కాలేజీ విద్యార్థిని బ్యాగులో మంగళసూత్రం, మెట్టెలు, ప్రెగ్నెన్సీ కిట్

గుంటూరు నగరంలో జరిగిన ఓ ఘటన స్థానికంగా కలకలం రేపింది. గుంటూరులోని ఓ వెల్ఫేర్ హాస్టల్‌లో.. ఓ విద్యార్థిని బ్యాగులో మంగళసూత్రం , మెట్టెలు, ప్రెగ్నెన్సీ కిట్ బయటపడినట్లు తెలిసింది. వారం రోజుల కిందట జరిగిన ఈ ఘటన కాస్త ఆలస్యంగా వెలుగులోకి వచ్చింది. ఓ సంక్షేమ హాస్టల్‌లో ఈ ఘటన జరిగిందంటూ వార్తలు వచ్చాయి. హాస్టల్ విద్యార్థినుల లగేజీలు, బ్యాగులను పరిశీలించే సమయంలో.. ఓ విద్యార్థిని బ్యాగులో మంగళసూత్రం, మెట్టెలు, ప్రెగ్నెన్సీ కిట్ బయటపడినట్లు సమాచారం. హాస్టల్ సిబ్బంది ఈ విషయాన్ని హాస్టల్ వార్డెన్‌కు చేరవేయగా.. హాస్టల్ వార్డెన్ ఉన్నతాధికారుల దృష్టికి తీసుకెళ్లినట్లు సమాచారం. అయితే అధికారులు ఈ విషయాన్ని రహస్యంగా ఉంచినట్లు వార్తలు వస్తున్నాయి.

ఇక ఈ ఘటనకు సంబంధించిన సమాచారం మీడియాకు తెలియడంతో బుధవారం రాత్రి ఉన్నతాధికారులు సంక్షేమ హాస్టల్‌ను ఆకస్మికంగా తనిఖీ చేసినట్లు తెలిసింది. ప్రతి గదిని పరిశీలించినట్లు సమాచారం. హాస్టల్‌లో అపరిశుభ్ర వాతావరణం ఉండటం చూసి హాస్టల్ సిబ్బందిపై ఆగ్రహం వ్యక్తం చేసినట్లు తెలిసింది. మరోవైపు హాస్టల్ విద్యార్థిని విషయంపై మీడియా ఉన్నతాధికారులను వివరణ కోరగా.. అలాంటి ఘటనలు చోటుచేసుకోలేదని వెల్లడించారు. అలాగే అలాంటి ఘటనలపై తమ దృష్టికి ఎలాంటి ఫిర్యాదులు రాలేదని తెలిపారు.

మరోవైపు తన వద్ద అప్పు తీసుకున్న వ్యక్తులు తిరిగి డబ్బులు చెల్లించడం లేదంటూ ఫిరంగిపురంలో ఓ వ్యక్తి సెల్ టవర్ పైకి ఎక్కి ఆందోళన చేశాడు. అప్పు తీసుకున్న వారు తిరిగివ్వడం లేదంటూ ఆత్మహత్య చేసుకుంటానని బెదిరించాడు. స్థానికులు ఈ విషయాన్ని గమనించి.. పోలీసులకు సమాచారం అందించారు. పోలీసులు ఘటనా స్థలికి చేరుకుని.. నచ్చజెప్పి కిందకు దించారు. మరోవైపు సెల్ టవర్ ఎక్కిన వ్యక్తి పేరు భూషణం అని.. అతనిది ఫిరంగిపురంగా పోలీసులు గుర్తించారు. సెల్ టవర్లకు, నివాసాలకు రంగులు వేస్తుంటాడని.. దీనితో పాటుగా ఆటో నడుపుతూ జీవనం సాగిస్తుంటాడని వివరించాడు.

అయితే రియల్ ఎస్టేట్ వ్యాపారం చేసే ఓ వ్యక్తి.. మధ్యవర్తి ద్వారా భూషణం వద్ద నుంచి ఐదు లక్షల రూపాయలు అప్పుగా తీసుకుని.. నాలుగేళ్ల నుంచి రూపాయి కూడా చెల్లించలేదని భూషణం కుటుంబసభ్యులు చెప్తున్నారు. ఇళ్లు తాకట్టుపెట్టి భూషణం ఆ డబ్బులు తెచ్చిచ్చినట్లు అతని కుటుంబసభ్యులు చెప్తున్నారు. ఆ మనస్తాపంతోనే సెల్ టవర్ పైకి ఎక్కినట్లు తెలిసింది. అయితే పోలీసులు, కుటుంబసభ్యులు నచ్చజెప్పడంతో శాంతించి కిందకు దిగారు.