భారత్‌కు క్రిస్టియానో రొనాల్డో? ఫుట్‌బాల్ మ్యాచ్‌కు రంగం సిద్ధం

ప్రపంచ ఫుట్‌బాల్ దిగ్గజం, ఐదుసార్లు బాలోన్ డిఓర్ విజేత క్రిస్టియానో రొనాల్డో త్వరలోనే భారత్‌లో ఆడే అవకాశం కనిపిస్తోంది. ఏఎఫ్‌సీ ఛాంపియనస్ లీగ్ టూ డ్రా శుక్రవారం జరిగింది. దానిలో రొనాల్డో సారథ్యంలోని సౌదీ క్లబ్ అల్ నస్ర్ , భారత ఐఎస్ఎల్ జట్టు ఎఫ్‌సీ గోవాతో పాటు ఇరాక్‌కు చెందిన ఆల్ జవ్రా ఎఫ్‌సీ, తజకిస్తాన్‌కి చెందిన ఎఫ్‌సీ ఇస్టిక్లోల్‌తో కలిసి డీ గ్రూప్‌లో చోటు దక్కించుకుంది. ఐఎస్‌ఎల్ 2024-25 సీజన్‌లో రెండో స్థానంలో ముగించిన ఎఫ్‌సీ గోవా , ఈ ఏడాది మేలో సూపర్ కప్ గెలిచి ప్లే ఆఫ్‌ రౌండ్‌కి చేరుకుంది. ఆపై ఒమాన్ క్లబ్ అల్ సీబ్‌ను ఓడించి ఈ ప్రతిష్టాత్మక టోర్నమెంట్‌లో స్థానం సంపాదించింది.

సౌదీ ప్రో లీగ్‌లో మూడో స్థానంతో ముగించిన అల్ నస్ర్, ఏఎఫ్‌సీ ఛాంపియన్స్ లీగ్ ఎలైట్‌కి అర్హత సాధించలేకపోయింది. దాంతో వారు ఏసీఎల్ 2లో డీ గ్రూప్‌లోకి చేరారు. ఈ గ్రూప్‌లో ఎఫ్‌సీ గోవా (భారత సూపర్ కప్ 2025 విజేతలు), అల్ జవ్రా ఎస్సీ (ఇరాక్ స్టార్ లీగ్ 2024-25 రన్నరప్), ఎఫ్‌సీ ఇస్టిక్లోల్ (తజికిస్తాన్ హయ్యర్ లీగ్ 2024 ఛాంపియన్లు) ఉన్నాయి.

మ్యాచ్ ఫార్మాట్, షెడ్యూల్

గ్రూప్ దశ మ్యాచ్‌లు హోమ్ అండ్ బయట ఫార్మాట్‌లో ఆడతారు. అయితే ఎఫ్‌సీ గోవా హోమ్ మ్యాచ్‌లో రొనాల్డో భారత్‌లో ఆడతాడా అనే విషయం స్పష్టతకు రావాల్సి ఉంది.

మొత్తం 32 జట్లు – వెస్ట్ జోన్‌లో 16, ఈస్ట్ జోన్‌లో 16 – ఎనిమిది గ్రూపులుగా విభజించబడ్డాయి. ప్రతి గ్రూప్ నుంచి టాప్ రెండు జట్లు రౌండ్ ఆఫ్ 16కి అర్హత పొందుతాయి.

టోర్నమెంట్ కీలక తేదీలు

గ్రూప్ దశ: 2025 సెప్టెంబర్ 16 – 2025 డిసెంబర్ 24, రౌండ్ ఆఫ్ 16: 2026 ఫిబ్రవరి 10 – 19, క్వార్టర్ ఫైనల్స్: 2026 మార్చి 3 – 12, సెమీఫైనల్స్: 2026 ఏప్రిల్ 7 – 15, ఫైనల్: 2026 మే 16.

గ్రూప్ దశ మ్యాచ్‌ డేలు

మ్యాచ్‌ డే 1: సెప్టెంబర్ 16 – 18, మ్యాచ్‌ డే 2: సెప్టెంబర్ 30 – అక్టోబర్ 2, మ్యాచ్‌ డే 3: అక్టోబర్ 21 – 23, మ్యాచ్‌ డే 4: నవంబర్ 4 – 6, మ్యాచ్‌ డే 5: నవంబర్ 25 – 27 / అక్టోబర్ 28 – 29 (బీహెచ్‌ఆర్ క్లబ్ మ్యాచ్‌లు), మ్యాచ్‌ డే 6: డిసెంబర్ 10 – 11 (ఈస్ట్) / డిసెంబర్ 23 – 24 (వెస్ట్).