అణ్వాయుధ ముప్పు పొంచి ఉంద

ప్రపంచానికి అమెరికా దేశాధినేత  జో బైడెన్ ఓ హెచ్చరిక చేశాడు.  ప్రచ్ఛన్న యుద్ధం తర్వాత ప్రపంచానికి మొదటిసారిగా అణ్వాయుధ ముప్పు పొంచి ఉందని, ఉక్రెయిన్ యుద్ధంలో రష్యా అధ్యక్షుడు వ్లాదిమిర్ పుతిన్ ఆలోచనా విధానాన్ని అంచనా వేయడానికి తాము ప్రయత్నిస్తున్నామని అమెరికా అధ్యక్షుడు జో బైడెన్ వ్యాఖ్యానించారు. న్యూయార్క్‌లో గురువారం నిర్వహించిన డెమొక్రాటిక్ పార్టీ విరాళాల సేకరణ కార్యక్రమంలో బైడెన్ పాల్గొన్నారు. ఈ సందర్భంగా ఆయన మాట్లాడుతూ.. 1962లో కెన్నెడీ, క్యూబా క్షిపణి సంక్షోభం సమయంలోనూ అణ్వాయుధ ప్రమాదాన్ని ఎదుర్కోలేదని అన్నారు. ఉక్రెయిన్‌పై దండయాత్రను కొనసాగించేందుకు అణ్వాయుధాలను ఉపయోగిస్తానన్న పుతిన్ బెదిరింపులు హాస్యం కాదని ఆయన స్పష్టం చేశారు.

మీడియా దిగ్గజం రూపర్ట్ ముర్డోక్ కుమారుడు జేమ్స్ ముర్డోక్‌ మన్‌హట్టన్ నివాసంలో జరిగిన కార్యక్రమంలో డెమొక్రాటిక్ పార్టీ మద్దతుదారులను ఉదేశించిన మాట్లాడిన బైడెన్.. పుతిన్ అణు బెదిరింపుల వల్ల ఏర్పడే ప్రమాదాల గురించి అసాధారణంగా బలమైన వ్యాఖ్యలు చేశారు. క్యూబా యుద్ధం సమయంలో సోవియట్ యూనియన్ క్షిపణులు మోహరించడం ద్వారా నెలకున్న అణు ప్రతిష్టంభనను ప్రస్తావించారు. ప్రస్తుత పరిణామాలను బట్టి క్యూబా క్షిపణి సంక్షోభం తర్వాత మొదటిసారిగా అణ్వాయుధాల వాడకంతో మనకు ప్రత్యక్ష ముప్పు ఉందని అన్నారు.

ఉక్రెయిన్ భూభాగాన్ని స్వాధీనం చేసుకునే ప్రయత్నంలో అన్ని అవకాశాలు అయిపోయాయని భావించినప్పుడు చివరిగా అణ్వాయుధాల ప్రయోగానికి కూడా వెనుకాడబోమని పుతిన్ పలుసార్లు హెచ్చరికలు చేశారు. అయితే, నిపుణులు మాత్రం ఇవి వ్యూహాత్మక ప్రకటనలు కావచ్చునని అంటున్నారు. కానీ, బైడెన్ మాత్రం పరిమిత ప్రాంతంలో వ్యూహాత్మకమైనప్పటికీ విస్తృత గందరగోళాన్ని ప్రేరేపించే ప్రమాదం ఉందని హెచ్చరించారు.

‘‘మనకు బాగా తెలిసిన ఆ వ్యక్తి గురించి చెప్పుకోవాలి.. వ్యూహాత్మక అణ్వాయుధ లేదా జీవ, రసాయన ఆయుధాల వినియోగం గురించి పుతిన్ హాస్యాస్పదంగా మాట్లాడడు... ఎందుకంటే అతడి సైన్యం పనితీరు సరిగ్గా లేదని భావించాలి.. అయితే, వ్యూహాత్మక అణ్వాయుధాన్ని సులభంగా వినియోగించే సామర్థ్యంతో అంతిమ పోరు ముగుస్తుందని నేను భావించడం లేదు’’ అని వ్యాఖ్యానించారు. ‘‘పుతిన్ ఆలోచన విధానం ఏంటనేది అంచనా వేయడానికి ప్రయత్నిస్తున్నాం.. అతడు బయటపడే మార్గాన్ని ఎక్కడ కనుగొంటాడు? తన ప్రభావాన్ని కోల్పోవడమే కాకుండా రష్యాలో గణనీయమైన శక్తిని కోల్పోని స్థితిలో ఎక్కడ ఉన్నాడు?’’ అనేది తెలియాల్సి ఉందని బైడెన్ పేర్కొన్నారు.