అమెరికాలో భారతీయ సంతతి యువతి దారుణ హత్య

అగ్రరాజ్యం అమెరికాలో స్థిరపడి ఉజ్వల భవిష్యత్తును నిర్మించుకోవాలనుకున్న ఒక భారతీయ యువతి కలలు కల్లలుగా మారాయి. గత కొన్ని రోజులుగా అదృశ్యమైన 27 ఏళ్ల నిఖితా గోడిశాల.. తన మాజీ ప్రియుడి నివాసంలో రక్తపు మడుగులో శవమై కనిపించడం తీవ్ర కలకలం సృష్టించింది. అత్యంత క్రూరంగా కత్తితో పొడిచి ఆమెను ఎవరో హత్య చేసినట్లు పోలీసులు నిర్ధారించారు.

అసలేం జరిగిందంటే?

అమెరికాలోని మేరీల్యాండ్‌ స్టేట్ ఎల్లికాట్ సిటీలో నివసిస్తున్న 27 ఏళ్ల నిఖితా గోడిశాల.. ఒక ప్రముఖ సంస్థలో 'డేటా అండ్ స్ట్రాటజీ అనలిస్ట్'గా పని చేస్తున్నారు. కొత్త ఏడాది వేడుకల సమయంలో అంటే డిసెంబర్ 31వ తేదీన ఆమె అదృశ్యం అయ్యారు. అయితే ఆమె మాజీ ప్రియుడు అర్జున్ శర్మ జనవరి 2వ తేదీన నిఖిత కనిపించడం లేదంటూ పోలీసులకు ఫిర్యాదు చేశాడు. డిసెంబర్ 31వ తేదీనే ఆమెను చివరి సారిగా తాన తన అపార్ట్‌మెంట్‌లో చూసినట్లు వివరించాడు. కేసు నమోదు చేసుకున్న పోలీసులు దర్యాప్తు చేస్తున్నారు. ముఖ్యంగా ఆమె కోసం తీవ్రంగా గాలిస్తున్నారు.

ఎంత వెతికినా లాభం లేకపోవడంతో.. పోలీసులకు తమకు సమాచారం అందించిన అర్జున్ శర్మపై అనుమానం మొదలైంది. దీంతో హోవార్డ్ కౌంటీ పోలీసులు.. జనవరి 3వ తేదీన అతడి అపార్ట్‌మెంట్‌పై సెర్చ్ వారెంట్‌తో దాడులు నిర్వహించారు. ఈ క్రమంలోనే అక్కడి ఓ గదిలో నిఖితా మృతదేహం కత్తిపోట్లతో కనిపించింది. అయితే పోలీసులకు ఫిర్యాదు చేసిన రోజే అర్జున్ శర్మ తెలివిగా విమానం ఎక్కి భారతదేశానికి పారిపోయినట్లు విచారణలో వెల్లడైంది. నేరం తనపైకి రాకుండా ఉండేందుకే తానే స్వయంగా మిస్సింగ్ కేసు పెట్టి.. పోలీసులు సోదాలు చేసేలోపే దేశం దాటి వెళ్లిపోయినట్లు దర్యాప్తు అధికారులు గుర్తించారు.

నిఖితా హత్యోదంతంపై అమెరికాలోని భారత రాయబార కార్యాలయం తీవ్ర దిగ్భ్రాంతి వ్యక్తం చేసింది. బాధితురాలి కుటుంబ సభ్యులతో తాము టచ్‌లో ఉన్నామని.. మృతదేహాన్ని భారత్‌కు తరలించడంతో పాటు అన్ని రకాల దౌత్యపరమైన సహాయ సహకారాలు అందిస్తున్నట్లు వెల్లడించింది. మరోవైపు నిందితుడు అర్జున్ శర్మ కోసం మేరీల్యాండ్ పోలీసులు అరెస్ట్ వారెంట్ జారీ చేశారు. అతడిని పట్టుకునేందుకు అమెరికా ఫెడరల్ ఏజెన్సీలతో పాటు భారతీయ అధికారులతో కూడా సంప్రదింపులు జరుపుతున్నారు.

నిఖితా గోడిశాల మరణవార్త విన్న ఆమె కుటుంబ సభ్యులు కన్నీరు మున్నీరు అవుతున్నారు. ఉన్నత ఉద్యోగంలో ఉంటూ మంచిపేరు తెచ్చుకుంటున్న కూతురు.. ఇలా మాజీ ప్రియుడి చేతిలో ప్రాణాలు కోల్పోవడాన్ని వారు తట్టుకోలేకపోతున్నారు. నిందితుడు అర్జున్ శర్మను తక్షణమే అరెస్ట్ చేసి కఠినంగా శిక్షించాలని వారు కోరుతున్నారు.