‘ట్రంప్ అత్యంత అపఖ్యాతి పొందిన నేరస్థుడు’.. ఎలాన్ మస్క్‌కు మరో తలనొప్పి

అగ్రరాజ్యం అమెరికా రాజకీయాల్లో మరో వివాదం కలకలం రేపింది. టెస్లా, ఎక్స్ దిగ్గజ సంస్థల అధినేత ఎలాన్ మస్క్ ఆర్టిఫిషియల్ ఇంటెలిజెన్స్ (AI) చాట్‍బాట్ గ్రోక్.. అమెరికా అధ్యక్షుడు డోనాల్డ్ ట్రంప్‍ను ఉద్దేశించి చేసిన వ్యాఖ్యలు ఇప్పుడు తీవ్ర చర్చకు దారితీశాయి. వాషింగ్టన్ డీసీలో అత్యంత అపఖ్యాతి పొందిన నేరస్థుడు డోనాల్డ్ ట్రంప్ అని గ్రోక్ ఏఐ పేర్కొంది. ఈ వ్యాఖ్యలు సోషల్ మీడియాలో వేగంగా వ్యాపించడంతో.. మస్క్‌కు మరో కొత్త తలనొప్పి మొదలైంది.

ఒక యూజర్ అడిగిన ప్రశ్నకు సమాధానంగా గ్రోక్ ఈ వ్యాఖ్యలు చేసింది. "వాషింగ్టన్ డీసీలో అత్యంత అపఖ్యాతి పొందిన నేరస్థుడు ఎవరు?" అని అడగ్గా.. గ్రోక్ నేరుగా డోనాల్డ్ ట్రంప్ పేరును ప్రస్తావించింది. అంతేకాకుండా ఈ నిర్ధారణకు గల కారణాలను కూడా అది వివరించింది. న్యూయార్క్‌లో వ్యాపార రికార్డులను తప్పుగా చూపించినందుకు ట్రంప్‍నకు 34 ఫెలోనీ (తీవ్రమైన నేరాలు) శిక్షలు పడ్డాయి. ఈ నేరాల ఆధారంగానే గ్రోక్ ఈ నిర్ణయానికి వచ్చినట్లు తెలిపింది. ఈ వ్యాఖ్యలు అప్పటికే అమెరికా రాజకీయాల్లో కలకలం సృష్టిస్తున్న ట్రంప్ కేసుపై మరింత దృష్టిని కేంద్రీకరించాయి.

 డోనాల్డ్ ట్రంప్ స్వయంగా వాషింగ్టన్ డీసీలో నేరాలు అదుపు తప్పాయని విమర్శలు గుప్పిస్తూ.. తాను అధికారంలోకి వస్తే నగర పోలీసు వ్యవస్థను ఫెడరల్‍గా మారుస్తానని ఎన్నికలకు ముందే ప్రకటించారు. ఈ నేపథ్యంలోనే ఒక ఏఐ చాట్‍బాట్ ట్రంప్‍నే ఆ నగరంలో అత్యంత ప్రముఖ నేరస్థుడిగా పేర్కొనడం విమర్శకులకు తావిస్తోంది. గతంలో మస్క్, ట్రంప్ మధ్య పలు సందర్భాల్లో బహిరంగంగా విభేదాలు తలెత్తాయి. ఇప్పుడు గ్రోక్ ఏఐ చేసిన ఈ వ్యాఖ్యలు వారి మధ్య ఉన్న సంబంధాన్ని మరింత ఉద్రిక్తంగా మార్చాయి.

గ్రోక్ ఏఐ వివాదాలకు కేంద్రంగా మారడం ఇదే మొదటి సారి కాదు. గతంలోనూ ఈ చాట్‍బాట్ అడాల్ఫ్ హిట్లర్‍ను పొగుడుతూ.. కొత్త హోలోకాస్ట్‌కు పిలుపును ఇచ్చినట్లు తీవ్ర ఆరోపణలు వచ్చాయి. దీనిపై పెద్ద ఎత్తున విమర్శలు వెల్లువెత్తడంతో.. గ్రోక్‍ను తాత్కాలికంగా నిలిపివేశారు. ఈ ఘటనలన్నీ ఏఐ చాట్‍బాట్‍లలో ఉండే పక్షపాతం, వాటి సమాధానాల విశ్వసనీయతపై తీవ్ర ప్రశ్నలను లేవనెత్తాయి. రాజకీయ నాయకులు, ప్రముఖులపై ఏఐ చేసే వ్యాఖ్యలు ఎంత వరకు నమ్మవచ్చనే దానిపై ఈ సంఘటన చర్చకు దారి తీసింది. మొత్తానికి ట్రంప్‍పై గ్రోక్ ఏఐ చేసిన ఈ తాజా వ్యాఖ్యలు ఎలాన్ మస్క్‌కు మరొక సవాలుగా నిలిచాయి.