దేశంలో మావోయిస్టు ఉగ్రవాదం తుది దశలో ఉందన్న ప్రధాని మోదీ

దేశంలో మావోయిస్టు ఉగ్రవాదం తుది దశలో ఉందని, ఈ పీడ నుంచి భారతదేశానికి త్వరలోనే పూర్తి విముక్తి కల్పిస్తానని ప్రధానమంత్రి నరేంద్ర మోదీ ధీమా వ్యక్తం చేశారు. ఇది తన వ్యక్తిగత గ్యారెంటీ అని ఆయన స్పష్టం చేశారు. ఢిల్లీలో జరిగిన ఎన్డీటీవీ వరల్డ్ సమ్మిట్‌లో ప్రధాని మాట్లాడుతూ.. దశాబ్దాలుగా దేశ అభివృద్ధికి మావోయిజం పెను శాపంగా మారిందని, ఎందరో పేద గిరిజనులు, రైతులు, గ్రామస్థుల ప్రాణాలను బలిగొందని ఆవేదన వ్యక్తం చేశారు.గత కొన్నేళ్లుగా మావోయిస్టుల ప్రాబల్యం గణనీయంగా తగ్గిపోయిందని, ప్రభావిత ప్రాంతాల్లో అభివృద్ధి శకం మొదలైందని మోదీ తెలిపారు. కేవలం 72 గంటల వ్యవధిలో 303 మంది నక్సలైట్లు లొంగుబాటు కావడమే ఇందుకు నిదర్శనమని అన్నారు. లొంగిపోయిన వారిలో కోటి రూపాయల వరకు రివార్డులు ఉన్న కీలక నేతలు కూడా ఉన్నారని, వారంతా ఇప్పుడు భారత రాజ్యాంగాన్ని విశ్వసించి జనజీవన స్రవంతిలో కలిసేందుకు సిద్ధమయ్యారని వివరించారు.గత కాంగ్రెస్ హయాంలో 'అర్బన్ నక్సల్స్' మావోయిస్టుల ఘోరాలను కప్పిపుచ్చారని ప్రధాని ఆరోపించారు. ఇటీవల మావోయిస్టు బాధితులు ఢిల్లీకి వచ్చి తమ గోడును వినిపించుకోవడానికి ఏడు రోజుల పాటు ప్రయత్నించారని, కొందరు కాళ్లు, చేతులు కోల్పోయిన పేద రైతులు, గిరిజనులు ప్రెస్ కాన్ఫరెన్స్ పెట్టి తమ గొంతును ప్రజలకు చేర్చమని వేడుకున్నారని గుర్తుచేసుకున్నారు. 50 ఏళ్లుగా మావోయిస్టుల దాడుల వల్ల ఎన్నో మారుమూల ప్రాంతాల్లో పాఠశాలలు, ఆసుపత్రులు, కనీస మౌలిక సదుపాయాలు లేకుండా పోయాయని అన్నారు.ఒకప్పుడు దేశంలో 125 జిల్లాలు మావోయిస్టుల ప్రభావంతో సతమతమయ్యేవని, కానీ ఇప్పుడు ఆ సంఖ్య కేవలం 11 జిల్లాలకే పరిమితమైందని మోదీ వెల్లడించారు. వాటిలో కూడా అత్యంత తీవ్రంగా ప్రభావితమైనవి కేవలం మూడు జిల్లాలేనని పేర్కొన్నారు. తమ ప్రభుత్వం అభివృద్ధి, భద్రతలను సమానంగా ముందుకు తీసుకెళుతోందని, ఒకప్పటి మావోయిస్టుల కంచుకోట బస్తర్‌లో గిరిజనులు ఇప్పుడు 'బస్తర్ ఒలింపిక్స్' నిర్వహిస్తుండటమే సాంస్కృతిక పునరుజ్జీవనానికి నిదర్శనమని చెప్పారు. మావోయిస్టు ప్రభావిత ప్రాంతాల్లో ఈసారి దీపావళి భయం లేకుండా ప్రశాంతంగా జరుగుతుందని ఆయన హామీ ఇచ్చారు. మావోయిస్టు ఉగ్రవాద రహిత భారతావని అతి సమీపంలోనే ఉందని, ఆ రోజు ఎంతో దూరంలో లేదని ప్రధాని మోదీ ధీమా వ్యక్తం చేశారు.