జ్వరమొచ్చిందని సెలవు పెట్టాడు.. అదే రోజు 16 వేల అడుగులు నడిచి ఉద్యోగం కోల్పోయాడు

అనారోగ్యం పేరుతో సెలవు తీసుకున్న ఓ ఉద్యోగి ఆ రోజు ఏకంగా 16,000 అడుగులు నడిచాడని గుర్తించిన కంపెనీ.. అతడిని ఉద్యోగం నుంచి తొలగించింది. దీంతో ఉద్యోగి కోర్టుకు వెళ్లాడు. విచారణ జరిపిన న్యాయస్థానం.. కేవలం అడుగుల ఆధారంగా ఉద్యోగిని తొలగించడం చట్ట విరుద్ధం అని చెప్పిన కోర్టు.. అతడికి అనుకూలంగా తీర్పును ఇచ్చింది. ఇందుకు పరిహారంగా సదరు కంపెనీ.. ఆ ఉద్యోగికి రూ. 15 లక్షలకు పైగా నష్టపరిహారం చెల్లించాలని ఆదేశాలు జారీ చేసింది. మరి ఈ ఘటన ఎక్కడ చోటు చేసుకుందంటే..?

అసలేం జరిగిందంటే..?

ఈ వివాదం 2019లో చైనాలోని జియాంగ్సు ప్రావిన్స్‌లో వెలుగు చూసింది. చెన్ అనే వ్యక్తి ఓ కంపెనీలో ఉద్యోగం చేస్తుండగా.. అతడికి వెన్ను నొప్పి వచ్చింది. వైద్యుల ధ్రువీకరణతో కొంతకాలం సెలవు తీసుకున్నాడు. కొద్దిరోజులు తిరిగిన తర్వాత మళ్లీ విధుల్లో చేరినప్పటికీ.. వెంటనే కుడి పాదంలో నొప్పి కారణంగా మరోసారి సిక్ లీవ్ కోసం దరఖాస్తు చేసుకున్నాడు. వైద్యులు కూడా అతడు కాలి నొప్పితో బాధపడుతున్నట్లు నిర్ధారించి వారం విశ్రాంతి అవసరమని సూచించారు.

చెన్ పదేపదే సెలవులు తీసుకోవడంపై అనుమానం వచ్చిన కంపెనీ యాజమాన్యం అతన్ని హాస్పిటల్ డాక్యుమెంట్లు సమర్పించడానికి ఆఫీస్‌కు రమ్మని కోరింది. చెన్ ఆఫీస్‌కు చేరుకున్నా.. సెక్యూరిటీ అతన్ని లోపలికి అనుమతించలేదు. కానీ కొన్ని రోజుల తర్వాత కంపెనీ అతన్ని అనారోగ్య పరిస్థితి గురించి తప్పుగా చెప్పాడని ఆరోపిస్తూ ఉద్యోగం నుంచి తొలగించింది. దీంతో చెన్ కోర్టును ఆశ్రయించాడు. ఈక్రమంలోనే కంపెనీ తరఫు న్యాయవాదులు కోర్టులో కీలక ఆధారాలను సమర్పించారు. పాదాల నొప్పి కారణంగా విశ్రాంతి తీసుకున్న చెన్.. అదే రోజు 16,000 అడుగులు నడిచినట్లు చాట్ సాఫ్ట్‌వేర్ రికార్డు ద్వారా నిరూపించింది. అంతేకాకుండా అనారోగ్య సెలవు కోసం దరఖాస్తు చేసిన రోజున చెన్ ఆఫీస్ వైపు పరుగెత్తుకుంటూ వచ్చాడని చూపించే నిఘా ఫుటేజీని కూడా సమర్పించింది.

మరోవైపు చెన్ తన సెలవులు వైద్య ధ్రువీకరణతో పూర్తిగా చట్టబద్ధమైనవి అని వాదిస్తూ లేబర్ ఆర్బిట్రేషన్ కేసు దాఖలు చేశాడు. సుదీర్ఘ విచారణ, రెండు విభిన్న ట్రయల్స్ తర్వాత న్యాయస్థానం సంచలన తీర్పు ఇచ్చింది. చెన్ వైద్య పత్రాలు చెల్లుబాటు అవుతాయని.. కేవలం అడుగుల సంఖ్య ఆధారంగా కంపెనీ ఉద్యోగిని తొలగించడం చట్టవిరుద్ధం అని కోర్టు స్పష్టం చేసింది. చివరి తీర్పులో భాగంగా.. ఉద్యోగిని చట్టవిరుద్ధంగా తొలగించినందుకు గానూ కంపెనీ అతనికి 1,18,779 యువాన్లు (భారత కరెన్సీ ప్రకారంసుమారు రూ. 14.8 లక్షలు) నష్టపరిహారంగా చెల్లించాలని ఆదేశించింది.