సుకన్య సమృద్ధి ,,,, ఒకేసారి చేతికి రూ. 55 లక్షలు

పెట్టుబడులపై ఎలాంటి రిస్క్ లేకుండా ఉండాలంటే.. మనకు చాలానే ఆప్షన్లు ఉన్నాయి. బ్యాంకు ఫిక్స్‌డ్ డిపాజిట్ల గురించి ప్రధానంగా చెప్పుకోవాలి. ఇక్కడ రిస్క్ ఏం ఉండదు. నిర్దిష్ట పెట్టుబడిపై నిర్దిష్ట కాలానికి రిటర్న్స్ స్థిరంగా వస్తుంటాయి. రిస్క్ కోరుకోని సీనియర్ సిటిజెన్స్ దీనికి ఎక్కువగా మొగ్గుచూపుతుంటారు. ఇంకా.. రిస్క్ లేని వాటిల్లో కేంద్ర ప్రభుత్వం మద్దతు ఉండే పోస్టాఫీస్ స్మాల్ సేవింగ్స్ స్కీమ్స్ ఉన్నాయి. వీటిల్లో కూడా మెరుగైన రాబడి ఉంటుంది. ఇక్కడ షార్ట్ టర్మ్, లాంగ్ టర్మ్, రిటైర్మెంట్, ఎడ్యుకేషన్, పెన్షన్ ఇలా అన్ని అవసరాలకు సరిపోయే పథకాలు ఉంటాయి. ఇక్కడ పీపీఎఫ్, సుకన్య సమృద్ధి యోజన వంటి పథకాలు అత్యంత ఆదరణ పొందాయి.

వీటిల్లో ఇన్వెస్ట్ చేసేందుకు ప్రధాన కారణం కేంద్రం హామీ, చిన్న మొత్తాల్లో పెట్టుబడికి అవకాశం, మెరుగైన వడ్డీ రేట్లు, గ్యారంటీ రిటర్న్స్ ఇలా చెప్పుకోవచ్చు. ఇక్కడ ఆడపిల్లల కోసం అద్భుత పథకాల్లో ఒకటి సుకన్య సమృద్ధి యోజన. ఇది కేంద్ర ప్రభుత్వ బేటీ బచావో బేటీ పడావో ఇనిషియేటివ్‌లో భాగంగా లాంఛ్ చేసింది. ఆడపిల్లల తల్లిదండ్రులకు ఈ పథకం ఒక వరం. పిల్లల పైచదువులు, పెళ్లికి డబ్బులు సమకూర్చేందుకు ఈ పథకం ఉద్దేశించింది.

>> ఈ పోస్టాఫీస్ పథకాల్లో అత్యధిక వడ్డీ రేటు ప్రస్తుతం ఇందులోనే ఉంది. వార్షిక ప్రాతిపదికన 8.20 శాతంగా వడ్డీ రేట్లు ఉన్నాయి. ప్రతి 3 నెలలకు కచ్చితంగా కేంద్రం ఈ పథకాల వడ్డీ రేట్లను సవరించాలి. వడ్డీ రేట్లు ఇక్కడ పెంచొచ్చు లేదా స్థిరంగా ఉంచొచ్చు లేదా తగ్గించొచ్చు. చాలా కాలంగా వడ్డీ రేట్లను స్థిరంగానే ఉంచుతూ వస్తోంది. దీంతో వడ్డీ రేట్లలో మార్పులేం లేవు.

అర్హతల విషయానికి వస్తే ఆడపిల్ల అయి ఉండాలి. పదేళ్లలోపు వయసులేనే చేరాల్సి ఉంటుంది. పేరెంట్ లేదా లీగల్ గార్డియెన్ .. ఆడపిల్ల పేరిట అకౌంట్ ఓపెన్ చేయాలి. వార్షిక ప్రాతిపదికన కనీసం రూ. 250 నుంచి ఇందులో ఇన్వెస్ట్ చేయొచ్చు. గరిష్టంగా రూ. 1.50 లక్షల వరకు పెట్టొచ్చు. ఇలా వరుసగా 15 ఏళ్లు డబ్బులు కట్టాలి. దీనిని ఒకేసారి లేదా ఇన్‌స్టాల్‌మెంట్లలో చేయొచ్చు. పాత పన్ను విధానం కింద ఇక్కడ పెట్టుబడి, వడ్డీపై పన్ను ప్రయోజనాలు ఉంటాయి.

మెచ్యూరిటీ విషయానికి వస్తే.. అకౌంట్ తెరిచినప్పటి నుంచి 21 ఏళ్లుగా ఉంది. చిన్న వయసులోనే చేరడం వల్ల.. పాప పైచదువులు లేదా పెళ్లి సమయానికి ఒకేసారి పెద్ద మొత్తంలో డబ్బులు తీసుకోవచ్చు. 18 ఏళ్లు నిండాక పాప పెళ్లి సమయానికి కూడా పూర్తి మొత్తం తీసుకునేందుకు వీలుంటుంది. అప్పుడు ముందుగానే అకౌంట్ క్లోజ్ చేయాలన్నమాట. పాప వయసు 18 ఏళ్లు దాటాక లేదా పదో తరగతి పాసయ్యాక.. 50 శాతం వరకు నగదు ముందుగానే ఉపసంహరించుకోవచ్చు. ఏదైనా అత్యవసర పరిస్థితుల్లో.. ప్రాణాంతక వ్యాధుల బారినపడితే లేదా అకౌంట్ హోల్డర్ చనిపోయినప్పుడు మాత్రమే.. మెచ్యూరిటీకి ముందు డబ్బులు తీసుకునేందుకు వీలుంటుంది. ఏదైనా బ్యాంక్ లేదా పోస్టాఫీసులో ఈ అకౌంట్ తెరవొచ్చు. పెట్టుబడుల విషయానికి వస్తే.. చాలా చిన్న మొత్తాల్లో వార్షికంగా రూ. 10 వేలు, రూ. 20 వేలు, 50 వేలు ఇలా గరిష్టంగా రూ. 1.50 లక్షలు ఇన్వెస్ట్ చేయొచ్చు. ఇన్‌స్టాల్‌మెంట్ రూపంలో రూ. 500, రూ. 1000 ఇలా ఎంతైనా పెట్టుకోవచ్చు.

ఉదాహరణకు ఇక్కడ మనం వార్షిక ప్రాతిపదికన రూ. 50 వేలు ఇన్వెస్ట్ చేశామనుకోండి. మెచ్యూరిటీకి రూ. 23 లక్షలు వస్తాయి. వడ్డీతోనే ఇక్కడ రూ. 16 లక్షల వరకు వస్తుంది. అదే ఏడాదికి రూ. 60 వేలు అంటే.. ప్రతి నెలా రూ. 5 వేల చొప్పున ఇన్వెస్ట్ చేస్తే.. రూ. 27 లక్షలు వస్తాయి. నెలకు రూ. 10 వేలు లేదా ఏడాదికి రూ. 1.20 లక్షల చొప్పున జమ చేస్తే.. వడ్డీతోనే రూ. 37 లక్షలకుపైగా వస్తుంది. ఇక్కడ పెట్టుబడి మొత్తం రూ. 18 లక్షలుగానే ఉంది. మొత్తం చేతికి రూ. 55 లక్షలకుపైగా వస్తుంది. గరిష్ట పెట్టుబడి విషయానికి వస్తే.. ఏడాదికి రూ. 1.50 లక్షలు .. ఇన్‌స్టాల్‌మెంట్లలో చూస్తే ప్రతి నెలా రూ. 12,500 చొప్పున జమ చేస్తూ పోతే ఇక్కడ మెచ్యూరిటీకి రూ. 70 లక్షల వరకు వస్తుంది. ఇక్కడ పెట్టుబడి మొత్తం రూ. 22.50 లక్షలు కాగా.. వడ్డీతో రూ. 46 లక్షలకుపైగా వస్తుంది.