సెకండ్ హ్యాండ్ బండి కొంటున్నారా.. ఈ జాగ్రత్తలు తప్పనిసరి

ఈ మధ్యకాలంలో సెకండ్ హ్యాండ్ వాహనాల వినియోగం బాగా పెరిగింది. చిరుద్యోగులు, విద్యార్థులు ఎక్కువగా పాత వాహనాలను కొనుగోలు చేయడానికి మొగ్గు చూపుతున్నారు. కొత్త వాహనం, తక్కువ కిలోమీటర్లు తిరిగిన బండి.. తక్కువ ధరకే వస్తోందని కొంతమంది కొనుగోలు చేస్తుంటే.. మరికొందరు ఆర్థిక పరిస్థితుల కారణంగా పాత వాహనాల వైపు మొగ్గు చూపుతున్నారు. దీంతో సెకండ్ హ్యాండ్ బైక్‌ల కొనుగోళ్లు, అమ్మకాలు పెరుగుతున్నాయి. అయితే పాత బండి కొనుగోలు చేసే సమయంలో కొన్ని జాగ్రత్తలు తీసుకోవాలని ఈ రంగంలో నిపుణులు సూచిస్తున్నారు. పాత బండి కొనుగోలు చేసే సమయంలో కొన్ని విషయాలను మరీ ముఖ్యంగా పరిశీలన చేసుకోవాలని.. లేకపోతే ఇబ్బందులు తప్పవంటున్నారు.

ఏ వాహనానికి అయినా ఇంజినే ప్రధానం. కావున పాత బండి కొనుగోలు చేసేముందు ఒకటికి రెండుసార్లు దాని కండీషన్ చెక్ చేసుకోవాలి. అలాగే కుదిరితే మీకు నమ్మకమైన మెకానిక్ సాయం తీసుకోవాలి. వాహనం ఇంజిన్ సామర్థ్యం, పనితీరు ఎలా ఉందనే దానిపై ఓ అంచనాకు వచ్చిన తరువాతే ఆ బండిని కొనుగోలు చేయాలి. గేర్ బాక్సు, టైర్లు, లైట్లు వంటివి కూడా సరి చూసుకోవాల్సి ఉంటుంది. ఇక మైలేజీ పనితీరును కూడా పరిశీలనలో ఉంచుకోవాలి. ఇవన్నీ తెలియాలంటే మీరు కొనుగోలు చేయాలనుకుంటున్న వాహనాన్ని కొంత దూరం నడిపి చూడాలని నిపుణులు సూచిస్తున్నారు.

మరోవైపు ఇటీవలి కాలంలో బైక్ చోరీలు ఎక్కువగా జరుగుతున్నాయి. కొంతమంది దుండగులు ద్విచక్ర వాహనాలను చోరీ చేసి.. నంబర్ ప్లేట్లు మార్చేస్తున్నారు. అలాగే చాసిస్ నంబర్ లేకుండా చేయడం, కలర్ మార్చటం వంటి పనులు కూడా చేస్తున్నారు. పాత బైక్ కొనేముందు ఇలాంటి విషయాలను పరిశీలించుకోవాలి, అ బండి మీద ఏవైనా పోలీస్ కేసులు ఉన్నాయా.. ట్రాఫిక్ చలానాలు నమోదయ్యాయా అనే విషయాలను పరిగణనలోకి తీసుకోవాలని సూచిస్తున్నారు.

ఫైనాన్స్ క్లియర్ చేసి ఉంటే.. ఎన్‌వోసీ. ఆర్సీ పత్రాలను తీసుకోవాలి. అలాగే వాహనం ఆర్సీలోని ఛాసిస్ నంబర్.. బండి మీద ఉన్నదీ ఒకటా కాదా అనేది పరిశీలించుకోవాలి. బండి ఎవరి పేరు మీద రిజిస్ట్రేషన్ ఉందనేదీ కనుక్కోవాలి. ఇవన్నీ పరిశీలించుకున్న తర్వాతే కొనుగోలు చేయాలని సూచిస్తున్నారు.