హెచ్1బీ వీసా రాలేదని బాధపడుతున్నారా.. డోంట్ వర్రీ..!

హెచ్1బీ వీసా ఫీజును లక్ష డాలర్లకు పెంచుతూ అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయంపై స్వదేశంలోనే వ్యతిరేకత వ్యక్తం అవుతోంది. దాని వల్ల అమెరికాకే నష్టం జరుగుతుందని అమెరికన్లు అభిప్రాయపడుతున్నారు. ఈ నిర్ణయాన్ని వెనక్కి తీసుకోవాలని పలువురు అమెరికా కాంగ్రెస్ సభ్యులు కాంగ్రెస్‌కు లేఖ రాశారు. హెచ్1బీ ఫీజు పెంచితే.. అమెరికా కంపెనీలతో పోటీ పడుతున్న విదేశీ కంపెనీలు టెక్ నిపుణులను ఆకర్షిస్తాయని అన్నారు. వీరు అభిప్రాయపడినట్లే.. హెచ్1బీ వీసా కోసం ఎదురు చూస్తున్న వారిని ఆకర్షించేందుకు పలు దేశాలు ప్రయత్నాలు ముమ్మరం చేశాయి. అందులో ముఖ్యంగా అమెరికా పొరుగు దేశం కెనడా.. కొత్త ప్రతిపాదన చేసింది. తమ వలస విధానంలో మార్పులు చేస్తున్నట్లు ప్రకటించింది.

ట్రంప్, హెచ్1బీ ఫీజును భారీగా పెంచడం వల్ల ప్రభావితమైన వారిని ఆకర్షించేందుకు ఇమ్మిగ్రేషన్ విధానంలో మార్పులు చేయనున్నట్లు కెనడా ప్రధాని మార్క్‌ కార్నీ ప్రకటించారు. వచ్చే బడ్జెట్‌లో దానికి సంబంధించిన కొత్త విధానాన్ని ప్రకటిస్తామని తెలిపారు. కెనడా సామాజిక, ఆర్థిక అవసరాలకు తగ్గట్లు వలసలను అనుమతిస్తామని పేర్కొన్నారు. కాగా, హెచ్‌-1బీ వీసాతో అమెరికాలో ఉద్యోగం చేయాలనుకునే ఆశావహులను.. కెనడా వైపు ఆకర్షించడమే ఈ కొత్త వలస విధానం లక్ష్యంగా తెలుస్తోంది. కాగా, కెనడా మాజీ ప్రధాని జస్టిన్ ట్రూడో వలసలపై కఠిన ఆంక్షలు విధించిన విషయం తెలిసిందే. అయితే ఆ ఆంక్షలను అలాగే కొనసాగిస్తూ.. దేశ అవసరాల కోసం, ప్రజల అభిప్రాయాలను పరిగణనలోకి తీసుకొని వలస విధానంలో కెనడా సవరణలు చేయనున్నట్లు సమాచారం.

వీసా ఫీజు పెంపు గందరగోళం నేపథ్యంలో చాలా అమెరికన్ కంపెనీలు హెచ్1బీ టెక్ నిపుణులను తీసుకునేందుకు జంకుతున్నాయి. ఇటీవల రిటైల్ దిగ్గజం వాల్‌మార్ట్ హెచ్1బీ వీసాదారుల నియామకాలను నిలిపివేసింది. ఇదిలా ఉండగా, హెచ్‌-1బీ వీసా ఫీజుపై నెలకొన్న సందేహాలపై ఇటీవల అమెరికా ప్రభుత్వం క్లారిటీ ఇచ్చింది. అమెరికాలో చదువు పూర్తి చేసుకొని, ఉద్యోగాల కోసం హెచ్‌-1బీ వీసాకు అప్లై చేసుకొనే విదేశీ విద్యార్థులు.. పెంచిన వీసా ఫీజు చెల్లించాల్సిన అవసరం లేదని తెలిపింది. దాని ప్రకారం హెచ్1బీ వీసాపై విధించిన లక్ష డాలర్ల ఫీజు.. అమెరికాలోనే ఉండి వీసా స్టేటస్‌ను (ఎఫ్1 నుంచి హెచ్1బీ) మార్చుకునే వారికి వర్తించదు. అంతేకాకుండా ఇప్పటికే హెచ్‌1బీ ఉండి కొనసాగింపు కోరే వారికి కూడా ఈ లక్ష డాలర్ల ఫీజు వర్తించదని పేర్కొంది. విదేశాల నుంచి నేరుగా హెచ్‌1బీ వీసాలకు దరఖాస్తు చేసుకునేవారు మాత్రమే ఈ మొత్తం చెల్లించాల్సి ఉంటుందని క్లారిటీ ఇచ్చింది.