గుంతకల్లు యువకుడికి అమెరికాలో బంపరాఫర్
Andhra Pradesh Telugu | Suryaa Desk | Published : Sun, Sep 07, 2025, 08:23 AM
అనంతపురం జిల్లాకు చెందిన ఓ తెలుగు విద్యార్థి అమెరికాలో అద్భుతం సృష్టించాడు. గుంతకల్లు పట్టణానికి చెందిన సాయిసాకేత్, ఏకంగా రూ. 5 కోట్ల వార్షిక వేతనంతో అమెరికాలోని ప్రముఖ సాఫ్ట్వేర్ సంస్థ 'ఆప్టివర్'లో ఉద్యోగం దక్కించుకున్నాడు. బీటెక్ చివరి సంవత్సరం చదువుతుండగానే ఇంతటి భారీ ప్యాకేజీతో కొలువు సాధించడం విశేషం.ఉద్యోగంలో భాగంగా సాయిసాకేత్ ముందుగా పది వారాల పాటు ఇంటర్న్షిప్లో పాల్గొనాల్సి ఉంటుంది. కేవలం ఈ ఇంటర్న్షిప్ కాలానికే సదరు సంస్థ అతనికి రూ. కోటి వేతనం చెల్లించనుంది. ఇంటర్న్షిప్ విజయవంతంగా పూర్తికాగానే, ఏడాదికి రూ. 5 కోట్ల వేతనంతో పూర్తిస్థాయి ఉద్యోగంలోకి తీసుకునేందుకు ఆప్టివర్ సంస్థ ఒప్పందం కుదుర్చుకుందని అతని కుటుంబ సభ్యులు సంతోషంగా వెల్లడించారు.సాయిసాకేత్ తల్లిదండ్రులు రమేశ్, వాసవి. గుంతకల్లుకు చెందిన ఈ దంపతులు పదేళ్ల క్రితం అమెరికా వెళ్లి స్థిరపడ్డారు. సాయిసాకేత్ విద్యాభ్యాసం మొత్తం అమెరికాలోనే సాగింది. చదువు పూర్తికాకముందే కొడుకు అత్యున్నత స్థాయి ఉద్యోగం సాధించడం పట్ల వారు ఆనందం వ్యక్తం చేస్తున్నారు.ఈ ఉద్యోగానికి ఎలా ఎంపికయ్యాడనే విషయంపై సాయిసాకేత్ మాట్లాడుతూ సంస్థ నిర్వహించిన ఎంపిక పరీక్షలో గణితం, బిజినెస్, సాఫ్ట్వేర్ విభాగాల్లో చూపిన ప్రతిభ ఆధారంగా కంపెనీ నన్ను ఎంపిక చేసింది అని తెలిపారు.
|
|