12 ఓవర్లలోనే 160 రన్స్,,,,పాకిస్తాన్ ప్రీమియమ్ ఫాస్ట్ బౌలర్లను ఉతికారేసిన శ్రీలంక బ్యాటర్లు

ఐసీసీ టీ20 వరల్డ్ కప్ 2026 ప్రారంభానికి ముందు పాకిస్తాన్ ప్రీమియమ్ పేస్ బౌలర్ల పరువు పోయింది. శ్రీలంకతో జరిగిన టీ20 మ్యాచ్‌లో భారీగా పరుగులు సమర్పించుకున్నారు. ఈ మ్యాచ్‌లో ఆడిన అందరు బౌలర్లు రేపు జరిగే టీ 20 వరల్డ్ కప్ జట్టులో ఉన్నవాళ్లే కావడం గమనార్హం. రాంగిరి దంబుల్లా అంతర్జాతీయ స్టేడియం వేదికగా జరిగిన ఈ మ్యాచ్‌లో శ్రీలంక జట్టు 14 పరుగుల తేడాతో విజయం సాధించింది.

శ్రీలంక - పాకిస్తాన్ టీ 20 సిరీస్‌లో భాగంగా ఆదివారం జరిగిన ఆఖరి మ్యాచ్ రసవత్తరంగా సాగింది. వర్షం కారణంగా 12 ఓవర్లకు కుదించిన ఈ మ్యాచ్‌లో శ్రీలంక బ్యాటర్లు రెచ్చిపోయి ఆడారు. టాస్ గెలిచిన పాకిస్తాన్ జట్టు శ్రీలంకను బ్యాటింగ్‌కు ఆహ్వానించింది. పిచ్ తడిగా ఉండటంతో పాకిస్తాన్ బౌలర్లు ఈ మ్యాచ్‌లో తేలిపోయారు.

ఓపెనర్ పాతుమ్ నిస్సాంక డకౌట్ కాగా, మరో ఓపెనర్ కమిల్ మిశారా 8 బంతుల్లో 20 పరుగులు బాది అద్భుత ఆరంభం ఇచ్చాడు. ఇదే జోష్‌ని కొనసాగించిన మిగతా బ్యాటర్లు కూడా హిట్టింగ్‌‌కే ప్రాధాన్యత ఇచ్చి స్కోర్ బోర్డును పరుగులు పెట్టించారు. కుశాల్ మెండిస్ 16 బంతుల్లో 30, ధనుంజయ డిసెల్వ 22, చరిత అసలం 21 పరుగులు నమోదు చేశారు.

ఇక ఆఖర్లో కెప్టెన్ దాసున్ శానక 9 బంతుల్లో 5 సిక్సర్లతో 34 పరుగులు బాది స్కోర్ బోర్డుని పరుగులు పెట్టించాడు. జనిత్ లియనగే 8 బంతుల్లో 22 పరుగులు బాదడంతో శ్రీలంక జట్టు నిర్ణీత 12 ఓవర్లలో 6 వికెట్ల నష్టానికి 160 పరుగులు చేసింది. పాకిస్తాన్ బౌలర్లలో మొహమ్మద్ వసీజ్ జూనియర్ 3 ఓవర్లలో 54 పరుగులు సమర్పించుకుని 3 వికెట్లు తీసుకున్నాడు.

161 పరుగులతో బరిలోకి దిగిన పాకిస్తాన్ జట్టు కూడా పోటీ ఇచ్చింది. ఓపెనర్లు విఫలమయినప్పటికీ కెప్టెన్ సల్మాన్ అఘా హిట్టింగ్‌తో మ్యాచ్‌ని నిలబెట్టాడు. 12 బంతుల్లో 5 ఫోర్లు, 3 సిక్సర్లతో 45 పరుగులు చేసి అవుటయ్యాడు. మొహమ్మద్ నవాజ్ 28, ఖవాజా నఫాయ్ 26 పరుగులు చేశారు. మిగతా బ్యాటర్లు సింగిల్ డిజిట్‌కే అవుటవ్వడంతో పాకిస్తాన్ 12 ఓవర్లలో 8 వికెట్ల నష్టానికి 146 పరుగులు మాత్రమే చేయగలిగింది. దాంతో శ్రీలంక 14 పరుగుల తేడాతో విజయం సాధించింది.

శ్రీలంక బౌలర్లలో వానిందు హసరంగ 3 ఓవర్లలో 4 వికెట్లు తీసుకుని 35 పరుగులు ఇవ్వగా, మతీషా పతిరణా 2 వికెట్లు తీసుకున్నాడు. నాలుగు వికెట్లు తీసుకున్న హసరంగకి ప్లేయర్ ఆఫ్ ది మ్యాచ్ అవార్డు దక్కింది. మొత్తం మూడు మ్యాచ్‌ల టీ20 సిరీస్‌లో తొలి మ్యాచ్‌లో పాకిస్తాన్ విజయం సాధించగా, రెండో మ్యాచ్ వర్షం కారణంగా రద్దయింది. డిసైడర్ మ్యాచ్‌లో శ్రీలంక విజయం సాధించి సిరీస్‌ను సమం చేసింది.