ఖాకీ డ్రస్ పవర్ తో ...అత్తామామలపై కోడలు పెట్రేగిపోయింది

ఒంటిమీదున్న ఖాకీ డ్రస్ తో కొందరు పోలీసు అధికార్లు తాము చేస్తున్నది తప్పా ఒప్పా అన్నది మరిచిపోతున్నారు. అలాంటి ఘటనే ఇది. కుటుంబంలో కోడలు... అత్తమామల మధ్య కలహాలు ఉండడం సహజమే. ఒక్కోసారి వారి మధ్య ఉన్న సమస్యల వల్ల పోలీస్ స్టేషన్‌ వరకు వెళ్తారు. అయితే కోర్టు, కేసులు వరకు వెళ్లడం ఎందుకని దాదాపుగా పోలీసులు వాళ్లకి కౌన్సెలింగ్ నిర్వహిస్తారు. సర్దుకుపొమ్మని.. ఒకరినొకరు అర్థం చేసుకుని జీవించమని చెబుతుంటారు. అయితే ఢిల్లీలో దీనికి విరుద్ధమైన సంఘటన చోటుచేసుకుంది. సబ్ ఇన్సెప్టక్‌గా పనిచేస్తున్న ఓ అమ్మాయి.. తన అత్తమామలకు చుక్కలు చూపించింది. తన సొంత అత్త మామలను దూషించడమే కాదు.. ఏకంగా వాళ్ల లెంపలు వాయించేసింది.

పోలీస్ సబ్ ఇన్‌స్పెక్టర్‌గా పనిచేస్తున్న ఆ అమ్మాయి తన మావయ్యపై ఆగ్రహంతో ఊగిపోయింది. వయస్సులో పెద్దవాడని కూడా చూడకుండా మావయ్యపై పిడిగుద్దులు కురిపించింది. ఢిల్లీలోని లక్ష్మీ నగర్‌లోని వారి ఇంటికి ఆదివారం తన తల్లితో కలసి వెళ్లింది. తల్లీకూతుళ్లు వారితో వాగ్వాదానికి దిగారు. తర్వాత కోడలు మావయ్యపై దాడి చేసింది. పదే పదే కొట్టింది. తన అత్తమామలను దూషించింది. దాడి చేసే ముందు పోలీసు కోడలు, ఆమె తల్లి ఆయనతో తీవ్ర వాగ్వాదం చేశారు. వెంటనే ఇద్దరూ కలసి ఒకరి తర్వాత ఒకరు అతనిని కొట్టారు. దాడిలో ఆమె తల్లి కూడా ఆమెకు సహాయం చేసింది. ఇంకా విచిత్రమేమిటంటే ఇదంతా మరో పోలీసు ఆఫీసర్ ఎదురుగా జరిగింది. ఆయన వారించినా.. పట్టించుకోకుండా దాడికి పాల్పడ్డారు.

డిఫెన్స్ కాలనీ పోలీస్ స్టేషన్‌లో పనిచేస్తున్న ఆ అమ్మాయికి .. తన అత్తమామల మధ్య గత కొంతకాలంగా గొడవలు ఉన్నాయి. వారి మధ్య వివాదం కోర్టు వరకూ కూడా వెళ్లింది. ఇంతలోనే ఇంట్లో తన మావయ్యపై వారు ఇలా విరుచుకుపడ్డారు. దీనిపై దాడికి గురైన అత్తమామలు.. పోలీసు ఉన్నతాధికారులకు ఫిర్యాదు చేశారు. తన కోడలు పోలీసు అధికారాన్ని అడ్డుపెట్టుకుని తమపై జులుం చేస్తుందని, రెండేళ్లుగా తమ కుటుంబాన్ని వేధిస్తుందని ఫిర్యాదులో పేర్కొన్నారు. మరోవైపు సబ్ ఇన్‌స్పెక్టర్ తన అత్తమామలను కొట్టిన వీడియో బయటకొచ్చింది. సోషల్ మీడియాలో వైరల్ అయింది. దీంతో ఆమెపై 323, 427 ఐపీసీ సెక్షన్ల కింద కేసు నమోదు అయింది. దీనిపై విచారణ జరుపుకుతున్నామని, ఆ పోలీసు అధికారిపై తగిన చర్యలు తీసుకుంటామని ఉన్నతాధికారులు వెల్లడించారు.