జుట్టుకు ఆయిల్ ఎలా పెట్టాలో తెలుసా,,,సరైన పద్దతిలో రాస్తేనే జట్టు ఒత్తు పెరుగుతుంది

జుట్టు ఒత్తుగా పెరగాలంటే రకరకాల చిట్కాలు పాటిస్తుంటారు. ఎన్నో సీరమ్స్ అప్లై చేస్తుంటారు. కానీ వీటన్నింటి కన్నా ముందు చేయాల్సిన పని ఒకటి ఉంది. అదేంటంటే..ఆయిల్ అప్లై చేయడం. చాలా మంది ఈ విషయంలో లైట్ తీసుకుంటారు. అసలు జుట్టుకు నూనె రాయడం వల్ల పోషకాలు అందుతాయి. ముఖ్యంగా స్కాల్ప్ దృఢంగా ఉంటుంది. ఫాలికల్స్ వదులుగా మారి జుట్టు రాలిపోకుండా ఉంటుంది.

ఆయిల్ రాయకుండా వదిలేస్తున్నంత కాలం స్కాల్ప్ పొడిగా మారిపోయి వెంట్రుకలు త్వరగా రాలిపోవడం, చివర్లు చిట్లిపోవడం లాంటి సమస్యలు తలెత్తుతుంటాయి. అయితే జుట్టుకు నూనె రాయడం అనేది కూడా చాలా జాగ్రత్తగా చేయాల్సిన పని. అందుకే ఆయిల్ అప్లై చేసే విషయంలో అసలు నిర్లక్ష్యం చేయకూడదు. మరి జుట్టుకు నూనె ఎలా అప్లై చేయాలో, ఆ పద్ధతి ఏంటో క్లియర్ గా తెలుసుకునే ప్రయత్నం చేద్దాం.

ముందుగా అరచేతిలో నూనె పోసుకోవాలి. ఆ తరవాత కుదుళ్ల వరకూ వెళ్లేలా అర చేతులతోనే బాగా మసాజ్ చేయాలి. లేదంటే కాస్త వెడల్పుగా ఉన్న దువ్వెనతో దువ్వుకోవాలి. ఇలా చేయడం వల్స మొత్తం కురులకు ఆయిల్ అప్లై అవుతుంది. అయితే వెంట్రుకలు చివర్లకు మాత్రం తప్పనిసరిగా నూనె చేరుకునేలా చూడాలి. ఎందుకంటే ఎక్కువగా ఈ చివర్లే చిట్లిపోయి త్వరగా వెంట్రుకలు రాలిపోవడానికి కారణం అవుతుంటాయి. ​

పైగా ఈ చివర్లే ఎక్కువగా డ్యామేజ్ అవుతుంటాయి. ఆయిల్ రాసుకున్న తరవాత తప్పనిసరిగా జుట్టును ముడి వేసుకోవాలి. కాకపోతే మరీ టైట్ గా కట్టకుండా కాస్తంత వదులుగానే ముడి వేసుకుంటే మంచిది. కాస్తంత గోరువెచ్చగా ఉండే టవల్ తో ముడి వేస్తే ఇంకా బెటర్. లేదంటే షవర్ క్యాప్ తో అయినా కవర్ చేసుకోవాలి. ఇలా చేయడం వల్ల నూనె కుదుళ్ల వరకూ చేరుకునేందుకు అవకాశం ఉంటుంది. ఇలా ఆయిల్ అప్లై చేసిన తరవాత కనీసం గంట పాటు అలాగే ఉంచాలి. ఆ తరవాత తలస్నానం చేయాలి.

షాంపూ ఏది వాడాలంటే

ఆయిల్ రాసిన తరవాత తలస్నానం చేయాల్సి ఉంటుంది. అయితే ఇక్కడే జాగ్రత్తలు పాటించాలి. మరీ ఎక్కువగా కెమికల్స్ కలిసి ఉన్న షాంపూలు వాడడం మంచిది కాదు. అందుకు బదులుగా కాస్త సాఫ్ట్ గా ఉన్న షాంపూలు వాడడం మంచిది. షాంపూలో సల్ఫేట్ లేకుండా చూసుకోవడం మంచిది. అయితే చన్నీళ్లతో కాకుండా గోరు వెచ్చని నీటితో తలస్నానం చేస్తే బెటర్.

​అయితే ఆముదం నూనె లాంటి చిక్కగా ఉన్న నూనెలు తలకు రాసుకున్నప్పుడు ఒకటికి రెండు సార్లు కురులను క్లీన్ చేసుకోవాల్సి వస్తుంది. అయితే చాలా మంది వేడి వేడి నీళ్లతో తలస్నానం చేస్తుంటారు. ఇలా చేయడం వల్ల స్కాల్ప్ పై ఉండే నేచురల్ ఆయిల్స్ తొలగిపోతాయి. అందుకే ఆయిల్ పెట్టుకున్నప్పుడు గోరు వెచ్చని నీటితో స్నానం చేయడం మంచిది. అలా అని మరీ అతిగా ఆయిల్ పెట్టడం కూడా మంచిది కాదు. మరీ తక్కువగా కూడా కాదు. ఎప్పుడూ ఒకే క్వాంటిటీ మెయింటేన్ చేస్తూ బ్యాలెన్స్ డ్ గా నూనె పెట్టుకోవాలి.

ఇది గుర్తుంచుకోండి

హెయిర్ టైప్ ని బట్టి వారానికి ఒకటి లేదా రెండు సార్లు ఆయిల్ రాయడం చాలా మంచిది. అయితే మధ్య మధ్యలో కండీషనర్ లేదా సీరమ్ లాంటివి రాయడం ఇంకా బెటర్. ఇలా చేయడం వల్ల ఎప్పుడూ వెంట్రుకల్లో తేమ ఉంటుంది. రెగ్యులర్ గా ఆయిల్ అప్లై చేయడం వల్ల జుట్టు చాలావేగంగా పెరుగుతుంది. అంతే కాదు. కురులు ఆరోగ్యంగా ఉంటాయి. అన్ని ఆయిల్స్ ఒకేలా ఉండవు. అందుకే మీ కురులకు ఏది సెట్ అవుతుంది అనేది ఎంపిక చేసుకోవాలి. సాధారణంగా పొడిగా ఉండే జుట్టుకు కొబ్బరి నూనె చాలా మంచిది. ఇక జుట్టు చాలా వేగంగా పెరగాలని అనుకుంటే మాత్రం ఆముదం నూనె వాడడం బెటర్. ఆముదం నూనెలో రిసిలోలిక్ యాసిడ్ ఎక్కువగా ఉంటుంది. ఇది జుట్టు పెరుగుదలకు సహకరిస్తుంది. కుదుళ్లు దృఢంగా ఉండేలా చేస్తుంది. ఇక బాదం నూనెలో విటమన్ ఇ ఎక్కువగా ఉంటుంది. ఇది కురులకు అదనపు మెరుపు ఇవ్వడంలో ఉపయోగపడుతుంది. ఇక రోజ్ మెరీ ఆయిల్ అయితే ఫాలికల్స్ ని బలంగా మార్చుతుంది.

వేడి చేసి 

జుట్టుకు నూనె అప్లై చేసే ముందు ఆయిల్ ఓ సారి వేడి చేయడం మంచిది. దీని వల్ల కుదుళ్ల వరకూ నూనె వెళ్లేందుకు అవకాశం ఉంటుంది. మీకు నచ్చిన ఆయిల్ రెండు లేదా మూడు టేబుల్ స్పూన్స్ మేర తీసుకుని గిన్నెలో పోయాలి. ఈ నూనెని కాస్తంత వేడి చేయాలి. మరీ వేడిగా కాకుండా గోరువెచ్చగా ఉండేలా చూసుకోవాలి. ఆ తరవాత ఈ నూనెను మునివేళ్లతో తలకు పట్టించాలి. క్రమంగా మసాజ్ చేయాలి. ప్రతి వెంట్రుకకు నూనె అంటుకునే విధంగా చాలా జాగ్రత్తగా అప్లై చేయాలి. చాలా మంది ఏదో హడావుడిగా ఆయిల్ అప్లై చేసి వదిలేస్తుంటారు. దీని వల్లే ఫలితాలు సరిగ్గా రావు. స్కాల్ప్ మొత్తం కవర్ అయ్యే విధంగా నూనె అప్లై చేయాల్సి ఉంటుంది. ఇలా చేయడం వల్ల కురుల కుదుళ్లు బలంగా మారతాయి. ఓవరాల్ గా హెయిర్ గ్రోత్ బాగుంటుంది. అయితే నూనె మాత్రం చాలా ప్యూర్ గా ఉండేలా చూసుకోవడం మంచిది.

మసాజ్

నూనె రాయడం అంటే ఏదో రాసి ఊరుకోవడం కాదు. మసాజ్ లాగా చేసుకోవాలి. సరైన విధంగా నూనెతో మసాజ్ చేస్తే కురుల కుదుళ్లకు సరిగ్గా రక్త సరఫరా జరుగుతుంది. అంతే కాదు. పోషకాలు కూడా సరిగ్గా అందుతాయి. అయితే మసాజ్ చేసే సమయంలో గోళ్లతో కాకుండా ముని వేళ్లను వాడడం మంచిది. సర్క్యులర్ షేప్ లో తలకు నూనె అప్లై చేస్తూ ఉండాలి. కనీసం పావుగంట పాటు ఇలా మసాజ్ చేయాలి. ఏ ఏరియాలో అయితే ఎక్కువగా జుట్టు రాలుతోంది అని గమనించారో అక్కడ ఇంకాస్త ఎక్కువగా ఆయిల్ రాయడం మంచిది. ఇలా మసాజ్ చేయడం వల్ల కండరాలు రిలాక్స్ అవుతాయి. స్ట్రెస్ కూడా తగ్గుతుంది.