కానిస్టేబుల్ ఉద్యోగాలకు ఎంపికైన వారికి.. ఆ రోజు నుంచే ట్రైనింగ్ ప్రారంభం

ఆంధ్రప్రదేశ్‌లో కానిస్టేబుల్ ఉద్యోగాలకు ఎంపికైన అభ్యర్థులకు ప్రభుత్వం తీపికబురు చెప్పింది. ఎంతోకాలం ఎదురు చూస్తున్న శిక్షణకు సంబంధించి అప్డేట్ వచ్చింది. ఈ నెల 22 నుంచి కానిస్టేబుల్ అభ్యర్థులకు శిక్షణ ప్రారంభం కానుంది. ముఖ్యమంత్రి చంద్రబాబు నాయుడు ఈ నెల 16న ఈ శిక్షణ కార్యక్రమాన్ని మంగళగిరి బెటాలియన్‌లో లాంఛనంగా ప్రారంభిస్తారు. ఆ రోజు రాష్ట్రవ్యాప్తంగా కానిస్టేబుల్ ఉద్యోగాలకు ఎంపికైన అభ్యర్థులు, వారి తల్లిదండ్రులతో కలిసి హాజరవుతారు. ముఖ్యమంత్రి చంద్రబాబు నాయుడు ప్రారంభోత్సవ కార్యక్రమంలో అభ్యర్థులను ఉద్దేశించి ప్రసంగిస్తారు. తల్లిదండ్రులను కూడా ఈ కార్యక్రమంలో పాల్గొనేలా చేయడం ద్వారా, వారి పిల్లల భవిష్యత్తుకు అండగా నిలిచినందుకు వారికి గౌరవం ఇవ్వాలనే ఉద్దేశ్యంతో ఈ ఏర్పాట్లు చేస్తున్నారు.

ఈ నెల 16 నుంచి 21 వరకు అభ్యర్థులు వారి సొంత ఊళ్లకు వెళతారు. ఆ తర్వాత ఈ నెల 22 నుంచి శిక్షణ ప్రారంభమవుతుంది.. వారంతా 22వ తేదీ లోపు వారికి కేటాయించిన శిక్షణా కేంద్రాల్లో రిపోర్ట్ చేస్తారు. ఆ తర్వాత 22వ తేదీ లోపు వారికి కేటాయించిన పీటీసీ , డీటీసీ, బీటీసీ లలో రిపోర్టు చేయాల్సి ఉంటుంది. ఈ శిక్షణా కేంద్రాల్లో వారికి పోలీసు విధులకు సంబంధించిన అన్ని రకాల శిక్షణ ఇస్తారు. ఇందులో శారీరక దారుఢ్యం, ఆయుధాల వాడకం, చట్టాలపై అవగాహన, ప్రజలతో వ్యవహరించే తీరు వంటివి ఉంటాయి.

రాష్ట్రవ్యాప్తంగా మొత్తం 6,100 కానిస్టేబుల్ పోస్టులకు పరీక్షలు నిర్వహించారు.. అయితే 6,015 మంది ఉద్యోగాలకు ఎంపికయ్యారు. అభ్యర్థుల వెరిఫికేషన్ తర్వాత 5,551 మంది ఫిట్‌ ఫర్‌ ట్రైనింగ్‌ సర్టిఫికేట్ దక్కింది.. వీరికి రెండు దశల్లో 9 నెలల పాటూ శిక్షణ ఇస్తారు. ఈ శిక్షణలో మొదటి దశ నాలుగున్నర నెలల తర్వాత ఒక వారం సెలవులు ఉంటాయి.. ఆ తర్వాత రెండో ఫేజ్ శిక్షణ మొదలవుతుంది. ఈ శిక్షణ ద్వారా కానిస్టేబుల్స్ తమ విధులను సమర్థవంతంగా నిర్వర్తించడానికి అవసరమైన నైపుణ్యాలు నేర్చుకుంటారు.