లైఫ్ సర్టిఫికెట్ రిజెక్ట్ అయితే పెన్షన్ ఆగిపోతుందా

కేంద్ర, రాష్ట్ర ప్రభుత్వ పెన్షనర్లు ప్రతి సంవత్సరం నవంబర్ 30వ తేదీ లోపు లైఫ్ సర్టిఫికెట్ ( జీవన్ ప్రమాణ్ పత్రం ) సమర్పించడం తప్పనిసరి. పింఛనుదారులు తమ ఉనికిని ధ్రువీకరించుకోవడానికి ఈ సర్టిఫికెట్ చాలా ముఖ్యం. సాంప్రదాయ పద్ధతిలో బ్యాంకులకు వెళ్లకుండా, ఇప్పుడు ఆధార్ ఆధారిత బయోమెట్రిక్ సదుపాయంతో డిజిటల్ లైఫ్ సర్టిఫికెట్ సమర్పించే అవకాశం ఉంది. అయితే, ఈ డిజిటల్ విధానంలో కూడా కొన్నిసార్లు సాంకేతిక లేదా సమాచార లోపాల వల్ల సర్టిఫికెట్ తిరస్కరణకు గురయ్యే అవకాశముంది. మరి ఇలా రిజెక్ట్ అయితే పింఛను ఆగిపోతుందా? పించనుదారులు వెంటనే చేయాల్సిన పనులు ఏంటి? తెలుసుకుందాం.

తిరస్కరణకు ప్రధాన కారణాలు

జీవన్ ప్రమాణ్ పోర్టల్, బ్యాంకుల సమాచారం ప్రకారం, డిజిటల్ లైఫ్ సర్టిఫికెట్ తిరస్కరణకు ప్రధానంగా పెన్షన్ పంపిణీ ఏజెన్సీ అంటే బ్యాంకు లేదా పోస్టాఫీస్ వద్ద ఉన్న రికార్డులతో మీరు లైఫ్ సర్టిఫికెట్ కోసం సమర్పించిన వివరాలు సరిపోలకపోవడం, పెన్షన్ పేమెంట్ ఆర్డర్ నంబర్‌ను సరిగా నమోదు చేయకపోవడం. బ్యాంకు లేదా ట్రెజరీ ఖాతా వివరాలు తప్పుగా ఇవ్వడం వంటివి కారణాలవుతుంటాయి. అలాగే పేరు, పుట్టిన తేదీ వంటి వివరాలు ఆధార్ కార్డులోని డేటాతో సరిపోలకపోవడం, వేలిముద్రలు లేదా ఐరిస్ (కంటిపాప) స్కాన్ స్పష్టంగా లేకపోవడం, కాలక్రమేణా లేదా అనారోగ్యం కారణంగా బయోమెట్రిక్ వివరాలు ఆధార్ రికార్డులతో సరిపోలకపోవడం, పెన్షన్ ఖాతాకు సరైన ఆధార్ నంబర్‌ను అనుసంధానం చేయకపోవడం వంటివీ రిజెక్ట్ చేసేందుకు కారణాలవుతుంటాయి.

డిజిటల్ లైఫ్ సర్టిఫికెట్ తిరస్కరణకు గురైనట్లు ఎస్ఎంఎస్ లేదా వెబ్ పోర్టల్‌లో స్టేటస్ ద్వారా తెలుసుకుని వెంటనే ఈ చర్యలు తీసుకోవచ్చు. ముందుగా, మీ పెన్షన్ పంపిణీ ఏజెన్సీ (బ్యాంక్ లేదా పోస్టాఫీస్)ని సంప్రదించి తిరస్కరణకు గల నిర్దిష్ట కారణాన్ని తెలుసుకోవాలి. తిరస్కరణకు గల కారణం ఎస్ఎంఎస్‌లో స్పష్టంగా లేకపోతే నేరుగా వెళ్లి కనుక్కోవడం చాలా ముఖ్యం. మీ పీపీఓ నంబర్, బ్యాంక్ అకౌంట్ నంబర్, పేరు లేదా పుట్టిన తేదీ వంటి వివరాల్లో తప్పులు ఉంటే మొదట ఆ వివరాలను సరి చేయాలి. అవసరమైతే, మీ పీడీఏ రికార్డుల్లో కూడా మార్పులు చేయించాలి.

అన్ని వివరాలను సరి చేసుకున్న తర్వాత కొత్త జీవన్ ప్రమాణ్‌తో మరో డిజిటల్ లైఫ్ సర్టిఫికెట్‌ను సమర్పించాలి. ఈసారి, బయోమెట్రిక్ అథెంటికేషన్ స్పష్టంగా, సరిగ్గా జరిగేలా చూసుకోవాలి. ఒకవేళ సాంకేతిక సమస్యల వల్ల లేదా బయోమెట్రిక్ మార్పుల వల్ల లైఫ్ సర్టిఫికెట్ సమర్పించడం అసాధ్యమైతే మీరు మీ మాన్యువల్‌గా లైఫ్ సర్టిఫికెట్‌ను సమర్పించవచ్చు. పెన్షనర్లు తమ ప్రమాణ్ ఐడీ'ని ఉపయోగించి జీవన్ ప్రమాణ్ అధికారిక పోర్టల్ jeevanpramaan.gov.in లో మీ డిజిటల్ లైఫ్ సర్టిఫికెట్‌ను అంగీకరించారా లేదా తిరస్కరించారా లేదా పెండింగ్‌లో ఉందా? అనే స్టేటస్‌ను ఎప్పుడైనా తనిఖీ చేసుకోవాలి.

డీఎల్‌సీ రిజెక్ట్ చేసిన వెంటనే పెన్షన్ అనేది ఆగిపోదు. అందుకు తగిన సమయం ఇస్తారు. మీరు వీలైనంత త్వరగా మీ జీవన్ ప్రమాణ్ పత్రం సమర్పించి సమస్యను పరిష్కరించుకోవడం చాలా ముఖ్యం. సాధారణంగా, నవంబర్ 30 నాటికి లైఫ్ సర్టిఫికెట్ అందకపోతే డిసెంబర్ నెల పింఛను నిలిపివేసే అవకాశం ఉంటుంది. అయితే తిరస్కరణ అయినప్పుడు కూడా, మీరు నిర్లక్ష్యం చేసి, ఆ తర్వాత కూడా కొత్త సర్టిఫికెట్‌ను సమర్పించకపోతే పింఛను ఆగిపోతుంది.