సినిమాను తలపించేలా..పదిరోజుల్లో ఐదు సార్లు అలా కాటేసింది

పాములు పగబడతాయా అంటే అవుననే వారు ఉన్నారు. కాదనే వారు కూడా ఉన్నారు. అందులో ఏది నిజమో తెలియదు కానీ ఓ యువకుడు మాత్రం నానా యాతన పడుతున్నాడు. పది రోజుల వ్యవధిలో ఓ యువకుడు ఐదుసార్లు పాముకాటుకు గురై ప్రాణాపాయం నుంచి బయటపడిన ఘటన ఉత్తర్‌ ప్రదేశ్‌‌లో చర్చనీయాంశమైంది. ఆగ్రా జిల్లా మల్‌పురా ప్రాంతం మన్‌కేడా గ్రామానికి చెందిన రజత్‌ చాహర్‌ అనే 20 ఏళ్ల యువకుడిపై పాము పగబట్టింది. పాము కాటేసినా సకాలంలో వైద్యం అందడంతో అతడు ఆరోగ్యంగానే ఉన్నాడు. కానీ, ఎప్పుడు ఏం జరుగుతుందో అని కుటుంబసభ్యులు ఆందోళన చెందుతున్నారు. మన్‌కేడా గ్రామంలోని రామ్‌కుమార్‌ చాహర్‌ కుమారుడు రజత్‌ చాహర్‌ డిగ్రీ చదువుతున్నాడు. సెప్టెంబరు 6న రాత్రి 9.00 గంటలకు రజత్ ఇంటి బయట నడుస్తుండగా.. ఓ పాము ఎడమకాలిపై కాటేసింది. భయంతో రజత్‌ కేకలు వేయగా, కుటుంబసభ్యులు వచ్చేసరికి పాము వెళ్లిపోయింది.

దీంతో అతడ్ని చికిత్స కోసం ఆగ్రాలోని ఎస్‌ఎన్‌ వైద్య కాలేజీ ఆస్పత్రికి తరలించారు. రజత్‌ను పరీక్షించిన వైద్యులు పాముకాటు లక్షణాలేవీ కనిపించడం లేదని ఇంటికి పంపేశారు. మళ్లీ రెండు రోజుల తర్వాత సెప్టెంబరు 8న సాయంత్రం ఇంటి బయట ఉన్న బాత్ రూమ్‌లోకి వెళ్లినప్పుడు అక్కడే ఉన్న పాము మరోమారు ఎడమకాలిపై కాటేసింది. ఈ సారి ముబారక్‌పుర్‌ తీసుకువెళ్లి, వైద్యం చేయించారు. ఇదేవిధంగా 11, 13, 14 తేదీల్లో రజత్‌ను పాము కాటువేసింది. అయితే, ఐదుసార్లు ఎడమకాలిపైనే కాటువేడయం గమనార్హం.

దీంతో పాము కాటువేయకుండా షూ ధరిస్తున్నాడు. ఎందుకు తననే వెంటాడుతోందో, ఒకేచోట కాటేయడం ఏమిటో తెలియక కుటుంబసభ్యులు ఆందోళన చెందుతున్నారు. రజత్ తండ్రి రామ్‌కుమార్ మాట్లాడుతూ.. పది రోజుల వ్యవధిలో ఇప్పటికి ఐదుసార్లు పాము కాటుకు గురయ్యాడని తెలిపారు. ఒకే చోట కాటు వేయడంతో దానిని నుంచి తప్పించుకోడానికి ఇంటిలోనూ షూ ధరించాల్సిన పరిస్థితి వచ్చిందన్నారు. ఇక, ఈ విషయం తెలిసిన గ్రామస్థులు, చుట్టుపక్కల వారు రజత్‌ ఇంటికి పెద్ద సంఖ్యలో పరామర్శకు వస్తున్నారు.