వెండి నగలు కొంటున్నారా.. ఒకటో తేదీ నుంచి కొత్త రూల్స్

భారతీయ సంస్కృతి, సాంప్రదాయాల్లో బంగారానికి ప్రత్యేక స్థానం ఉంది. ముఖ్యంగా మహిళలు బంగారు ఆభరణాలు ధరిస్తారు. బంగారం తర్వాత ఆ స్థానాన్ని వెండి భర్తీ చేస్తోంది. బంగారంతో పాటు వెండి నగలు సైతం ధరిస్తుంటారు. అయితే, బంగారం మాదిరిగానే వెండికి సైతం నిబంధనలు అమలు చేయాలని కేంద్రం భావిస్తోంది. ఈ మేరకు వెండి ఆభరణాలకు సైతం హాల్ మార్కింగ్ తప్పనిసరి చేసే కొత్త రూల్స్ అమలు చేయనుందని పలు నివేదికలు చెబుతున్నాయి. సెప్టెంబర్ 1, 2025 నుంచి వెండి నగలకు హాల్ మార్కింగ్ ఉండే విధానం అమలులోకి తీసుకురాబోతున్నారని నివేదికలు చెబుతున్నాయి. ఇది ఇప్పటికే బంగారానికి అమలు చేసిన విధానం మాదిరిగా ఉంటుందని సమాచారం.

భారతీయ ప్రామాణిక బ్యూరో (BIS) ప్రకారం వెండి నగలకు 900, 800, 835, 925, 970, 990 అనే ఆరు రకాల ప్యూరిటీ స్థాయులను నిర్ధారించనున్నారు. వెండి ఆభరణాల స్వచ్ఛతను బట్టి ప్రత్యేకంగా ఉండే 6 అంకెల హాల్ మార్క్ యూనిక్ ఐడెంటిఫికేషన్ నంబర్ (HUID) జారీ చేయనున్నారు. ప్రతి నగపై ఈ హాల్ మార్క్ ముద్రిస్తారు. ఈ కొత్త విధానం ప్రస్తుతం అమలవుతున్న హాల్ మార్కింగ్ విధానాన్ని భర్తీ చేయనుంది.

కేంద్ర ప్రభుత్వం బంగారం హాల్ మార్కింగ్‌ను తప్పనిసరి చేస్తూ 2021లో ఆదేశాలు జారీ చేసింది. హాల్ మార్కింగ్ అంటే విలువైన లోహాల ఆభరణాలలో లోహపు స్వచ్ఛతను తెలియజేస్తుంది. స్వచ్ఛతను అధికారికంగా నమోదు చేసే ఒక ప్రత్యేక ప్రక్రియ. భారత్‌లో బీఐఎస్ హాల్ మార్కింగ్ అనేది ఆభరణాలు చట్టబద్దమైన స్వచ్ఛత ప్రమాణాలకు అనుగుణంగా ఉన్నాయని నిర్ధారిస్తుంది.

సెప్టెంబర్ 1, 2025 నుంచి వెండి ఆభరణాలకు హాల్ మార్కింగ్ స్వచ్ఛందం కానుంది. బంగారానికి అమలు చేసిన మాదిరిగానే ఉంటుంది. ప్రతి నగపై 6 అంకెలతో కూడిన HUID నంబర్ ముద్రిస్తారు. దాని ద్వారా ఆ నగ స్వచ్ఛత తెలుసుకోవచ్చు. కొనుగోలుదారులు బీఐఎస్ కేర్ యాప్‌లో వెరిఫై HUID ఫీచర్ ద్వారా ఆభరణాల స్వచ్ఛతను తనిఖీ చేయవచ్చు. దీంతో హాల్ మార్క్ లేని, నకిలీ, కల్తీ ఉత్పత్తుల నుంచి రక్షణ పొందవచ్చు. బంగారం నగలకు 999, 970 అంటూ ప్యూరిటీ నిర్ధరిస్తారు. బంగారు ఆభరణాలు తయారు చేసిన తర్వాత కచ్చితంగా హాల్ మార్క్ ముద్రించాల్సి ఉంటుంది. కొనుగోలు చేసే ముందు ఈ హాల్ మార్క్ తనిఖీ చేయాలి. దానిపైనే నగకు సంబంధించిన పూర్తి వివరాలు ఉంటాయి. ప్రత్యేకమైన నంబర్ సాయంతో తనిఖీ చేయవచ్చు.