సంజూకు బదులు జడేజా, రుతురాజ్, శివమ్ దూబెల్లో ఒకరిని ఇవ్వండి.. రాజస్థాన్‌ రాయల్స్‌ మెలిక

ఐపీఎల్ 2026 మినీ వేలానికి ముందు ఐపీఎల్‌లో ట్రేడ్ టాక్స్‌ జోరందుకున్నాయి. రాజస్థాన్ రాయల్స్ కెప్టెన్‌ సంజూ శాంసన్ .. జట్టును వీడనున్నాడనే ప్రచారం జరుగుతున్న విషయం తెలిసిందే. అయితే సంజూను ట్రేడింగ్ చేస్తారా లేదా వేలంలోకి పంపిస్తారా? అన్నది తేలాల్సి ఉంది. అయితే ఎలాగూ జట్టును వీడాలని సంజూ నిర్ణయించుకున్నాడు కాబట్టి.. మంచి డీల్స్ కోసం రాజస్థాన్ రాయల్స్ ప్రయత్నాలు జరుపుతున్నట్లు సమాచారం. దీనిపై ఇప్పటికే పలు ఫ్రాంఛైజీలను రాజస్థాన్ రాయల్స్ ఆశ్రయించిందట.

రాజస్థాన్ రాయల్స్ ఫ్రాంఛైజీ.. సంజూ ట్రేడ్ విషయంలో ఇప్పటికే చాలా ఫ్రాంఛైజీలకు మెయిల్ ద్వారా సమాచారం ఇచ్చినట్లు తెలుస్తోంది. ఇందుకు రాజస్థాన్ రాయల్స్‌ యజమాని మనోజ్ బాదాలే వ్యక్తిగతంగా చర్చలకు నాయకత్వం వహిస్తున్నట్లు ప్రచారం జరుగుతోంది. సంజూకు బదులు తమకు ఫలానా ఆటగాడు కావాలని రాజస్థాన్ కోరుతున్నట్లు సమాచారం. అయితే ఇప్పటికే డీల్ కుదిరిందా.. లేదా డీల్‌ అయ్యేందుకు దగ్గరగా చర్చలు జరుగుతున్నాయా అనేది తేలాల్సి ఉంది.

రాజస్థాన్ రాయల్స్‌.. చెన్నై సూపర్ కింగ్స్ ముందు ఓ డీల్ ఉంచినట్లు తెలుస్తోంది. ఇందులో భాగంగా రవీందర్ జడేజా లేదా రుతురాజ్ గైక్వాడ్ లేదా శివమ్ దూబేను అడిగినట్లు సమాచారం. అయితే ఇందుకు చెన్నై సూపర్ కింగ్స్ సానుకూలంగా లేదట. ఎందుకంటే ట్రేడ్ డీల్ ద్వారా అయితేనే సంజూను సీఎస్కే తీసుకునే అవకాశం ఉంది. ఆ జట్టు తమ ఆటగాళ్లను బదిలీ చేసుకునేందుకు ఇష్టపడటం లేదు! ఒకవేళ సంజూ.. సీఎస్కేలోకి వెళ్లాలంటే అది వేలంలోనే సాధ్యమయ్యే అవకాశం కనిపిస్తోంది.

సంజూ శాంసన్.. ఐపీఎల్ 2025 మినీ వేలంలోకి వస్తాడా? అనే ప్రశ్నకు సమాధానం లేదు. అది పూర్తిగా రాజస్థాన్ రాయల్స్ వ్యక్తిగత నిర్ణయం. ఎందుకంటే వారితో సంజూ 2027 వరకు ఒప్పందం చేసుకున్నాడు. కచ్చితంగా సంజూను కొనసాగించాలని రాజస్థాన్‌ అనుకుంటే.. అందుకు కూడా అవకాశం ఉంది. కానీ ఇది అంత ఈజీగా కాదు. ఎందుకంటే ఆటగాడే విడిపోవాలని అనుకున్నప్పుడు ఏ ఫ్రాంఛైజీ కూడా కొనసాగించాలని కోరుకోదు.

సంజూ రాజస్థాన్‌ను వీడేందుకు కారణాలు కూడా వెలుగులోకి వస్తున్నాయి. ఐపీఎల్ 2025 వేలానికి ముందు జోస్ బట్లర్‌ను విడుదల చేయాలని ఫ్రాంఛైజీ తీసుకున్న నిర్ణయాన్ని సంజూ వ్యతిరేకించాడు. బట్లర్‌కు బదులు రాజస్థాన్.. షిమ్రాన్ హిట్‌మెయిర్‌ను రిటైన్ చేసుకుంది. ఇది సంజూకు నచ్చలేదని సమాచారం.