రషీద్ ఖాన్.. T20 క్రికెట్‌లో 700 వికెట్ల మైలురాయి సాధించిన మిస్టరీ స్పిన్నర్

అఫ్గానిస్థాన్ లెగ్ స్పిన్నర్ రషీద్ ఖాన్ T20 క్రికెట్ చరిత్రలో ఒక కొత్త రికార్డు సృష్టించారు. ఇవాళ T20 వరల్డ్ కప్ మ్యాచ్‌లో యునైటెడ్ అరబ్ ఎమిరేట్స్ (UAE)తో జరిగిన పోరులో UAE బ్యాటర్ ముహమ్మద్ అర్ఫాన్‌ను ఔట్ చేయడంతో ఈ ఫార్మాట్‌లో 700 వికెట్లు తీసిన తొలి ప్లేయర్‌గా నిలిచారు. అన్ని T20 లీగ్‌లు, అంతర్జాతీయ మ్యాచ్‌లు కలిపి ఈ ఘనత సాధించిన రషీద్, క్రికెట్ ప్రపంచంలో సంచలనం రేపారు. ఈ మైలురాయి వికెట్ హిట్ వికెట్ రూపంలో వచ్చింది, ఇది ఆయన 699 వికెట్లలో ఎప్పుడూ లేని అసాధారణ విధానం.
ఈ 700వ వికెట్‌తో రషీద్ ఖాన్ T20లో అత్యధిక వికెట్ల జాబితాలో భారీ ఆధిక్యంలో ఉన్నారు. అఫ్గానిస్థాన్ తరఫున అంతర్జాతీయ T20లలో ఇది ఆయన 191వ వికెట్. డొమెస్టిక్ T20 టోర్నమెంట్లలో 509 వికెట్లు తీసిన రషీద్, మొత్తం 700కి చేరుకున్నారు. ఈ రికార్డు సాధనలో ఆయన వయస్సు కేవలం 27 ఏళ్లు మాత్రమే కావడం విశేషం.
రషీద్ ఖాన్ తర్వాతి స్థానాల్లో ఉన్న గొప్ప బౌలర్లు ఇప్పటికే రిటైర్ అయిన డ్వేన్ బ్రావో (631 వికెట్లు), యాక్టివ్‌గా ఉన్న సునీల్ నరైన్ (613* వికెట్లు) ఉన్నారు. రషీద్ ఇప్పటికే T20లో అత్యధిక బ్యాటర్లను (432) ఔట్ చేసిన రికార్డు కలిగి ఉన్నారు. అలాగే బౌల్డ్ లేదా LBW ద్వారా అత్యధిక వికెట్లు (379) తీసిన బౌలర్‌గా కూడా నిలిచారు.
ఈ సాధన అఫ్గానిస్థాన్ క్రికెట్‌కు, ముఖ్యంగా రషీద్ ఖాన్‌కు గర్వకారణం. T20 వరల్డ్ కప్‌లో ఆఫ్ఘనిస్తాన్ యునైటెడ్ అరబ్ ఎమిరేట్స్‌పై 5 వికెట్ల తేడాతో గెలిచిన ఈ మ్యాచ్‌లో రషీద్ 4 ఓవర్లలో 1/24 ఫిగర్స్‌తో రాణించారు. భవిష్యత్తులో మరిన్ని రికార్డులు బద్దలు కొట్టే అవకాశం ఆయన వద్ద ఉంది.