కలియుగ వైకుంఠంలో గరుడ పంచమి వైభవం: మాడ వీధుల్లో విహరించిన శ్రీమలయప్పస్వామి

తిరుమల క్షేత్రంలో గరుడ పంచమి పర్వదిన వేడుకలు అత్యంత భక్తిశ్రద్ధలతో, వైభవంగా నిర్వహించారు. శ్రావణ మాస శుక్ల పక్ష పంచమి తిథిని పురస్కరించుకొని తిరుమల కొండపై ఆధ్యాత్మిక శోభ సంతరించుకుంది. అఖిలాండకోటి బ్రహ్మాండ నాయకుడైన శ్రీ వేంకటేశ్వరస్వామి వారి కృపాకటాక్షాలతో భక్తులందరికీ శుభాలు కలగాలని కోరుకుంటూ, సూర్య న్యూస్ అందిస్తున్న ప్రత్యేక భక్తి సమాచారం.

సోమవారం రాత్రి 7 గంటలకు తిరుమలలో గరుడ వాహనసేవ అత్యంత నయనానందకరంగా ప్రారంభమైంది. శ్రీవారి వాహన శ్రేణిలోనూ, దాసులలోనూ అత్యంత అగ్రగణ్యుడైన గరుడునిపై శ్రీమలయప్పస్వామి వారు అధిరోహించారు. సర్వాలంకార భూషితుడైన స్వామివారు నాలుగు మాడ వీధుల్లో విహరిస్తూ భక్తజనవాహినికి దర్శనమిచ్చారు. స్వామివారిని దర్శించుకున్న వేలాది మంది భక్తులు గోవింద నామస్మరణతో తిరుమల గిరులను ప్రతిధ్వనింపజేశారు.

హిందూ సంప్రదాయంలో గరుడ పంచమి పూజకు ఎంతో ప్రాధాన్యత ఉంది.

ఈ పరమ పవిత్రమైన వాహనసేవలో తిరుమల పెద్దజీయర్ స్వామి, చినజీయర్ స్వామివార్లతో పాటు అదనపు ఈవో శ్రీ సి.హెచ్.వెంకయ్య చౌదరి మరియు పలువురు టీటీడీ ఉన్నతాధికారులు, అర్చకులు పాల్గొన్నారు. నిత్యకళ్యాణం పచ్చతోరణంగా విరాజిల్లే తిరుమల క్షేత్రంలో ఈ వేడుకను వీక్షించిన భక్తులు తన్మయత్వం చెందారు.