తలలో పేలు పడ్డాయా, ఈ చిట్కాతో అన్నీ మాయం

ఈ రోజుల్లో చాలా మంది జుట్టుకు సంబంధించిన సమస్యలు ఎదుర్కొంటున్నారు. ఇందులో జుట్టు దురద కూడా ఒకటి. చాలా మందికి చుండ్రు లేదా జిడ్డుతో కూడిన తల వల్ల ఈ సమస్య తలెత్తవచ్చు. దురదకి షాంపూ, కండిషనర్ ట్రై చేసినా ఫలితం లేకపోకపోతే అది తలలో పేల సమస్య కావచ్చు.

​తలలో పేలు అసౌకర్యం కలిగించడమే కాకుండా వేగంగా వ్యాపిస్తాయి. వీటికి సకాలంలో చికిత్స అవసరం. పేలు దురద, చికాకు, అలెర్జీ ప్రతిచర్యలకు కారణమవుతాయి. పేలు సాధారణంగా సోకిన వ్యక్తిని తాకడం ద్వారా వ్యాపిస్తాయి. ఈ బాధితుల్లో పిల్లలు ఎక్కువగా ఉంటారు.

కుటుంబంలో ఎవరికైనా పేలు ఉంటే అవి ఇతరులకు వ్యాపిస్తాయి. అదే దువ్వెన, టవల్ లేదా దిండును ఉపయోగించడం వల్ల కూడా పేలు వ్యాపిస్తాయి. అయితే, పేలు సమస్యను పొగొట్టడానికి కొన్ని ఇంటి చిట్కాలు ప్రభావవంతంగా పనిచేస్తాయి. ఆ చిట్కాలేంటో ఇప్పుడు చుద్దాం.

వేప నూనె

తలలో పేలు సమస్యకు వేప నూనె అత్యంత ప్రభావవంతమైన గృహ నివారణ. ఇందులో యాంటీ బ్యాక్టీరియల్, యాంటీ మైక్రోబియల్ లక్షణాలున్నాయి. ఇవి పేలు, వాటి గుడ్లను చంపడంలో సాయపడతాయి. దీని అప్లై చేయడం చాలా సులభం.

ఇందుకోసం రోజూ రాత్రి పడుకునే ముందు జుట్టు మూలాలకు వేప నూనెను పూర్తిగా అప్లై చేయండి. ఆ తర్వాత తలను టోపి లేదా గుడ్డలో కప్పండి. ఉదయం షాంపూతో స్నానం చేయండి. ఒకటి లేదా రెండు సార్లు వేప నూనె అప్లై చేసినా వెంటనే ఫలితం కనిపిస్తుంది. పేలు సమస్య తగ్గుముఖం పడుతుంది.

వెనిగర్, నీటి ద్రావణం

వెనిగర్ పేలు గుడ్లను వదులుగా చేయడానికి సాయపడుతుంది. వాటిని దువ్వడం సులభం చేస్తుంది. అర కప్పు వైట్ వెనిగర్‌ను ఒక కప్పు నీటితో కలిపి ద్రావణాన్ని రెడీ చేయండి. ఈ ద్రావణాన్ని మీ తలకు అప్లై చేయండి. అరగంట పాటు తలపై టోపీతో కప్పి, ఆపై పూర్తిగా దువ్వండి. ఇది గుడ్లను తొలగిస్తుంది. అంతేకాకుండా పేలు సంఖ్యను తగ్గిస్తుంది.

టీ ట్రీ ఆయిల్

టీ ట్రీ ఆయిల్ అనేది సహజ క్రిమిసంహారక మందు. ఇది పేలను త్వరగా చంపుతుంది. ఇందుకోసం టీ ట్రీ ఆయిల్ యొక్క కొన్ని చుక్కలను కొబ్బరి నూనెతో కలిపి తలకు మసాజ్ చేయండి. 1 నుంచి 2 గంటలు అలాగే ఉంచి.. ఆ తర్వాత షాంపూతో శుభ్రం చేసుకోండి. ఆ తర్వాత చక్కటి పళ్లున్న దువ్వెనతో మీ జుట్టును బాగా దువ్వండి. వారానికి రెండుసార్లు ఇలా చేయడం వల్ల పేలు, వాటి గుడ్ల సమస్య తొలగిపోతుంది.

వెల్లుల్లి పేస్ట్

వంటగదిలో దొరికే వెల్లుల్లితో పేలు సమస్యను తగ్గించుకోవచ్చు. వెల్లుల్లికి బలమైన వాసన, క్రిమినాశక లక్షణాలు ఉంటాయి. ఇవి తలలో పేలు చంపడంలో ప్రభావవంతంగా ఉంటాయి. ఇందుకోసం 8 నుంచి 10 వెల్లుల్లి రెబ్బల్ని రుబ్బి కొద్ది నిమ్మరసం కలపండి. ఆ తర్వాత ఈ పేస్టును తలకు అప్లై చేయండి. 30 నిమిషాల తర్వాత, తేలికపాటి షాంపూతో జుట్టును వాష్ చేసుకోవాలి. వెల్లుల్లి ఘాటైన వాసన పేలును చంపుతుంది. అంతేకాకుండా అవి తిరిగి పడకుండా నిరోధిస్తుంది.

ఉల్లిపాయ రసం

ఉల్లిపాయ రసం తలలో పేలను తొలగించడానికి చాలా ప్రభావవంతంగా ఉంటుంది. ఇందుకోసం.. ఉల్లిపాయను మెత్తగా రుబ్బి, తాజా రసాన్ని తీయండి. ఆ రసాన్ని జుట్టుకు మూలాల నుంచి మొత్తం అప్లై అయ్యేలా రాయండి. రాత్రిపూట ఇలా అప్లై చేయండి. ఉదయం షాంపూతో జుట్టును వాష్ చేసుకోవాలి. ఈ చిట్కా వల్ల పేలు మాత్రమే కాకుండా చుండ్రు సమస్య కూడా తొలగిపోతుంది.

పేల దువ్వెన

పేలు సమస్యను తొలగించడానికి దువ్వెన మరో మంచి మార్గం. తడి జుట్టును చక్కటి పేల దువ్వెతో బాగా దువ్వాలి. ముందుగా జుట్టును మృదువుగా చేయడానికి కండిషనర్ అప్లై చేయండి. ఆ తర్వాత పేల దువ్వెనతో మొత్తం తలను సున్నితంగా దువ్వండి. ఇది పేలు, వాటి గుడ్లను తొలగిస్తుంది. పేలు పూర్తిగా పోయే వరకు ప్రతి రెండు మూడు రోజులకు ఈ పద్ధతిని రిపీట్ చేయండి.