జుట్టు ఊడకుండా ఉండాలంటే.. ఈ హెయిర్‌స్టైల్స్‌కి దూరంగా ఉండండి!

చాలా మంది అమ్మాయిలు ఫ్యాషన్ కోసం గట్టిగా కట్టిన పోనీటెయిల్స్, కార్న్‌రోస్, బన్స్, హెయిర్ ఎక్స్‌టెన్షన్స్‌ని ఎంచుకుంటారు. కానీ ఈ స్టైల్స్ మీ జుట్టుని శాశ్వతంగా దెబ్బతీస్తాయని మీకు తెలుసా? అమెరికన్ అకాడమీ ఆఫ్ డెర్మటాలజీ (AAD) హెచ్చరిస్తోంది – ఇలాంటి గట్టి హెయిర్‌స్టైల్స్ వల్ల స్కాల్ప్‌లో రక్తప్రసరణ తగ్గి, జుట్టు మూలాలు బలహీనపడి ఊడిపోతాయి. దీన్ని నిపుణులు “ట్రాక్షన్ అలోపేషియా” అంటారు.
ఈ సమస్య ఎలా మొదలవుతుందంటే.. జుట్టుని ఎప్పుడూ ఒకే దిక్కున గట్టిగా లాగి కట్టడం వల్ల హెయిర్ ఫాలికల్స్‌పై నిరంతర ఒత్తిడి పడుతుంది. మొదట్లో కొంచెం జుట్టు రాలడం, తర్వాత ఫోర్‌హెడ్, దవడల పక్కన బట్టతల మచ్చలు కనిపించడం మొదలవుతాయి. చాలా మందికి ఈ దశలోనే సమస్య గుర్తించకపోవడంతో, తిరిగి జుట్టు రావడం కష్టమవుతుందని వైద్యులు చెబుతున్నారు.
ముఖ్యంగా ఆఫ్రికన్-అమెరికన్ మహిళల్లో ఈ రకమైన హెయిర్ లాస్ ఎక్కువగా కనిపిస్తోంది. కారణం – కార్న్‌రోస్, వీవ్స్, బ్రెయిడ్స్, హెవీ ఎక్స్‌టెన్షన్స్ వంటివి ఎక్కువ కాలం పాటు ఉంచడం. భారతీయ మహిళల్లోనూ గట్టి జడలు, హై పోనీటెయిల్స్, రోజూ ఒకేలా కట్టడం వల్ల ఇదే సమస్య వస్తోంది. చిన్న వయసులోనే హెయిర్‌లైన్ వెనక్కి వెళ్లిపోవడం గభాళున గమనిస్తున్నారు.
అయితే భయపడాల్సిన అవసరం లేదు! జుట్టుని ఎప్పుడూ గట్టిగా లాగకుండా, లూజ్ హెయిర్‌స్టైల్స్ ప్రయత్నించండి. రోజువారీగా స్టైల్ మార్చడం, రాత్రి పూర్తిగా విప్పేయడం, సిల్క్ స్క్రంచీలు లేదా మెత్తని హెయిర్ బ్యాండ్స్ ఉపయోగించడం.. ఇలా చిన్న చిన్న అలవాట్లతోనే మీ జుట్టుని రక్షించుకోవచ్చు. మీ అందాన్ని పెంచే స్టైల్ మీ జుట్టుని దెబ్బతీయకూడదు కదా!