రైల్వే టికెట్లకు ఆధార్ తప్పనిసరి - అక్టోబర్ 1 నుంచి కొత్త రూల్స్ అమల్లోకి!

భారతీయ రైల్వే తాజాగా కొన్ని కీలక మార్పులు చేస్తూ కొత్త నిబంధనలు అమలు చేయబోతోంది. అక్టోబర్ 1వ తేదీ నుంచి ఆన్‌లైన్‌ రిజర్వేషన్ విధానంలో ఈ మార్పులు అమల్లోకి రానున్నాయి.ఈ మార్పుల ప్రకారం, జనరల్‌ రిజర్వేషన్‌ టికెట్ల బుకింగ్ సమయంలో ఆధార్‌ అథెంటికేషన్ తప్పనిసరి కానుంది. అయితే ఇది మొదటి 15 నిమిషాల బుకింగ్‌ కాలానికి మాత్రమే వర్తించనుంది. ఈ నిర్ణయంతో రైల్వే టికెట్ల బుకింగ్‌లో పారదర్శకత పెరిగి, టికెట్లను బ్లాక్‌ చేయడాన్ని నివారించాలనే ఉద్దేశంతో రైల్వే బోర్డు చర్యలు తీసుకుంది.ఈ నిబంధన IRCTC వెబ్‌సైట్‌ మరియు మొబైల్‌ యాప్‌లపై అమలులో ఉంటుంది. రైల్వే రిజర్వేషన్ కౌంటర్ల వద్ద మాత్రం ఇదే విధానం వర్తించదు.ఇటీవలి పరిశీలనల ద్వారా, ఏజెంట్లు మరియు బ్రోకర్లు ప్రత్యేక సాఫ్ట్‌వేర్‌ల ద్వారా టికెట్లను ముందే బుక్‌ చేసేస్తున్నారన్న విషయం రైల్వే గుర్తించింది. దీంతో సామాన్య ప్రయాణికులకు టికెట్లు దొరకకపోతున్నాయి. దీనికి పరిష్కారంగా ఆధార్‌ అథెంటికేషన్‌ విధానం తీసుకువచ్చారు.ఈ సాంకేతిక మార్పుల అమలుకు సంబంధించి సెంటర్‌ ఫర్‌ రైల్వే ఇన్ఫర్మేషన్‌ సిస్టమ్స్‌ (CRIS) మరియు IRCTCలకు రైల్వే బోర్డు స్పష్టమైన ఆదేశాలు ఇచ్చింది. ప్రయాణికులకు అవగాహన కల్పించేందుకు సోషల్ మీడియా వేదికగా అవేర్‌నెస్ క్యాంపెయిన్‌ ప్రారంభించింది. మారిన నిబంధనలపై అన్ని విభాగాలకు సర్క్యూలర్‌ పంపినట్లు మంత్రిత్వశాఖ తెలిపింది.ప్రస్తుతం, జనరల్‌ టికెట్ల బుకింగ్‌ ప్రతిరోజూ రాత్రి 12:20 గంటలకు ప్రారంభమై 11:45 వరకు కొనసాగుతుంది. ప్రయాణ తేదీకి 60 రోజుల ముందే అడ్వాన్స్ బుకింగ్ ప్రారంభం అవుతుంది.ఇకపోతే, రైల్వేశాఖ ఇప్పటికే జూలై నెల నుంచి తత్కాల్‌ టికెట్ల బుకింగ్‌కు ఆధార్‌ ధృవీకరణను తప్పనిసరిగా అమలు చేస్తోంది. అదే విధంగా ఇప్పుడు జనరల్‌ టికెట్లకూ ఇదే విధానం అమలవుతోంది.దసరా, దీపావళి, ఛట్ పూజ వంటి పండుగల సమయంలో రైలు టికెట్లకు భారీ డిమాండ్ ఏర్పడే అవకాశమున్న నేపథ్యంలో, రైల్వే తీసుకున్న ఈ చర్య సామాన్య ప్రయాణికులకు ఉపశమనం కలిగించనుంది.