యేక సందర్భాల్లో మాత్రం ఇంటర్వ్యూల నుంచి మినహాయింపు ఉంటుంది. దౌత్య వీసాలు, అలాగే బి-1, బి-2 వీసాలను పునరుద్ధరించుకునే కొంతమంది దరఖాస్తుదారులకు మాత్రమే ఈ మినహాయింపు లభిస్తుంది. కాబట్టి ఇతర వీసా దరఖాస్తుదారులు ముందుగానే ప్రణాళికలు వేసుకోవాలని, అపాయింట్‌మెంట్ స్లాట్‌లను నిరంతరం గమనిస్తూ ఉండాలని నిపుణులు సూచిస్తున్నారు.