మీ పిల్లల్లో హిమోగ్లోబిన్ పెంచే 5 రకాల ఫుడ్స్

పిల్లలు ఎదిగే వయసులో అన్ని రకాల పోషకాలు సరైన విధంగా అందించాలి. లేదంటే క్రమంగా ఎన్నో అనారోగ్యాలు వస్తాయి. ముఖ్యంగా ఐదేళ్లు దాటిన తరవాత ఎదుగుదల కాస్త వేగంగా ఉంటుంది. ఆ సమయంలో ఎలాంటి సమస్యలు రాకుండా చూసుకోవాలి. ముఖ్యంగా రక్తహీనత రాకుండా చూసుకోవడం వల్ల సగానికి సగం సమస్యలు తీరిపోతాయి. పిల్లల్లో తక్షణమే శక్తి రావాలన్నా, హిమోగ్లోబిన్ లెవెల్స్ సరైన విధంగా పెరగాలన్నా ఇప్పుడు చెప్పే ఫుడ్స్ తప్పనిసరిగా ఇవ్వాల్సి ఉంటుంది. ఇవన్నీ పీడియాట్రిషియన్ డాక్టర్ సుష్మిత రికమెండ్ చేసిన ఆహార పదార్థాలు. మరి ఈ లిస్ట్ ఏంటో ఓ సారి వివరంగా తెలుసుకుందాం.

రాగులు

పిల్లల్లో హిమోగ్లోబిన్ లెవెల్స్ పెంచడానికి తప్పకుండా ఇవ్వాల్సిన ఫుడ్స్ లో రాగులు మొట్టమొదటిది. ఇందులో క్యాల్షియం, ఐరన్ అధికంగా ఉంటాయి. ఇవి ఎముకలను బలపరచడంతో పాటు నీరసాన్ని పోగొడతాయి. ఎదిగే పిల్లలకు ఎముకలు బలంగా ఉండడం చాలా అవసరం. అంతే కాదు. రాగులు శరీరంలో ఉన్న అధిక వేడిని తగ్గిస్తాయి. క్యాల్షియంతో పాటు ఫైబర్, విటమిన్లు ఇందులో అధికంగా ఉంటాయి. ప్రొటీన్స్ కూడా ఎక్కువగానే ఉంటాయి. పిల్లలకు రాగులు ఇవ్వడం ద్వారా ఫైబర్ అందుతుంది. తద్వారా జీర్ణ శక్తి కూడా మెరుగవుతుంది. రాగులతో దోశలు, ఇడ్లీ, రొట్టెలు లాంటివి చేసి పిల్లలకు పెట్టవచ్చు. తక్షణమే శక్తిని అందించడంలోనూ రాగులు ఎంతో తోడ్పడతాయి.

నువ్వులు

​నువ్వులు కూడా పిల్లలకు తప్పనిసరిగా ఇవ్వాలి. వంటల్లో వాడడమే కాకుండా నువ్వులు, బెల్లం కలిపి లడ్డుల మాదిరి చేసి ఇవ్వడం మంచిది. నువ్వులలోనూ ఎన్నో పోషకాలుంటాయి. ముఖ్యంగా ఫైబర్, ఐరన్, క్యాల్షియంతో పాటు విటమిన్స్ ఎక్కువగా ఉంటాయి. ఇవన్నీ పిల్లల ఎదుగుదలకు అవసరమైనవే. వీటిలో యాంటీ ఆక్సిడెంట్స్ కూడా ఎక్కువే. ఫలితంగా టాక్సిన్స్ అన్నీ బయటకు వెళ్లిపోతాయి. ఇందులో ఉండే ఫైబర్ కారణంగా పిల్లల్లో మలబద్ధకం తగ్గిపోతుంది. అదే సమయంలో ఐరన్ ఉండడం వల్ల రక్తహీనత వచ్చే అవకాశమే ఉండదు. రెగ్యులర్ గా పిల్లలకు నువ్వులు ఇవ్వడం చాలా మంచిది. సలాడ్స్ లో నువ్వులు వేసి పిల్లలకు ఇవ్వడం ద్వారా పోషకాలన్నీ సరైన విధంగా అందుతాయి.

దానిమ్మ

దానిమ్మలో కావాల్సినన్ని యాంటీ ఆక్సిడెంట్స్ ఉంటాయి. ఇందులో విటమిన్లు, మినరల్స్ కూడా ఎక్కువే. ముఖ్యంగా గుండె ఆరోగ్యాన్ని కాపాడడంలో ఇవి ఎంతో తోడ్పడతాయి. పిల్లల్లో జ్ఞాపకశక్తిని పెంచడంలోనూ ఇవి సాయపడతాయి. ఇందులో ఫైబర్ ఉండడం వల్ల జీర్ణ శక్తి మెరుగవుతుంది. ఇందులో విటమిన్ సి, మెగ్నీషియం, పొటాషియం ఉంటాయి. ఇందులో క్యాల్షియం తక్కువగానే ఉన్నప్పటికీ ఐరన్ అధికంగా ఉంటుంది. పిల్లలకు అందించడం ద్వారా చాలా త్వరగా హిమోగ్లోబిన్ పెరుగుతుంది. అనీమియా సమస్యకు దానిమ్మ మంచి మందులా పని చేస్తుంది. రోజూ పిల్లలకు దానిమ్మ గింజలు అందించడం మంచిది. జ్యూస్ రూపంలో కన్నా నేరుగా గింజలు తినిపించడం ద్వారా త్వరగా ఫలితాలుంటాయి.

బీట్ రూట్

ఎవరికైనా సరే..రక్తం తక్కువగా ఉంది అంటే వెంటనే అందరూ ఇచ్చే సలహా బీట్రూట్ తినమని. ఎందుకంటే ఇందులో ఐరన్ అంత ఎక్కువగా ఉంటుంది. ముఖ్యంగా బీట్ రూట్ రసం రక్తహీనతను తగ్గించి సరైన విధంగా హిమోగ్లోబిన్ ఉండేలా చూస్తుంది. ఇందులో నైట్రేట్స్ తో పాటు పొటాషియం, ఐరన్, ఫైబర్ అధికంగా ఉంటాయి. ఫైబర్ అధికంగా ఉండడం వల్ల జీర్ణ శక్తి మెరుగవుతుంది. పిల్లల్లో మలబద్ధకం, గ్యాస్ లాంటి సమస్యలు రాకుండా అడ్డుకుంటుంది. ఇందులో బీటా కెరోటీన్ కంటి చూపు తగ్గకుండా కాపాడుతుంది. పిల్లలకు అందించడం ద్వారా కంటి చూపు సమస్యలు కూడా తగ్గిపోతాయి.

డేట్స్, పిస్తా

ఈ రెండు రకాల ఫుడ్స్ లో డేట్స్ గురించి ముందుగా చెప్పుకుందాం. ఇవి అందించడం ద్వారా పిల్లల్లో మలబద్ధకం తగ్గిపోతుంది. జీర్ణ శక్తి పెరుగుతుంది. కడుపు క్లీన్ గా ఉందంటే సగం రోగాలు తగ్గిపోయినట్టే లెక్క. ఇక డేట్స్ లో పొటాషియం, మాంగనీస్, ఐరన్ లాంటి మినరల్స్ పుష్కలంగా ఉంటాయి. ఇవి హిమోగ్లోబిన్ లెవెల్స్ ని పెంచడంతో పాటు తక్షణ శక్తిని అందిస్తాయి. నేచురల్ షుగర్స్ ఉండడం వల్ల ఎలాంటి ఇబ్బంది ఉండదు. ఇక పిస్తా విషయానికి వస్తే..ఇందులో ఫైబర్ తో పాటు క్యాల్షియం, పొటాషియం ఉంటాయి. విటమిన్ ఇ, విటమిన్ బి6 కూడా ఉంటాయి. ఇవన్నీ శరీరానికి సరిపడ శక్తిని అందిస్తాయి. పిస్తాలో ఉండే మినరల్స్ ఎముకలను దృఢంగా మార్చుతాయి.

ఆకు కూరలు

ఆకు కూరల్లో కావాల్సినన్ని పోషకాలుంటాయి. ముఖ్యంగా ఐరన్, క్యాల్షియం ఎక్కవ మొత్తంలో అందాలంటే ఇవి తప్పనిసరిగా తినిపించాలి. అయితే..గోంగూరలో ఐరన్ ఎక్కువగా ఉంటుందని చెబుతున్నారు పీడియాట్రిషియన్ డాక్టర్ సుష్మిత. ఇప్పుడు చెప్పిన ఆహార పదార్థాలన్ని వారంలో కనీసం మూడు లేదా నాలుగు సార్లు అందించడం ద్వారా పిల్లల్లో రక్తహీనత తగ్గిపోతుందని వివరించారు. ఏ మాత్రం నిర్లక్ష్యం చేసినా పిల్లల ఎదుగుదలపై ప్రభావం పడుతుందని హెచ్చరించారు.