ఎయిరిండియా విమానానికి తప్పిన ప్రమాదం.. బ్యాగేజీ కంటైనర్‌ను లాగేసుకున్న ఇంజిన్

ఢిల్లీలోని ఇందిరాగాంధీ ఇంటర్నేషనల్ ఎయిర్‌పోర్టులో ఎయిరిండియా విమానంలో భారీ లోపాన్ని సిబ్బంది గుర్తించారు. ఎయిరిండియాకు చెందిన అత్యాధునిక ఎయిర్‌బస్ ఏ350 విమానం ఇంజిన్‌లోకి పొరపాటున ఒక బ్యాగేజీ కంటెయినర్ వెళ్లినట్లు సిబ్బంది కనిపెట్టారు. దీంతో విమానం ఇంజిన్ తీవ్రంగా దెబ్బతిన్నట్లు తెలిపారు. అయితే న్యూయార్క్ వెళ్లాల్సిన ఆ విమానం.. ఇరాన్ ఎయిర్‌స్పేస్ మూసివేయడంతో.. గాల్లోకి ఎగిరిన కొద్దిసేపటికి తిరిగి వెనక్కి వచ్చి ల్యాండ్ అయింది. ఈ క్రమంలోనే దాని ఇంజి‌న్‌ బ్యాగేజీ కంటైనర్‌ను లాగేసుకున్నట్లు సిబ్బంది గుర్తించారు. వెంటనే అప్రమత్తమై దానికి మరమ్మత్తులు చేపట్టారు.

ఎయిరిండియాకు చెందిన ఏఐ101 విమానం.. ఢిల్లీ నుంచి న్యూయార్క్ వెళ్లాల్సి ఉంది. విమానం టేకాఫ్ అయిన కొద్దిసేపటికే ఇరాన్ గగనతలం మూసివేయడంతో.. పైలట్లు విమానాన్ని తిరిగి ఢిల్లీకి తీసుకొచ్చి ల్యాండ్ చేశారు. ఢిల్లీలో విమానం సురక్షితంగా ల్యాండ్ అయిన తర్వాత.. దట్టమైన పొగమంచులో రన్‌వేపై నెమ్మదిగా వెళ్లి ఆగింది. ఆ సమయంలో విమానం కుడి వైపు ఇంజిన్.. రన్‌వే పక్కన ఉన్న ఒక ఖాళీ బ్యాగేజీ కంటెయినర్‌ను తనలోకి లాగేసుకుంది.

ఈ ఘటన జరిగిన సమయంలో విమానంలో ప్రయాణికులు, ఎయిరిండియా సిబ్బంది ఉన్నారు. అయితే.. అప్పటికే విమానం పార్కింగ్ బే వైపు వెళ్తుండటంతో పెను ప్రమాదం తప్పింది. ఈ ఘటనలో విమానంలోని ప్రయాణికులు అందరూ సురక్షితంగా ఉన్నారని ఎయిరిండియా సంస్థ తెలిపింది. వారికి ప్రత్యామ్నాయ ప్రయాణ ఏర్పాట్లు లేదా రీఫండ్‌లు అందజేస్తున్నామని ఎయిరిండియా ప్రతినిధి వెల్లడించారు.

ఇక బ్యాగేజీ కంటెయినర్ లోపలికి వెళ్లడంతో విమానం ఇంజిన్‌లోని బ్లేడ్లు తీవ్రంగా దెబ్బతిన్నాయి. దీంతో ఆ విమానాన్ని ప్రస్తుతం గ్రౌండ్ చేశారు. ఎయిరిండియా వద్ద ఉన్న పరిమిత ఏ350 విమానాల్లో ఇది ఒకటి కావడంతో.. రాబోయే కొన్ని రోజుల్లో న్యూయార్క్ సహా ఇతర ఇంటర్నేషనల్ రూట్లలో విమాన సర్వీసులకు అంతరాయం కలిగే అవకాశం ఉందని సంబంధిత వర్గాలు తెలిపాయి. ఈ ఘటనపై డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ) సీరియస్ అయ్యింది. విమానం ఇంజిన్ దగ్గరకు బ్యాగేజీ కంటెయినర్ ఎలా వచ్చింది.. గ్రౌండ్ స్టాఫ్ నిర్లక్ష్యం ఉందా.. లేదా దట్టమైన పొగమంచు వల్ల ఇది జరిగిందా అనే కోణంలో విచారణ చేపట్టింది.