ఆయుష్ బడోనీని .... అందుకే సెలెక్ట్ చేశామంటూ క్లారిటీ ఇచ్చిన టీమిండియా

న్యూజిలాండ్‌తో జరిగిన మొదటి వన్డేలో గాయపడిన వాషింగ్టన్ సుందర్ స్థానంలో అనూహ్యంగా ఆయుష్ బడోనీకి బీసీసీఐ ఛాన్స్ ఇచ్చింది. అయితే దీనిపై చాలా విమర్శలే వచ్చాయి. రెండో వన్డేకు ముందు జరిగిన ప్రెస్‌మీట్‌లో టీమిండియా బ్యాటింగ్ కోచ్ సితాంశు కోటక్, బడోని ఎంపిక వెనక ఉన్న కారణాలను వివరించాడు. వాషింగ్టన్ సుందర్ లాంటి ఆల్‌రౌండర్ గాయపడితే, అతని స్థానాన్ని భర్తీ చేసే ఆటగాడు బ్యాటింగ్‌తో పాటు బౌలింగ్ చేయగలగాలని కోటక్ స్పష్టం చేశాడు.

"వాషింగ్టన్ లాంటి ఆటగాడు జట్టులో లేకపోతే కేవలం ఐదుగురు బౌలర్లతో ఆడటం ప్రమాదకరం. మ్యాచ్ మధ్యలో ఎవరికైనా గాయం అయితే మిగతా ఓవర్లు ఎవరు వేస్తారు? అందుకే ఆరో బౌలింగ్ ఆప్షన్ చాలా అవసరం. ఆయుష్ బడోని బ్యాటింగ్‌తో పాటు అవసరమైనప్పుడు నాలుగు లేదా ఐదు ఓవర్లు వేయగలడు," అని కోటక్ తెలిపాడు.

బడోని భారత్-ఏ తరఫున లభించిన అవకాశాల్లో మంచి ప్రదర్శన చేశాడని, ఐపీఎల్‌లోనూ నిలకడగా రాణించాడని కోటక్ పేర్కొన్నాడు. "సెలెక్టర్లు జట్టును ఎంపిక చేస్తారు. కానీ సాధారణంగా చూస్తే వాషింగ్టన్ అవుట్ అయితే అతని తరహా ఆటగాడినే తీసుకోవాలి. ఆయుష్‌కు వైట్‌బాల్ క్రికెట్‌లో మంచి అనుభవం ఉంది. అతను బ్యాట్‌తో పాటు బౌలింగ్ చేయగలడు" అని అన్నాడు.

ఇప్పటి వరకు 27 లిస్ట్-ఏ మ్యాచ్‌లు ఆడిన బడోని 693 పరుగులు సాధించాడు. అతని సగటు 36.47 కాగా, స్ట్రయిక్‌రేట్ 93కి పైగా ఉంది. ఒక శతకం, ఐదు అర్ధశతకాలు అతని ఖాతాలో ఉన్నాయి. బౌలింగ్‌లో 18 వికెట్లు పడగొట్టి 29.72 సగటుతో మంచి ఆల్‌రౌండ్ గణాంకాలు నమోదు చేశాడు.

ఐపీఎల్‌లో లక్నో సూపర్ జెయింట్స్ తరఫున ఆడుతున్న బడోని, ఇప్పటి వరకు 56 మ్యాచ్‌లు ఆడి 963 పరుగులు చేశాడు. అతని స్ట్రయిక్‌రేట్ 138.56 కాగా, ఆరు అర్ధశతకాలు ఉన్నాయి. మిడిల్ ఆర్డర్ బ్యాటర్‌గా జట్టుకు కీలకంగా మారాడు. వాషింగ్టన్ సుందర్‌కు లైక్-టు-లైక్ రీప్లేస్‌మెంట్‌గా ఆయుష్ బడోనిని ఎంపిక చేయడం పూర్తిగా జట్టు అవసరాల కోసమేనని టీమిండియా స్పష్టం చేసింది. బ్యాటింగ్‌తో పాటు బౌలింగ్ ఆప్షన్ ఉండటం వల్లే బడోనికి అవకాశం దక్కిందని కోచ్ కోటక్ వ్యాఖ్యలు చేశాడు.