న్యూయార్క్ టైమ్స్ పత్రికపై 15 బిలియన్ డాలర్ల పరువునష్టం దావా వేసిన ట్రంప్
international | Suryaa Desk | Published : Tue, Sep 16, 2025, 08:22 PM
అగ్రరాజ్యం అమెరికా అధ్యక్షుడు డొనాల్డ్ ట్రంప్ తనపై వ్యతిరేక కథనాలు రాస్తున్నారంటూ ప్రఖ్యాత వార్తాపత్రిక 'ది న్యూయార్క్ టైమ్స్'పై భారీ పరువు నష్టం దావా వేశారు. దశాబ్దాలుగా తనపై, తన కుటుంబంపైనా, తన వ్యాపారాలపైనా, తన రాజకీయ ఉద్యమాలపైనా పత్రిక నిరంతరం అబద్ధాలను ప్రచారం చేస్తోందని ఆరోపిస్తూ, 15 బిలియన్ డాలర్ల (భారత కరెన్సీలో రూ. 1.25 లక్షల కోట్లకు పైగా) నష్టపరిహారం కోరారు.
ట్రంప్ తన ఈ నిర్ణయం గురించి సోషల్ మీడియా ప్లాట్ఫాం ఎక్స్ వేదికగా స్పందిస్తూ.. ఓ పోస్టు పెట్టారు. "మన దేశ చరిత్రలోనే అత్యంత నాసిరకం, క్షీణించిన పత్రికలలో ఒకటైన న్యూయార్క్ టైమ్స్పై 15 బిలియన్ డాలర్ల పరువు నష్టం, పరువు నష్టం దావా వేయడం నాకు ఒక గొప్ప గౌరవం" అని ట్రంప్ పేర్కొన్నారు. ఈ పత్రిక రాడికల్ లెఫ్ట్ డెమొక్రాటిక్ పార్టీకి ఒక 'మౌత్ పీస్'గా మారిందని ఆరోపించారు.
ట్రంప్ తన దావాలో ప్రధానంగా రెండు అంశాలను పేర్కొన్నారు. మొదటిది పత్రిక తనపై దశాబ్దాలుగా అబద్ధపు ప్రచారాన్ని కొనసాగిస్తోందని ఆరోపించారు. న్యూయార్క్ టైమ్స్.. తన గురించీ, తన కుటుంబం గురించీ, తన వ్యాపారం గురించీ, అలాగే తన 'అమెరికా ఫస్ట్', 'మేక్ అమెరికా గ్రేట్ ఎగైన్' ఉద్యమాల గురించీ, చివరికి దేశం మొత్తంపైనా అబద్ధాలు ప్రచారం చేస్తోందని ఆయన వివరించారు. అలాగే డెమొక్రాటిక్ పార్టీ అధ్యక్ష అభ్యర్థి కమలా హారిస్కు న్యూయార్క్ టైమ్స్ ఇచ్చిన మద్దతు ఒక "సింగిల్ లార్జెస్ట్ ఇల్లీగల్ క్యాంపెయిన్ కాంట్రిబ్యూషన్"గా పేర్కొన్నారు. ఒక పత్రిక ప్రచారం ఇలా చేయడం వింతగా ఉందని, ఆమోదయోగ్యం కాదని ఆయన వ్యాఖ్యానించారు.
న్యూయార్క్ టైమ్స్పై ట్రంప్ దావా వేయడం ఇదే మొదటిసారి కాదు. గతంలో కూడా ఆయన ఏబీసీ న్యూస్, సీబీఎస్ వంటి ప్రధాన అమెరికన్ బ్రాడ్కాస్టర్లపై కూడా ఇలాంటి దావాలు వేశారు. ఆ కేసులలో ఆయనకు అనుకూలంగా పరిష్కారాలు లభించాయి. ఏబీసీ, ట్రంప్తో రాజీ పడి.. భవిష్యత్ ట్రంప్ లైబ్రరీ ప్రాజెక్టుకు 15 మిలియన్ డాలర్లు విరాళంగా ఇచ్చింది. అదేవిధంగా సీబీఎస్ మాతృసంస్థ పారామౌంట్, కమలా హారిస్తో చేసిన ఇంటర్వ్యూ విషయంలో తీసుకున్న ఎడిటోరియల్ నిర్ణయాలపై వచ్చిన దావాలో.. 16 మిలియన్ డాలర్లను ట్రంప్ లైబ్రరీ ప్రాజెక్టుకు ఇచ్చి రాజీ చేసుకుంది.
ఈ సంస్థలు "డాక్యుమెంట్, విజువల్ ఆల్టరేషన్" వంటి అత్యంత అధునాతన పద్ధతులను ఉపయోగించి తనను తప్పుగా చూపించాయని.. అది ద్వేషపూరితమైన పరువు నష్టం అని ట్రంప్ ఆరోపించారు. తాను ఇలాంటి 'ఫేక్ న్యూస్' నెట్వర్క్లను బాధ్యులుగా చేస్తూ కేసులు వేయడం తనకు గర్వంగా ఉందని ఆయన పోస్టులో పేర్కొన్నారు. చాలా కాలంగా న్యూయార్క్ టైమ్స్ అబద్ధాలు చెబుతోందని.. అది ఇప్పుడు ఆగిపోతుందని ట్రంప్ స్పష్టం చేశారు. ఈ దావాను ఫ్లోరిడాలో వేశారు. ఈ వివాదం, ట్రంప్కు మీడియాకు మధ్య ఉన్న వైరాన్ని మరింత పెంచింది
|
|