ఆకలేసి...సూపర్ మార్కెట్లోకి చొరబడిన ఎలుగుబంటి

జంతువులు కూడా ఈ రోజుల్లో తెలివిమీరి పోయాయి. ఆకలేసిన ఎలుగుబంటి సూపర్ మార్కెట్లోకి చొరబడింది. ప్రస్తుతం ఈ వీడియో తెగవైరల్ అవుతోంది. ఇదిలావుంటే సోషల్ మీడియా అందుబాటులోకి వచ్చాక చాలా వీడియోలు వైరల్ అవుతున్నాయి. ఇందులో ప్రధానంగా జంతువులకు సంబంధించిన వీడియోలు మనకు అనేకం దర్శనమిస్తున్నాయి. జంతువుల వీడియోలు చూసినప్పుడు మనకు రిలాక్స్‌గా అనిపిస్తూ ఉంటుంది. వాటి చేష్టలు చూస్తూ మనం ఎంత పెద్ద కష్టం అయినా మర్చిపోతుంటాం. ఇటువంటిదే ఒక వీడియో ఇప్పుడు సోషల్ మీడియాలో తెగ వైరల్ అవుతోంది. ఈ వీడియోను చూసిన నెటిజన్లు భిన్నంగా స్పందిస్తున్నారు. వివిధ రకాల కామెంట్లు చేస్తున్నారు.

ఆకలి అనేది జంతువులకైనా కానీ మనుషులకైనా కానీ ఒకే విధంగా ఉంటుంది. ఆకలి వేస్తే ఏం చేయలేం. ఆ సమయంలో ఏదో ఒకటి తిన్నాకే మనసు కుదుటపడుతుంది. అటువంటి సంఘటనే ఇప్పుడు కాలిఫోర్నియాలోని ఒలంపిక్ వ్యాలీలో జరిగింది. అక్కడున్న ఓ సూపర్ మార్కెట్లోకి ఆకలితో ఉన్న ఓ ఎలుగుబంటి ప్రవేశించింది. ఎలుగుబంటి సూపర్ మార్కెట్లో ఉన్న స్నాక్స్ తింటూ రాత్రంతా గడిపింది. అక్కడే పనిచేస్తున్న ఓ క్యాషియర్ స్టోర్ డోర్ తెరిచి ఉండటం గమనించాడు. అసలు ఏం జరుగుతుందా? అని తెలుసుకోవడానికి లోపలికి వెళ్లాడు. వెంటనే అక్కడ ఎలుగుబంటి ఉండటం చూసి వణికిపోయాడు. అతడు డైలీ మెయిల్ అనే మీడియాతో మాట్లాడుతూ.. మొదట ఈ దృశ్యాన్ని తాను నమ్మలేకపోయాననీ.. తర్వాత నమ్మాల్సి వచ్చిందని చెప్పాడు. ఇదివరకు తాను చూసిన వాటి కంటే ఈ ఎలుగుబంటి 20 నుంచి 30 శాతం పెద్దగా ఉన్నట్లు కూడా అతను చెప్పాడు. చూసీ చూడగానే భయపడ్డాననీ.. 15, 20 సెకన్ల తర్వాత కొంచెం కుదుటపడ్డానని అతను చెప్పాడు. ఆ ఎలుగుబంటి ఎలా ఆలోచిస్తుందో తనకు తెలియదు కాబట్టి భయం వేసిందని తెలిపాడు. తన వెనకాల వైపు ఒక డోర్ ఉందని కూడా అతడు తెలిపాడు. అందుకోసమే తాను ధైర్యంగా ఉన్నట్లు చెప్పాడు. లేకుంటే పరిస్థితి ఎలా ఉండేదో అని వివరించాడు. అది ఎలా ఆలోచిస్తుందో తెలియదు కాబట్టి మనం చాలా జాగ్రత్తగా ఉండాలని అతడు సూచించాడు. ఈ వీడియోకి ఆ వ్యక్తి థీఫ్ మ్యాన్ అని క్యాప్షన్ పెట్టాడు.