రాగి లడ్డూలు, పాలకూర పకోడీలు.. అంగన్‌వాడీ కేంద్రాల్లో అదిరిపోయే మెనూ

గర్భిణులు, బాలింతలు, చిన్నారుల ఆరోగ్యం, పోషణ కోసం ప్రభుత్వాలు అనేక చర్యలు చేపడుతూ ఉంటాయి. వారికోసం అనేక కార్యక్రమాలు, సంక్షేమ పథకాలు కూడా అమలు చేస్తున్నాయి. అందులో ప్రధానంగా చెప్పుకోవాల్సింది అంగన్వాడీ కేంద్రాల గురించి. అంగన్‌వాడీ కేంద్రాల ద్వారా చిన్నారులు, గర్భిణులు, బాలింతలలో పోషకాహార లోపం నివారించేందుకు ప్రభుత్వం చర్యలు తీసుకుంటోంది. అలాగే చిన్నారులకు ప్రీప్రైమరీ విద్యను కూడా అందిస్తున్నారు. ఇక అంగన్‌వాడీ కేంద్రాల ద్వారా చిన్నారులకు బాలామృతం, కోడిగుడ్లు వంటివి కూడా పంపిణీ చేస్తున్నారు. అయితే ఆంధ్రప్రదేశ్‌లోని ఆ జిల్లాలో ఉన్న అంగన్‌వాడీ కేంద్రాలలో బాలింతలు, గర్భిణులు, చిన్నారులకు నువ్వుండలు, రాగి లడ్డూలు, పాలకూర పకోడీలు వంటి వెరైటీ పదార్థాలు అందిస్తున్నారు.

ఏపీలో స్కూల్, కాలేజీ విద్యార్థులకు శుభవార్త.. వారికి రూ.10వేల నుంచి రూ.14,600 వరకు ఇస్తారు, దరఖాస్తు చేస్కోండి

ఉమ్మడి విజయనగరం జిల్లాలో సెప్టెంబర్ 16వ తేదీ నుంచి పోషణ మాసోత్సవాలు నిర్వహిస్తున్నారు. ఇందులో భాగంగా అంగన్‌వాడీ కేంద్రాలలో పైన చెప్పిన పదార్థాలతో పాటుగా బాలామృతంతో జావ, చిరుధాన్యాల పిండితో తయారు చేసిన మురుకులు, మునగాకు కూర వంటి వెరైటీలు అందిస్తున్నారు. అలాగే సజ్జలు, రాగులు, అరికెలు, జొన్నలు, నువ్వులు వంటి వాటితో తయారు చేసిన పదార్థాలు, వివిధ రకాల కూరగాయలు, పండ్లు ప్రదర్శనకు ఉంచారు.

ఉమ్మడి విజయనగరం జిల్లాల ఉన్న 2,499 అంగన్‌వాడీ కేంద్రాల్లో ఈ పోషణ మాసోత్సవాలు జరుగుతున్నాయి. అక్టోబర్ 17వ తేదీతో ఈ మాసోత్సవాలు ముగియనున్నాయి. అయితే ఉత్సవాలు ముగిసినప్పటికీ అంగన్వాడీ కేంద్రాలలో చిన్నారులు, బాలింతలు, గర్భిణులకు నిత్యం పోషకాలతో కూడిన ఆహారం అందిస్తామని అధికారులు చెప్తున్నారు. ఆ రకంగా చర్యలు తీసుకుంటున్నట్లు వెల్లడించారు.

మరోవైపు ఉమ్మడి విజయనగరం జిల్లాలో జరుగుతున్న పోషణ మాసోత్సవాల్లో ఇప్పటి వరకూ 80 వేల మందికిపైగా చిన్నారులు , 7,814 మంది గర్భిణులు, 6,481 మంది బాలింతలు భాగస్వామ్యులు అయ్యారని ఐసీడీఎస్ అధికారులు వెల్లడించారు. అంగన్వాడీ కేంద్రాల ద్వారా బాలింతలు, గర్భిణులు, చిన్నారులకు మెరుగైన సేవలు అందిస్తున్నామని.. పోషకాహార లోపం తలెత్తకుండా చర్యలు తీసుకుంటున్నామని చెప్తున్నారు. మాసోత్సవాలు మరో రెండు రోజులలో ముగియనున్న నేపథ్యంలో ఈ ప్రక్రియలో భాగస్వామ్యం కావాలని కోరుతున్నారు.