ముఖం మీద ఉన్న మొటిమలు తగ్గేందుకు ఏం తినాలి

అందమైన, ప్రకాశవంతమైన చర్మం కావాలని ప్రతి ఒక్కరూ కోరుకుంటారు. ప్రస్తుత కాలంలో కాలుష్యం, ఒత్తిడి, మారిన జీవనశైలి కారణంగా చాలామంది మొటిమల సమస్యతో సతమతమవుతున్నారు. ముఖంపై మొటిమలు రాగానే రకరకాల క్రీములు వాడటం, ఖరీదైన చికిత్సలు చేయించుకోవడం చేస్తుంటారు. అయితే చర్మ సమస్యలకు ప్రధాన కారణం మనం తీసుకునే ఆహారంలోనే దాగి ఉంటుంది.

ప్రముఖ నిపుణులు డాక్టర్ సూర్య ఎస్, కన్సల్టెంట్ - డెర్మటాలజీ, స్పార్ష్ హాస్పిటల్, హెన్నూర్ రోడ్, బెంగళూరు మొటిమలు తగ్గేందుకు తినాల్సిన ఫుడ్స్, తినకూడని ఫుడ్స్ ఏంటో వివరించారు. ముఖ్యంగా కూరగాయలు, పండ్లు మన డైట్‌లో అంతర్భాగం కావాలి. మొటిమలు తగ్గేందుకు ఏం తినాలి, ఏం తినకూడదో ఇప్పుడు తెలుసుకుందాం.

డాక్టర్ ఏం చెప్పారు?

" మొటిమలు కేవలం చర్మానికి సంబంధించిన సమస్య మాత్రమే కాదని, మన శరీర అంతర్గత ఆరోగ్యాన్ని సూచించే ఒక సంకేతంగా మొటిమల్ని చూడాలి. మనం తీసుకునే ఆహారం శుభ్రంగా, పోషక విలువలతో కూడి ఉంటే చర్మం దానంతట అదే మెరుస్తుంది. బయట వాడే మందుల కంటే తీసుకునే పోషకాలు చర్మ సౌందర్యానికి ఎంతో కీలకం. మొటిమల్ని నివారించడానికి కూరగాయలు, పండ్లు మన డైట్‌లో అంతర్భాగం కావాలి."

చర్మానికి అవసరమైన పోషకాలు

యాంటీ ఆక్సిడెంట్లు: ఇవి చర్మంలోని కణాల నష్టాన్ని నివారిస్తాయి. తాజా పండ్లు (ముఖ్యంగా బెర్రీలు), ఆకుకూరలు ఎక్కువగా తీసుకోవాలి.

ఒమేగా-3 ఫ్యాటీ యాసిడ్స్: ఇవి చర్మ వాపును (Inflammation) తగ్గిస్తాయి. వాల్‌నట్స్ , అవిసె గింజలు (Flax seeds), చేపల్లో ఇవి పుష్కలంగా ఉంటాయి.

జింక్, విటమిన్లు: నట్స్, విత్తనాలు, తృణధాన్యాలు తీసుకోవడం వల్ల చర్మం లోపల నుంచి శుభ్రపడుతుంది.

క్యారెట్లు, బీట్‌రూట్

​క్యారెట్‌లో విటమిన్ ఏ పుష్కలంగా ఉంటుంది. ఇది చర్మ కణాలను ఆరోగ్యంగా ఉంచుతుంది. బీట్‌రూట్ రక్తంలోని మలినాలను తొలగించి ముఖానికి సహజసిద్ధమైన కాంతిని ఇస్తుంది. వీటిని ప్రతిరోజూ సలాడ్ రూపంలో తీసుకోవడం ఎంతో మేలు చేస్తుంది.

గుమ్మడి గింజలు తినండి

గుమ్మడి గింజల్లో జింక్ సమృద్ధిగా లభిస్తుంది. జింక్ అనేది మొటిమలను కలిగించే బ్యాక్టీరియాతో పోరాడే శక్తిని శరీరానికి అందిస్తుంది. హార్మోన్ల అసమతుల్యతను అదుపులో ఉంచడానికి ఇవి తోడ్పడతాయి. చర్మం త్వరగా కోలుకోవడానికి ఈ గింజలు సాయపడతాయి.

పసుపు చేసే మేలు

పసుపులో ఉండే కుర్కుమిన్ ఒక శక్తివంతమైన యాంటీ ఇన్‌ఫ్లమేటరీ ఏజెంట్. ఇది చర్మంపై ఉండే ఎరుపుదనం, వాపును తగ్గిస్తుంది. ఆహారంలో పసుపును తగిన మోతాదులో వాడటం వల్ల చర్మం ఇన్ఫెక్షన్ల బారిన పడదు.

నిమ్మకాయ, దానిమ్మ

నిమ్మకాయలో ఉండే విటమిన్ సి చర్మాన్ని శుభ్రపరుస్తుంది. దానిమ్మలో ఉండే యాంటీ ఆక్సిడెంట్లు చర్మం ముడతలు పడకుండా కాపాడతాయి. ఈ పండ్లు రక్త ప్రసరణను మెరుగుపరుస్తాయి. కణాల పునరుద్ధరణకు ఇవి ఎంతో అవసరం.

కీరదోస, బ్రకోలీ

కీరదోస శరీరంలోని వేడిని తగ్గించి చర్మాన్ని హైడ్రేటెడ్‌గా ఉంచుతుంది. బ్రకోలీలో ఉండే ఫైబర్, విటమిన్లు చర్మ రంధ్రాలను శుభ్రంగా ఉంచడంలో సాయపడతాయి. శరీరంలోని వ్యర్థాలను బయటకు పంపడంలో ఇవి కీలక పాత్ర పోషిస్తాయి.

మొటిమల్ని పెంచే ఆహారాలు

మనం తినే కొన్ని పదార్థాలు శరీరంలో వేడిని పెంచి, జిడ్డు ఉత్పత్తిని అధికం చేస్తాయి. తద్వారా మొటిమలు తీవ్రమవుతాయి. అందుకే వీటిని మానుకోవాలని డాక్టర్ సూచిస్తున్నారు. కొన్ని రకాల ఆహారాలు శరీరంలో ఇన్సులిన్ స్థాయిని పెంచి మొటిమలు రావడానికి కారణమవుతాయి.

పాలు, పాల ఉత్పత్తులు

చాలామందికి పాలు తాగడం వల్ల మొటిమలు వచ్చే అవకాశం ఉంటుంది. పాలలోని కొన్ని హార్మోన్లు చర్మ గ్రంథులను ప్రేరేపిస్తాయి. దీనివల్ల రంధ్రాలు మూసుకుపోయి మొటిమలు పెరుగుతాయి.

చాక్లెట్లు, చక్కెర

అధిక తీపి పదార్థాలు శరీరంలో ఇన్సులిన్ స్థాయిలను అకస్మాత్తుగా పెంచుతాయి. చక్కెర ఎక్కువగా తీసుకుంటే చర్మం తన స్థితిస్థాపకతను కోల్పోయి పాడవుతుంది. తీపి పదార్థాలు చర్మంలో ఇన్‌ఫ్లమేషన్ పెంచుతాయి.

సోడా, ఆల్కహాల్, కాఫీ

ఈ పానీయాలు శరీరాన్ని డీహైడ్రేషన్‌కు గురిచేస్తాయి. కెఫీన్ అధికంగా ఉండే కాఫీ వల్ల ఒత్తిడి పెరుగుతుంది. దీంతో మొటిమలు వస్తాయి. ఆల్కహాల్ చర్మాన్ని నిర్జీవంగా మారుస్తుంది. శరీరంలోని నీటి శాతాన్ని తగ్గించి చర్మాన్ని పొడిగా మారుస్తాయి.

చిప్స్, వైట్ బ్రెడ్

నూనెలో వేయించిన చిప్స్, మైదాతో తయారైన వైట్ బ్రెడ్ వంటి జంక్ ఫుడ్స్ రక్తంలో చక్కెరను పెంచుతాయి. ఇవి శరీరంలో టాక్సిన్లు పేరుకుపోయేలా చేస్తాయి. జీర్ణక్రియను మందగింపజేసి చర్మ సమస్యలకు కారణమవుతాయి. చర్మం మెరవాలంటే కేవలం పైపై వాడే మందులు సరిపోవు. క్రమశిక్షణతో కూడిన ఆహార నియమాలు, సరైన జీవనశైలి చాలా ముఖ్యం.

పోషకాలు ఉన్న ఆహారం తీసుకోవడం వల్ల లోపలి నుంచి చర్మం శుభ్రపడి మొటిమలు దూరమవుతాయి. ఆరోగ్యకరమైన ఆహారం మీ ముఖానికి సహజమైన నిగారింపును ఇస్తుంది. రాత్రిపూట సరైన నిద్ర, తగినంత మంచినీరు తాగడం వల్ల కూడా చర్మం కాంతివంతంగా మారుతుందని డాక్టర్ సూర్య తెలిపారు.