కాల్షియం లోపం ఉంటే శరీరంలో కనిపించే లక్షణాలు

కాల్షియం మన శరీరానికి చాలా ముఖ్యమైన ఖనిజం.మన శరీరం ఆరోగ్యంగా, ఫిట్‌గా ఉండటానికి కాల్షియం అవసరం. శరీరానికి కాల్షియం అత్యంత ముఖ్యమైన పోషకాలలో ఒకటి. ఎముకలు, దంతాలు, కండరాలను బలోపేతం చేయడానికి కాల్షియం సాయపడుతుంది. అంతేకాకుండా నాడీవ్యవస్థకు కూడా చాలా ముఖ్యమైంది. ఒక నివేదిక ప్రకారం, ప్రపంచవ్యాప్తంగా దాదాపు 22 శాతం మంది యువతీ యువకులు కాల్షియం లోపంతో బాధపడుతున్నారు. చాలా మంది కాల్షియం లోపాన్ని తీవ్రంగా పరిగణించరు. కాల్షియం లోపం వల్ల ఆస్టియోపోరోసిస్, కండరాల నొప్పి, ఇతర ఆరోగ్య సమస్యలు వస్తాయి. కాల్షియం లోపం ఉంటే శరీరంలో కొన్ని లక్షణాలు కనిపిస్తాయి. ఆ లక్షణాలేంటో ఇప్పుడు తెలుసుకుందాం.

అలసట, బలహీనత

ఎటువంటి కారణం లేకుండా ఎల్లప్పుడూ అలసిపోయినట్లు అనిపిస్తే అది కాల్షియం లోపానికి సంకేతం కావచ్చు. చిన్న చిన్న పనులు చేస్తూ త్వరగా అలసిపోవడం, కాస్త దూరం నడిచినా బలహీనంగా అనిపిస్తే అది కాల్షియం తగ్గినట్టే అర్థం. కండరాల సంకోచం, శక్తి ఉత్పత్తిలో కాల్షియం ముఖ్యమైన పాత్ర పోషిస్తుంది. దాని లోపం కారణంగా శరీరానికి సరైన మొత్తంలో శక్తి లభించదు. ఇది నిరంతరం అలసటకు కారణమవుతుంది.

బలహీనమైన గోర్లు

కాల్షియం లోపం ప్రభావం గోళ్లపై కూడా కనిపిస్తుంది. గోళ్లు తరచుగా విరిగిపోయినా, అవి సన్నగా మారినా అది కాల్షియం లోపం యొక్క లక్షణం కావచ్చు. గోళ్లపై తెల్లటి మచ్చలు కనిపించినా నిర్లక్ష్యం వద్దు. అది కూడా కాల్షియం లోపానికి సంకేతం కావచ్చు. అందుకే ఈ లక్షణాన్ని నిర్లక్ష్యం చేయవద్దని నిపుణులు సూచిస్తున్నారు.

కండరాల తిమ్మిరి, నొప్పి

కండరాలు సరిగ్గా పనిచేయడానికి కాల్షియం చాలా అవసరం. కాల్షియం లోపం ఉంటే, కండరాలు తరచుగా తిమ్మిరి, ఒత్తిడి లేదా నొప్పిని కలిగిస్తాయి. ముఖ్యంగా రాత్రి సమయంలో ఈ నొప్పి ఎక్కువగా ఉంటుంది. కాళ్ళు, చేతుల్లో ఆకస్మిక తిమ్మిర్లు కాల్షియం లోపానికి ముఖ్యమైన సంకేతం. అందుకే ఈ లక్షణాన్ని లైట్ తీసుకోవద్దు.

దంతాలు బలహీనపడటం

మన దంతాలు దాదాపు 99% కాల్షియంతో తయారవుతాయి. శరీరంలో కాల్షియం లోపం ఉంటే, దంతాలు బలహీనపడటం ప్రారంభమవుతాయి. చిగుళ్ళలో రక్తస్రావం ప్రారంభమవుతుంది. అంతేకాకుండా దంతక్షయం సమస్య కూడా పెరుగుతుంది. మీకు తరచుగా దంత సమస్యలు ఉంటే, అది కాల్షియం లోపానికి సంకేతం కావచ్చు.

ఎముకల నొప్పి, పగుళ్లు

ఎముకలను నిర్మించడానికి, బలోపేతం చేయడానికి కాల్షియం అత్యంత ముఖ్యమైన పోషకం. దాని లోపం ఉంటే, ఎముకలు బలహీనపడటం ప్రారంభమవుతుంది. ఇది కీళ్ల నొప్పులు, పగుళ్లు వచ్చే ప్రమాదాన్ని పెంచుతుంది. చిన్న గాయం వల్ల కూడా మీ ఎముక పగుళ్లు ఏర్పడితే.. అది కాల్షియం లోపానికి తీవ్రమైన సంకేతం కావచ్చు. ఈ లక్షణాన్ని నిర్లక్ష్యం చేయకూడదని నిపుణులు సూచిస్తున్నారు.

మెడనొప్పి, వెన్ను నొప్పి

మీకు పదే పదే మెడ నొప్పి, వెన్ను నొప్పి వచ్చినా అది కాల్షియం లోపానికి సంకేతం కావచ్చు. ఈ లక్షణాల్ని లైట్ తీసుకోకూదని నిపుణులు సూచిస్తున్నారు. శరీరంలో కాల్షియం తగ్గడం వల్ల మెడ, వెన్ను నొప్పి సమస్యలు వస్తాయని నిపుణులు హెచ్చరిస్తున్నారు.

కాల్షియం లోపాన్ని ఎలా భర్తీ చేయాలి?

శరీరంలో కాల్షియం లోపాన్ని హైపర్‌కాల్సెమియా అంటారు. కాల్షియం లోపం అనేక సమస్యలను కలిగిస్తుంది. సాధారణంగా.. శరీరంలో తగినంత పోషకాలు లేకపోవడం, అధిక కెఫిన్ వినియోగం, జీవనశైలి మార్పులు, చెడు ఆహారపు అలవాట్లు యువతలో కాల్షియం లోపానికి కారణాలు. కండరాలను బలంగా ఉంచడానికి కాల్షియం చాలా ముఖ్యం. కాల్షియం అవసరం తీర్చడానికి, పాలు, పెరుగు, జున్ను, ఆకుపచ్చ కూరగాయలు వంటి పోషకమైన ఆహారాన్ని తీసుకోవాలని నిపుణులు అంటున్నారు. దీంతో పాటు, శరీరాన్ని హైడ్రేటెడ్‌గా ఉంచడం కూడా ముఖ్యం. రోజుకు కనీసం మూడు నుంచి నాలుగు లీటర్ల నీరు తాగాలని సూచిస్తున్నారు.