పూజా సామాగ్రి సైతం కల్తీ ,,,,200 కేజీల కల్తీ నెయ్యి సీజ్

కల్తీ ఆహార పదార్థాల విక్రయాలపై హైదరాబాద్ నార్త్ జోన్ టాస్క్ ఫోర్స్ పోలీసులు ఉక్కుపాదం మోపారు. ప్రజారోగ్యానికి హాని కలిగించే విధంగా కల్తీ నెయ్యిని అమ్ముతున్న ఓ టిఫిన్ సెంటర్ నిర్వాహకుడిని పోలీసులు శనివారం అరెస్టు చేశారు. పోలీసులు వెల్లడించిన వివరాల ప్రకారం.. సికింద్రాబాద్ సెకండ్ బజార్‌కు చెందిన అన్నమలై మోండా మార్కెట్‌లో టిఫిన్ సెంటర్‌ను నడుపుతున్నాడు. అయితే ఆ వ్యాపారంలో నష్టాలు రావడంతో, అన్నమలై అడ్డదారి పట్టి మార్కెట్‌లో ఆవు నెయ్యికి ఉన్న అధిక డిమాండ్‌ను అలుసుగా తీసుకున్నాడు. తక్కువ ఖర్చుతో ఎక్కువ లాభం పొందాలనే దురుద్దేశంతో అతను ఆరోగ్యానికి హానికరం అయిన, చౌకగా లభించే పదార్థాలను ఉపయోగించి కల్తీ నెయ్యి తయారీకి పూనుకున్నాడు.

అన్నమలై ప్రధానంగా కొబ్బరి నూనె, డాల్డా (వనస్పతి), కొన్ని రకాల ఫుడ్ కలర్స్‌ను కలిపి కల్తీ ఆవు నెయ్యిని తయారు చేస్తున్నాడు. ఈ కల్తీ నెయ్యిని అతను 'లుకా' అనే బ్రాండింగ్ పేరుతో ఒక లీటరు ప్యాకెట్‌లలో ప్యాక్ చేసి, మార్కెట్‌లో లీటరు స్వచ్ఛమైన నెయ్యి ధరకు కొద్దిగా తక్కువగా అంటే రూ.600 లకు విక్రయిస్తూ వినియోగదారులను మోసం చేస్తున్నాడు. అలాగే పూజా స్టోర్లలోనూ విక్రయిస్తున్నాడు. పూజా సామాగ్రిలో ఆవు నెయ్యి ప్రధానం కావటంతో.. కల్తీ నెయ్యిని ఆవునెయ్యిగా మార్చి దేవుడిని కూడా వదలకుండా కల్తీ చేస్తున్నాడు.

అన్నమలై తయారు చేస్తున్న ఈ కల్తీ నెయ్యి ప్రజల ఆరోగ్యంపై తీవ్ర ప్రతికూల ప్రభావం చూపుతుందని, ముఖ్యంగా దీర్ఘకాలికంగా గుండె జబ్బులు, కొవ్వు సంబంధిత సమస్యలు వచ్చే అవకాశం ఉందని పోలీసుల విచారణలో తేలింది. విశ్వసనీయ సమాచారం అందుకున్న నార్త్ జోన్ టాస్క్ ఫోర్స్ పోలీసులు.. అన్నమలై ఇంట్లో, టిఫిన్ సెంటర్‌లో ఆకస్మిక సోదాలు నిర్వహించారు. ఈ సోదాల్లో సుమారు 200 కేజీల కల్తీ నెయ్యిని స్వాధీనం చేసుకున్నారు. నిందితుడు అన్నమలైపై ఐపీసీ సెక్షన్ల కింద కేసు నమోదు చేశారు. ఇలాంటి కల్తీ ఆహార పదార్థాలు విక్రయించేవారిపై కఠిన చర్యలు తీసుకుంటామని, ప్రజల ఆరోగ్యాన్ని పణంగా పెట్టే ఇలాంటి వ్యాపారాలను సహించబోమని పోలీసులు హెచ్చరించారు. పండుగల సీజన్లలో ముఖ్యంగా రద్దీ ప్రాంతాల్లో ఆహార నాణ్యతపై మరింత నిఘా పెంచుతామని అధికారులు తెలిపారు.