అమెరికాలో 20 ఏళ్ల కిందట ఖైదీ.. ఇపుడు ఓ దేశాధ్యక్షుడిగా ట్రంప్‌తో భేటీ!.

సుమారు రెండు దశాబ్దాల కిందట అమెరికా 'డిటెన్షన్ సెంటర్‌'లో ఉన్న ఒక మాజీ ఖైదీ.. నేడు ఒక దేశానికి అధినేత హోదాలో అగ్రరాజ్యంలో దర్జాగా పర్యటిస్తున్నారు! ఆయనే సిరియా ప్రెసిడెంట్ అహ్మద్‌ అల్‌-షరా. ఆ దేశానికి 1946 స్వాతంత్ర్యం తర్వాత వాషింగ్టన్‌కు వచ్చిన మొదటి సిరియా అధ్యక్షుడు కూడా ఆయనే కావడం విశేషం. ఈ టూర్‌లోనే ఆయన అమెరికా ప్రెసిడెంట్ డొనాల్డ్‌ ట్రంప్‌తో సమావేశమయ్యారు. వైట్‌హౌస్‌లో భేటీ అనంతరం సిరియాపై ఉన్న ఆంక్షలు ఆరు నెలల పాటు రద్దుచేస్తున్నట్టు అమెరికా ప్రకటన చేసింది. ఈ ఏడాది మేలో సౌదీ అరేబియాలో వీరిద్దరూ మొదటిసారి కలిశారు.

అబు మహ్మద్‌ అల్‌ జులానీగా కూడా ఫేమస్ అయిన అహ్మద్‌ అల్‌-షరా.. 2003లో ఇరాక్‌పై అమెరికా దాడికి కొద్ది రోజులు ముందే అక్కడ అల్-ఖైదాలో చేరారు. ఇరాకీ తిరుగుబాటులో కూడా ఆయన పాల్గొన్నారు. దీంతో, అమెరికన్ సైన్యం ఆయన్ను 2006 నుంచి 2011 దాకా 'డిటెన్షన్ సెంటర్‌'లో నిర్బంధించింది. ఆ తర్వాత సిరియాకు వెళ్లి, అల్‌-ఖైదాకు మద్దతుగా ‘అల్‌ నుస్రా ఫ్రంట్‌’ను ఏర్పాటుచేశారు. ప్రభుత్వ వ్యతిరేకత ఉద్ధృతంగా ఉన్న ఇడ్లిబ్ లాంటి ఏరియాల్లో శక్తివంతమైన నేతగా ఎదిగారు. అనంతరం క్రమంగా అల్‌-ఖైదాకు దూరమయ్యారు. వేలాది మంది తిరుగుబాటుదారులతో కలిసి 2017 మొదట్లో హయాత్‌ తహరీర్‌ అల్‌-షమ్‌ను ఏర్పాటుచేశారు అహ్మద్ అల్ షరా. గత డిసెంబరులో ఆయన నాయకత్వంలోని తిరుగుబాటు దళాలు సిరియా మాజీ అధ్యక్షుడు బషర్ అల్‌ అసద్ సర్కార్‌ను పడగొట్టాయి.

అల్‌-షరా ఈ పర్యటన వల్ల.. ఇస్లామిక్ దేశాలకు వ్యతిరేకంగా అమెరికా నాయకత్వంలోని కూటమిలో సిరియా అధికారికంగా చేరుతుందని అందరూ భావిస్తున్నారు. గతంలో తమ దేశం విధించిన ఆంక్షలను ముఖ్యంగా 'సీజర్‌ యాక్ట్‌'ను ఎత్తేయాలని అల్‌-షరా ఒత్తిడి తీసుకొచ్చే ప్రయత్నం చేశారు. అమెరికా అధ్యక్షుడు ఆదేశాలతో 'సీజర్‌ యాక్ట్‌'పై ఇప్పటికే తాత్కాలికంగా బ్రేక్ పడింది. తాజాగా, దానిని మరో ఆరు నెలలు పొడిగించారు. గానీ.. శాశ్వతంగా రద్దు చేయాలంటే కాంగ్రెస్ అనుమతి తప్పనిసరి. ఇటీవల ఐక్యరాజ్యసమితి భద్రతా మండలి.. అల్‌-షరా, ఆయన మంత్రిపై ఉన్న ఆంక్షలు తొలగించడానికి గ్రీన్ సిగ్నల్ ఇచ్చింది. అగ్రరాజ్యం అమెరికా కూడా వారిని ఉగ్రవాదుల జాబితా నుంచి తొలగించింది.

సిరియా అధ్యక్షభవనం ప్రకటన ప్రకారం.. అల్-షరా, డొనాల్డ్ ట్రంప్ మధ్య జరిగిన చర్చలు ఇరు దేశాల మధ్య ద్వైపాక్షిక సంబంధాలు, వాటిని బలోపేతం చేసి అభివృద్ధి చేసే మార్గాలు, అలాగే పరస్పర ప్రయోజనాలకు సంబంధించిన పలు ప్రాంతీయ, అంతర్జాతీయ అంశాల కేంద్రీకృతమై ఉన్నాయి. భేటీ అనంతరం అల్-షరాపై ట్రంప్ ప్రశంసలు కురిపించాడు. ‘‘ఆయన చాలా క్లిష్ట పరిస్థితుల్లోంచి వచ్చారు, ఆయన ఒక దృఢమైన వ్యక్తి. నాకు ఆయన నచ్చారు’ అని ట్రంప్‌ వ్యాఖ్యానించాడు. ‘మేము సిరియా అభివృద్ధి కోసం సాధ్యమైనంత చేయబోతున్నాం, ఎందుకంటే అది పశ్చిమాసియాలో ఒక భాగం.. ఇప్పుడు అక్కడ శాంతి నెలకొంది’ అని తెలిపారు.