పాకిస్థాన్‌కు అధునాతన మిస్సైల్స్ ఇవ్వట్లేదు.. అమెరికా కీలక ప్రకటన

పాకిస్థాన్‌కు అత్యంత అధునాతన ఏఐఎం-120 గగనతలం నుంచి గగనతలంలోకి ప్రయోగించే క్షిపణులను విక్రయించడానికి అమెరికా ఆమోదం తెలిపిందంటూ చాలా రోజులుగా మీడియాలో పెద్ద ఎత్తున వార్తలు వస్తున్నాయి. అయితే తాజాగా వీటిపై అమెరికా స్పందించింది. ఈ వార్తలన్నీ అవాస్తవమైనవంటూనే.. అసలు ఒప్పందం గురించి పూర్తి క్లారిటీ ఇచ్చింది. గతంలో చేసుకున్న ఒప్పందంలో ప్రస్తావించిన ఇప్పటికే ఉన్న సామర్థ్యాలకు అనుగుణంగానే డెలివరీలు ఉంటాయని.. కొత్త క్షిపణులు ఇవ్వడం లేదని భారత దేశంలోని అమెరికా దౌత్య కార్యాలయం తెలిపింది. ఈరోజు ఉదయమే ఇందుకు సంబంధించి ఓ ప్రకటన వెలువరించింది.

భారత్‌తో అమెరికాకు బంధం చెడినప్పటి నుంచి పాకిస్థాన్‌కు దగ్గరవుతోంది యూఎస్. ఈ సమయంలోనే అనేక మార్లు పాక్ నేతలు అమెరికా వెళ్లడం, ట్రంప్ సహా కీలక నేతలతో చర్చలు జరపడం, పలు ఒప్పందాలు చేసుకోవడం నడుస్తోంది. ఈక్రమంలోనే గగనతలం నుంచి గగన తలంలోకి లక్ష్యాలను ఛేదించే అధునాతన ఏఐఎం-120 క్షిపణుల ఆయుధ శక్తిని పెంచి పాకిస్థాన్‌కు అందించేలా అమెరికా రక్షణ శాఖ ఒక నోటిఫికేషన్ జారీ చేసినట్లు పెద్ద ఎత్తున వార్తలు వచ్చాయి. ముఖ్యంగా పాక్ వాయుసేనకు చెందిన ఎఫ్-16 యుద్ధ విమానాలను అగ్రరాజ్యం ఆధునికీకరించే అవకాశం ఉందంటూ ఊహాగానాలు వ్యక్తం అయ్యాయి.

క్షిపణి తయారీదారు రేథియాన్‌తో కుదిరిన 41.6 మిలియన్ డాలర్ల విలువైన ఆయుధ సవరణ ఒప్పందంపై సెప్టెంబరు 30వ తేదీన అమెరికా యుద్ధ శాఖ ప్రకటన చేసింది. ఈ ఒప్పందంలో భాగంగా ఎయిమ్-120 క్షిపణులు C8, D3 మోడళ్లను తయారు చేయనున్నారు. ఈ ఒప్పందంలో పాక్ కూడా విదేశీ కొనుగోలుదారులు జాబితాలో చోటుదక్కించుకుంది. దీంతో ఈ ఒప్పందం 2.51 బిలియన్ డాలర్లకు మించి పెరిగినట్టు పీటీఐ వార్తా సంస్థ నివేదించింది. ఈ ఒప్పందంలోని దేశాలకు 2030 మే నాటికి క్షిపణులను అందజేసే అవకాశం ఉందని కూడా వివరించింది.

ఈక్రమంలోనే అమెరికా రాయబార కార్యాలయం స్పందించింది. తాజాగా ఓ ప్రకటనను విడుదల చేసి మరీ.. అసలు విషయంపై క్లారిటీ ఇచ్చింది. ఈ ఒప్పందం కేవలం ప్రస్తుత వ్యవస్థలకు మద్దతు ఇవ్వడానికి ఉద్దేశించినదే తప్ప వాటి సామర్థ్యాన్ని పెంచడానికి కాదని ఉద్ఘాటించింది. ఈ కాంట్రాక్ట్ పాకిస్థాన్ వైమానిక పోరాట సామర్థ్యాలకు కొత్త అమ్మకం లేదా పెంపును సూచించదని రాయబార కార్యాలయం గట్టిగా నొక్కి చెప్పింది.