దుబాయ్ లో ముఖేశ్ అంబానీ అందమైన విల్లా
national | Suryaa Desk | Published : Sat, Aug 27, 2022, 11:47 PM
భారతదేశ కుబేరుడు ముఖేశ్ అంబానీ ఇటీవల దుబాయ్ లో విల్లాను కొనుగోలు చేసినట్లు తెలిసింది. దుబాయ్ ని భూతల స్వర్గంగా పేర్కొంటారు. విలాసానికి, వినోదానికి నెలవుగా దుబాయ్ ప్రపంచ ప్రఖ్యాతిగాంచింది. ఇక్కడ కృత్రిమంగా ఏర్పాటు చేసిన పామ్ జుమేరా దీవి ఎంతో ప్రసిద్ధికెక్కింది. ఇక్కడ ఓ విల్లా కలిగి ఉండడాన్ని ప్రపంచ కుబేరులు ప్రతిష్ఠాత్మకంగా భావిస్తారు. తాజాగా రిలయన్స్ అధినేత ముఖేశ్ అంబానీ తన చిన్నకుమారుడు అనంత్ కోసం ఇక్కడి పామ్ జుమేరా ఐలాండ్ లో ఓ ఖరీదైన విల్లాను కొనుగోలు చేసినట్టు వెల్లడైంది.
ఈ విల్లాకు ఇరుగుపొరుగు ఎవరో తెలిస్తే ఆశ్చర్యపోతారు. ఈ అల్ట్రా లగ్జరీ భవంతికి ఓవైపు బాలీవుడ్ సూపర్ స్టార్ షారుఖ్ ఖాన్ విల్లా, మరోవైపు అంతర్జాతీయ ఫుట్ బాల్ స్టార్ డేవిడ్ బెక్ హామ్ విల్లా ఉన్నాయి. ఇదిలావుంటే ముఖేశ్ అంబానీ కొనుగోలు చేసిన విల్లా ఖరీదు రూ.640 కోట్లు. ఇందులో పది బెడ్రూంలు, ఒక ఇండోర్ స్విమ్మింగ్ పూల్, మరో అవుట్ డోర్ స్విమ్మింగ్ పూల్, ఒక పర్సనల్ స్పా ఉన్నాయి. ఈ విల్లాను అనంత్ అంబానీ అభిరుచులకు అనుగుణంగా తీర్చిదిద్దేందుకు భారీ ఖర్చు చేయనున్నారు. ఈ విల్లా కొనుగోలులో క్రియాశీలక పాత్ర పోషించిన ఓ రియల్ ఎస్టేట్ డీలర్ ఈ వివరాలు తెలిపారు.
|
|